Among mga Magbabasa Nangutana

Malaglag ba ang Yuta?

Ang atong planeta dili gayod malaglag pinaagig usa ka katalagman. Nganong makaseguro kita niini? Tungod kay ang Diyos nagsaad nga ang yuta “dili matarog hangtod sa panahong walay tino, o hangtod sa kahangtoran.” (Salmo 104:5) Bisan pag ang “mga kaliwatan moabot ug ang mga kaliwatan moagi,” nag-ingon ang Bibliya, “ang yuta magpabilin sa walay kataposan.”—Ecclesiastes 1:4, New International Version.

Sa orihinal, ang Salmo 104:5 naggamit ug duha ka Hebreohanong pulong nga nagpasiugda nga dili gayod malaglag ang yuta—ang ʽoh·lamʹ, nga nagkahulogang “panahong walay tino” ug ang ʽadh nga nagpasabot ug “walay kataposan.” Ang ʽoh·lamʹ mahimo usab hubaron nga “daghang katuigan” o “dili matapos.” Sumala sa Students’ Hebrew and Chaldee Dictionary ni Harkavy, ang ʽadh nagpasabot ug “gidugayon, pagkawalay-kinutoban, hangtod sa hangtod, ug walay kataposan.” Kining duha ka Hebreohanong pulong nagpalig-on sa kamatuoran nga ang yuta dili gayod malaglag. Tagda ang tulo ka pamatuod niini gikan sa Bibliya.

Una, gilalang sa Diyos ang yuta aron mahimong usa ka maanindot nga paraiso nga puy-an sa mga tawo. Wala niya kini lalanga aron mahimong umaw ug dili kapuy-an. Ang Isaias 45:18 nagbatbat kang Jehova ingong “ang Maglalalang sa mga langit, Siya nga mao ang matuod nga Diyos, ang Mag-uumol sa yuta ug ang Magbubuhat niini, Siya nga mao ang Usa nga lig-ong nagtukod niini, nga wala maglalang niini sa wala lamay kapuslanan, nga nag-umol niini aron pagapuy-an.”

Ikaduha, ang Diyos misaad nga ang mga tawong masinugtanon kaniya magapuyo sa usa ka malinawong yuta sa walay kataposan. Ang Miqueas 4:4 nag-ingon: “Sila manglingkod, ang tagsatagsa ilalom sa iyang paras ug ilalom sa iyang kahoyng igos, ug walay usa nga magpakurog kanila; kay ang baba ni Jehova sa mga panon nagsulti niini.” Busa sumala sa katuyoan sa Diyos, ang yuta pagapuy-an sa mga tawo hangtod sa hangtod, kay kon dili, ang iyang saad dili matuman.—Salmo 119:90; Isaias 55:11; 1 Juan 2:17.

Ikatulo, gisugo sa Diyos ang tawo sa pag-atiman sa yuta. “Kon bahin sa mga langit, iya ni Jehova ang mga langit, apan ang yuta iyang gihatag sa mga anak sa mga tawo,” nag-ingon ang Pulong sa Diyos. (Salmo 115:16) Mohatag ba ang usa ka mahigugmaong amahan ug nindot nga regalo sa iyang anak ug iya ra usab dayon kanang bawion ug gub-on? Siyempre dili! Sa susama, dili usab kana buhaton ni Jehova sa yuta ug sa mga molupyo niini tungod kay “ang Diyos gugma.”—1 Juan 4:8.

Si Jesu-Kristo naghatag usab kanatog pasalig maylabot sa mga butang nga gisulti sa iyang Amahan: “Ang imong pulong maoy kamatuoran.” (Juan 17:17) Dugang pa, ang Diyos kinsa dili makabakak, nagsaad: “Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.”—Salmo 37:29; Tito 1:2.

[Picture Credit Line sa panid 31]

Globe: Based on NASA photo