Ang Bibliya Makabag-o sa Kinabuhi

Unsay nagtukmod sa usa ka membro sa Junior Satans nga gang sa Mexico nga magbag-o ug mahimong matinud-anon ug kugihan nga tawo? Nganong nausab man ang prayoridad sa usa ka malamposong negosyante nga Haponesa nga naggugol sa iyang panahon sa pagpangitag kuwarta? Unsang mga kaayohan ang iyang nabatonan sa paghimog mga kausaban? Nganong gibiyaan sa usa ka Ruso ang iyang dakog kita apan ilegal nga negosyo sa pagpamaligyag armas? Tagda kon unsay ilang ikasulti bahin niini.

NGALAN: ADRIAN PEREZ

EDAD: 30

NASOD: MEXICO

KANIADTO: MEMBRO SA GANG

KAAGI: Sa hapit na ko mag-13 anyos, ang among pamilya namalhin sa siyudad sa Ecatepec de Morelos, Mexico. Kaylap kaayo didto ang pagkadelingkuwente sa mga batan-on, bandalismo, ug pag-abuso sa droga. Sa wala madugay, ako usab naghuboghubog, nagdaot sa mga propiedad, ug nahimong imoral.

Sa ulahi, mibalik mig puyo sa San Vicente, ang lungsod nga akong natawhan. Apan, daghan usab kaayo didto ang mga adik sa droga. Normal na lang nga makakita kag patayng lawas sa mga batan-on nga nagbuy-od diha sa dalan. Miapil ko sa usa ka gang nga gitawag ug Junior Satans. Wala mi laing lingaw kondili ang mangawat ug magsimhot ug tiner o ragbi. Sagad, dili nako mahinumdoman kon giunsa nako pag-uli sa balay, ug usahay mawad-an kog panimuot diha sa dalan. Ang pipila sa akong mga kauban nabilanggo tungod sa pagpangawat ug pagbuno.

Bisan pa niini, nagtuo gihapon ko sa Diyos. Aron dili kaayo ko tulisokon sa akong konsensiya, moapil ko sa relihiyosong mga seremonyas sama sa estasyon sa krus panahon sa Semana Santa. Apan inigkahuman niini,  magtapoktapok ming tanan aron mag-inom, apil na ang nagdula sa papel nga Kristo.

KON SA UNSANG PAAGI GIBAG-O SA BIBLIYA ANG AKONG KINABUHI: Sa hapit na ko mag-20 anyos, nagtuon ako sa Bibliya uban sa mga Saksi ni Jehova. Nahibalo ko nga ang akong kinabuhi walay direksiyon ug kon dili ko magbag-o, dili gyod maayo ang akong dangatan. Natandog ako sa giingon sa Galacia 6:8: “Siya nga nagapugas alang sa iyang unod moani ug pagkadunot gikan sa iyang unod, apan siya nga nagapugas alang sa espiritu moani ug kinabuhing walay kataposan gikan sa espiritu.” Tungod niining maong teksto, akong naamgohan nga kinahanglan kong magbag-o aron makabatog maayong kaugmaon.

Samtang nagtuon sa Bibliya, akong nasabtan nga si Jehova maoy usa ka buhi nga Diyos ug siya interesado gayod kanako ug andam usab siyang mopasaylo sa tanan nakong nahimo. Nasinati gayod nako nga siya mamati ug motubag sa mga pag-ampo.

Nalisdan ko sa pagbag-o sa akong paagi sa pagkinabuhi. Dili sayon ang pagbulag sa among grupo. Bisag mibiya na ko, dili ko mahimong moagi sa pipila ka dapit. Usahay, motago ko aron dili ko makit-an sa akong mga barkada nga magsigeg pamugos nako sa pagbalik sa grupo.

Apan, sa dihang tigtambongan na ko sa mga tigom sa Kingdom Hall sa mga Saksi, akong gibati ang kainit ug gugma sulod sa kongregasyon. Nakadayeg ako sa ilang lig-ong pagtuo ug sa ilang pagkinabuhi sumala sa kon unsay ilang ginatudlo. Lahi gayod kaayo sa palibot nga akong naandan.

