ANCHANGEI pwe ka fetál wóón efóch al mi kiroch pokiten a fen pwinimaw. Inaamwo ika a fen tup ewe akkar chék me iwe, nge kese meefi pwe ka wesewesen mórukóló pokiten a wor reom efóch tengki mi manawanaw. Lupwen ka fieetiw ewe tengki, a fókkun asarama mwom. Nge lupwen ka fieeló, a wenewenen asaramaaló ewe aleló.

Ewe Paipel a usun chék ena tengki. Sia fen pwóróus wóón ekkewe lesen mwen ei pwe án Kot we Kapas a tongeni álisikich le likiitú fán ekkewe osukosuk mi nóm mwach, ekkewe sia kan kúna lón manawach rán me rán lón ei ótót mi efitikoko. Nge ewe Paipel a álisikich ren pwal och mettóch. A pwal tongeni asarama alach mwach, iwe a atufichikich le kúna me fetál wóón ewe al epwe emmwenikich ngeni pwapwa fóchófóch. (Kölfel 119:105) Ifa usun?

Sipwe nengeni ruu napanap ren ifa usun ewe Paipel a tongeni awora ngenikich ápilúkúlúk fán iten mwachkkan: 1 A álisikich le kúna aúchean manaw, me 2 a áiti ngenikich ifa usun sipwe ámááraatá ewe riri epwe nóm tori feilfeiló chék lefilach me ewe Chón Férikichetá.

Paipel, ewe puk mi fókkun álilliséch seni ekkewe pwal ekkóch puken álillisin manawach, a awora kapasen fén mi anúkúnúk ren ifa usun sipwe likiitú fán ach kewe osukosuk. Ewe Paipel ese pesekich ach sipwe afóta ach ekiek wóón pwisin ach kewe osukosuk, nge a áiti ngenikich pwe mi pwal wor chómmóng mettóch mi aúchea seni pwisin ach kewe osukosuk sipwe nefotofot woor. Lupwen sia féri ena, epwe wesewesen wor aúchean manawach.

Áwewe chék, ekieki án Paipel ei kapasen emmwen: “Sia feiöch ren ach fang lap seni ach angei.” (Föför 20:35) Ka tongeni ekieki eú atun ka álisi emén mi osupwang? Are eli lupwen ka awora fansoun le aúseling ngeni án chiechiom ounusa ngonuk masouen letipan? Kesele mmen menemenéch ren óm apwapwaai letipen emén?

Sia kúna pwapwa wachemwuk lupwen sia fangóló nge  sise pwal ekiekin angei liwinin. Emén soumak a erá: “Lape ngeni, ka kan angei feiéch mi lap ren óm fangafangéch, nge epwe chék fis ena ika ka fang nge kese ekiekin angei liwinum.” Nge lupwen sia fangóló ach péchékkúl me fansoun, ákkáeúin ngeni chókkewe rese tufichin eliwini ngenikich met sia féri fán iter, iwe sia wesewesen angei feiéchún. Sia kúna pwúngún ena pwóróus pwe mi chómmóng met mi pwal aúchea seni ach ekieki chék pwisin ach osukosuk. Ewer, sia angangfengen me ewe Chón Férikichetá, ewe mi meefi pwe a liwinimmang ngonuk ren óm féfférún kirekiréch ngeni aramas. (Än Salomon Fos 19:17) A fókkun aúcheani féfférum ngeni chókkewe mi tekison, me a pwonei pwe epwe liwini ngenikich ewe feiéchún manaw esemuch lón paratis wóón fénúfan, ina eú ápilúkúlúk allim mi amwarar fán iten mwachkkan!​—Kölfel 37:29; Lukas 14:12-14. *

Lap seni meinisin, ewe Paipel a áiti ngenikich pwe sia tongeni kúna enletin aúchean manawach ren ach fel ngeni ewe Kot mi enlet, Jiowa. An we Kapas a apéchékkúlakich ach sipwe mwareiti, asamolu, me álleasochisi, pokiten a fich ngeni I. (Än Salomon Afalafal 12:13; Pwärätä 4:11) Atun sia féri ena, sia féri och mettóch a mmen amwarar ach sipwe ekieki usun: Ewe Chón Fératá a chúng ren minne sia féri. Ren enletin, a pesekich: “Kopwe tipachem o apwapwai lelukei.” (Än Salomon Fos 27:11) Ekieki mwo ei, atun sia kan alónga ach kewe kefil wóón ekkewe kapasen emmwen seni Paipel, sia apwapwaai letipen Semach we lón láng. Pwata? Pokiten a áfánnikich me a mochen ach sipwe kúna feiéch ren ach apwénúetá an emmwen. (Aisea 48:17, 18) Ren enletin, ese pwal wor popun mi lap seni ach fel ngeni ewe Sounemenem mi tekia seni meinisin me eáni ewe sókkun manaw mi apwapwaai letipan.

Ewe Paipel a pwal áiti ngenikich ach sipwe ámááraatá ach ririéch ngeni ewe Chón Fératá. A erá: “Oupwe arap ngeni Kot, iwe, epwe arap ngenikemi.” (James 4:8) Fán ekkóch eli sia tipemwaramwar ika sia tongeni enletin chiechi ngeni ewe Chón Fératá, ewe mi unusen manaman. Nge ewe Paipel a anúkúnúkúkich pwe ika sia “kütta i,” sipwe wesewesen “küna i” pokiten “esap wesewesen toau seni eman me eman leich.” (Föför 17:27) Án Paipel kapasen pesepes ren ach sipwe wiliti chiechien Kot, a fókkun álilliséch ngeni manawach lón mwachkkan. Ifa usun?

Ekieki mwo ei: Inaamwo ika sia resin achocho, nge ese wor emén epwe tongeni okkufu máló, ewe amuchúlóón chón oputakich ren pwisin an tufich. (1 Korint 15:26) Iwe nge, Kot ewe mi nóm tori feilfeiló chék, esap tongeni máló, me a mochen pwe chiechian kewe repwe pwal manaw tori feilfeiló chék. Ewe Paipel a apasa met Jiowa a mochen fán iten chókkewe mi kútta i ren an néúnéú ekkeei kapas mi echipwér, a erá: “Amwo repwe feiöch tori feilfeilachök.”​—Kölfel 22:26.

Ifa usun kopwe ámááraatá ewe riri mi nómoffóch lefilóm me Kot? Kákkáé usun i seni an we Kapas, ewe Paipel. (Johannes 17:3; 2 Timoty 3:16) Kútta an álillis pwe kopwe weweiti ewe Paipel. Ewe Paipel a anúkúnúkúkich pwe ika sia enletin achocho le “tüngor ngeni Kot” tipachem, iwe epwe fang ngenikich. * (James 1:5) Sáingolóón, achocho le apwénúetá minne ka káé, mut ngeni án Kot we Kapas an epwe usun chék ‘eu lamp a aiti ngonuk ia kopwe ipwela ie’ me epwe ‘asarama alom’ iei, me tori feilfeiló chék.​—Kölfel 119:105.