ANCHANGEI pwe ka katol kachitoon emén mi iteféúló, eli emén chón kél ka mmen sani. Ena kachito a poputá seni pwóróusan me lekúkkúnún atun a kerán káé pekin nikáttik me an praktis iteitan. A ffichiló wóón an kél mwen mesen eú mwichen aramas, me an sáifetál me iteféúlóón wóón unusen fénúfan. Nge, a pwal pwá lón ena kachito pwe a chinnapeló, me mwirin a máló.

Ena kachito ina wesewesen pwóróusen emén nge a fen máló. Ese lifilifil ika ewe emén i emén chón kél, emén scientist, emén chón fiti pekin urumwot, are pwal emén mi iteféúló, nge pwóróuseer a chék taitap. Ena aramas a fen féri chómmóng mettóch mi múrinné, nge ekieki mwo ika epwele fen ifa me chómmóngun met ekkewe a pwal tongeni féri ika ese chinnapeló me máló?

Eli sia letipechou atun sia ekieki usun, nge ina met epwe pwal fis ngenikich meinisin. (Än Salomon Afalafal 9:5) Ese lifilifil úkúkún ach achocho, nge sise tongeni aúkatiw chinnapeló me máló. Nge esap chék ina, pwe a tongeni weiweitá ach máló ren semmwen are ákseten. Usun met a mak lón Paipel pwe manawach a chék usun amurenipwin “mi pwä lon ekis chök fansoun mochomoch, mürin esap chüen nom.”​—James 4:14.

Iwe, pokiten aramas ra ekieki pwe ina nónnómun manawach, iwe ra eáni ewe ekiek pwe “ousipwe momongö o ükün, pun lesor sipwe mäla.” (1 Korint 15:32) Nge aramas ra eáni ena sókkun ekiek pokiten ra ekieki pwe epwe tongeni weiweitá málóór, me ese wor ar ápilúkúlúk fán iten mwachkkan. Eli eú rán are atun emén a nóm lón fansoun weires, epwe ekieki, ‘Itá epwe chék iei usun manawach?’ Iwe, ia sia tongeni kúna me ie pélúwen ena kapas eis?

Chómmóng ra áneánei pwe scientist repwe kúna pélúwen ena kapas eis. Iwe ekkewe scientist me tokter ra kúna alen ar repwe ekis alangattamaaló manawen aramas. Nge ese lifilifil mwirilóón ar achocho le féri ena, nge sia chúen eáni ekkeei kapas eis: Pwata sia chinnapeló me máló? Itá mi wor ach ápilúkúlúk pwe máló ewe chón oputakich epwe úkútiw? Ekkan lesen mwirin ei repwe pélúweni ekkena kapas eis me pwal pélúweni ei kapas eis, Itá epwe chék iei usun manawach?