MGA KAAYOHAN NGA AKONG NABATONAN: Napulo na ka tuig nga ako nabawtismohan ingong usa ka Saksi ni Jehova. Naningkamot gayod ako sa pagpadapat sa gitudlo sa Bibliya. Tungod niini, may respeto na kanako ang among pamilya. Karon, ilang nakita nga ako usa na ka kugihan nga tawo, ug tungod sa akong paghago natabangan usab nako sila sa pinansiyal. Nagtuon si Mama sa Bibliya ug karon usa na siya ka Saksi ni Jehova. Si Papa nagbag-o usab sa iyang pagkinabuhi. Kadaghanan sa among pamilya dili Saksi, apan sa dihang nakita nila ang mga kausaban nga akong gihimo, kombinsido gayod sila nga ang Bibliya makabag-o sa kinabuhi sa usa ka tawo.

NGALAN: YAYOI NAGATANI

EDAD: 50

NASOD: JAPAN

KANIADTO: MALAMPOSONG NEGOSYANTE

KAAGI: Ako nagdako sa usa ka gamayng lungsod nga mahigalaon ang mga tawo. Ang akong amahan tag-iyag usa ka dakong tindahan sa lungsod ug duna siyay napulo ka trabahante. Tapad ra sa tindahan ang among balay, maong wala ra sab ko mingawa bisag puliki kaayo ang akong mga ginikanan sa ilang negosyo.

 Kinamagulangan ako sa tulo ka magsoong babaye sa among pamilya, ug sa sayong pangedaron, gibansay na ako sa pagdumala sa among negosyo. Naminyo usab kog sayo. Ang akong bana miresayn sa iyang trabaho sa bangko aron motabang sa among negosyo. Nagsunod pagkatawo ang among tulo ka anak. Si Mama ang nag-atiman sa among mga anak ug sa mga buluhaton sa balay kay gabii na man ko makapauli gikan sa among tindahan. Bisag puliki, duna gihapon mi panahon nga mag-uban ingong pamilya.

Dayon, tungod sa krisis, mihinay ang negosyo sa among dapit ug naapektohan pag-ayo ang among negosyo. Busa, nakahunahuna mi sa pag-ablig tindahan sa mga materyales nga gamiton sa pag-ayo sa balay ug duol kini sa haywey sa among lungsod. Sa wala pa magsugod ang seremonyas sa pagtukod sa among tindahan, si Papa, nga maoy presidente sa among kompaniya, kalit lang natumba. Sa ulahi, among nasayran nga adunay mga tisyu sa iyang utok nga wala na moobra. Halos dili na siya makasulti, maong ako ang gipadumala sa among bag-ong tindahan. Ang akong bana nagpabilin sa among daan nga puwesto. Puliki kaayo mi.

Miuswag pag-ayo ang among bag-ong tindahan. Mapasigarbohon ko sa akong nalampos ug halos wala na koy panahon nga matulog tungod sa kadaghan sa akong trabaho. Gihigugma nako ang akong mga anak, apan ang akong hunahuna anaa kanunay sa among negosyo. Dili na mi halos magkaestoryahay sa akong bana, ug sa dihang magsultianay mi, kanunay ming maglalis. Aron makarelaks, halos kada gabii ko makig-inom sa akong mga higala ug mga kasosyo sa negosyo. Wala koy laing gihimo kondili magtrabaho, moinom, ug matulog. Daghan tuod kog kuwarta, apan nahibulong ko kay dili gihapon ko malipayon.

KON SA UNSANG PAAGI GIBAG-O SA BIBLIYA ANG AKONG KINABUHI: Sa dihang nagtuon ako sa Bibliya uban sa mga Saksi ni Jehova, natandog kaayo ko sa tulo ka teksto sa Bibliya. Nakahilak ako sa dihang akong nasabtan ang giingon sa Mateo 5:3: “Malipayon kadtong mahunahunaon sa ilang espirituwal nga panginahanglan, sanglit ila ang gingharian sa mga langit.” Gipakita niining tekstoha ang hinungdan kon nganong mibati akog kahaw-ang bisan pag ako nagmalamposon sa akong negosyo ug dinayeg sa akong mga kasosyo. Akong nakat-onan nga ang tinuod nga kalipay mabatonan lamang pinaagi sa pag-una sa espirituwal nga mga butang.

Sa dihang nahugno ang ekonomiya sa Japan, nakita nako diha sa akong mga kauban nga tinuod gayod ang giingon sa 1 Timoteo 6:9: “Sila nga determinadong madato mangahulog sa tentasyon ug sa lit-ag ug sa daghang binuang ug makadaot nga mga tinguha, nga nagbanlod sa mga tawo sa kalaglagan ug sa kadaotan.” Mapadapat gayod sa akong kahimtang ang giingon ni Jesus sa Mateo 6:24: “Dili kamo mahimong ulipon sa Diyos ug sa Bahandi.” Tungod niini, mihimo kog mga kausaban sa akong kinabuhi.

Akong naamgohan nga napasagdan nako ang akong mga ginikanan, ang akong bana, ug ang akong mga anak. Namatikdan usab nako nga nakaugmad kog dili maayong mga kinaiya. Nahimo kong arogante. Wala koy pailob sa mga tawo ug dali ra kong masuko. Sa sinugdan, nagtuo ko nga imposible na para nako nga magbag-o ug mahimong usa ka Kristohanon. Apan, gimahal gayod nako ang akong mga anak ug sa dihang gipadapat na nako ang mga tambag sa Bibliya bahin sa pagtratar sa akong pamilya, maayo kaayo ang epekto niini diha kanila. Migugol kog mas daghang panahon uban nila ug ako silang dad-on sa mga tigom.

MGA KAAYOHAN NGA AKONG NABATONAN: Mibati akog tinuod nga kalipay ug katagbawan sa pagkahibalo sa katuyoan sa kinabuhi ug sa pag-alagad sa Diyos uban ang tinguha nga pahimut-an siya. Wala na nako ibaylo sa trabaho ang akong pamilya, ug aduna na koy pagtahod sa akong kaugalingon.

Nakita ni Mama ang mga kausaban sa akong kinaiya sa dihang akong gipadapat ang mga prinsipyo sa Bibliya, maong siya nagtuon usab sa Bibliya ug nahimong usa ka Kristohanon. Kami ni Mama nalipay kay wala ra mosupak kanamo si Papa ug ang akong bana. Mas nasuod pa ako sa akong mga anak, ug nagmalipayon gayod kami ingong pamilya.

NGALAN: MIKHAIL ZUYEV

EDAD: 51

NASOD: RUSYA

KANIADTO: NAMALIGYAG ILEGAL NGA ARMAS

 KAAGI: Nagpuyo ko sa Krasnogorsk. Lunhaw kaayo ang among palibot. Ang among lungsod duol sa Suba sa Moscow nga nagaagos pahabagatan. Ang mga dapit sa kasadpan ug amihanan sa among lungsod gilibotag mga kakahoyan.

Sa bata pa ko, ganahan kaayo kong makigsinumbagay ug hilig sab kog armas. Migugol kog daghang panahon sa pagpaugnat sa kusog. Naghimo sab kog ilegal nga mga pusil, bala, ug mga kutsilyo. Sa ngadtongadto, gihimo nako ning panginabuhi. Maayo kaayo kong mopalakaw sa akong negosyo ug daghan kog suki nga mga kriminal.

KON SA UNSANG PAAGI GIBAG-O SA BIBLIYA ANG AKONG KINABUHI: Sa sayong bahin sa 1990, akong nahibalag ang mga Saksi ni Jehova. Apan sa sinugdan, wala koy salig kanila kay daghan kaayo silag pangutana kanako.

Usa ka adlaw niana, dihay usa ka Saksi nga nagbasa kanako sa Roma 14:12: “Ang matag usa kanato manubag alang sa iyang kaugalingon ngadto sa Diyos.” Wa ko mahibalo kon unsay akong isulti sa Diyos kon ako moatubang na kaniya. Kini nga teksto nagdasig kanako aron susihon kon unsay gikinahanglan sa Diyos kanako.

Naningkamot gayod ako sa pagpadapat sa tambag sa Bibliya nga mabasa sa Colosas 3:5-10: “Patya ang inyong mga sangkap sa lawas nga anaa sa yuta maylabot sa pakighilawas, kahugawan, seksuwal nga gana, makadaot nga tinguha, ug hakog nga pangibog, nga maoy idolatriya. Tungod sa maong mga butang ang kapungot sa Diyos moabot. . . . Isalikway gayod kining tanan gikan kaninyo, kapungot, kasuko, pagkadaotan, mapasipalahong sinultihan, ug malaw-ayng pulong gikan sa inyong baba. Ayaw pagbinakakay sa usag usa. Hukasa ang daang pagkatawo uban ang mga buhat niini, ug isul-ob ang bag-ong pagkatawo.”

Nalisdan gayod ako sa paghimo sa maong mga kausaban. Magsigeg pamugos ang akong mga suki kaniadto nga mopalit silag armas. Naglisod sab ko sa pagpugong sa akong kaugalingon kon dunay manginsulto kanako. Bisan pa niana, giguba nako ang tanan nakong armas. Akong nakat-onan nga gihigugma ko sa Diyos ug ni Kristo. Busa, natukmod usab ako sa paghigugma kanila. Nagpadayon ako sa akong personal nga pagtuon sa Bibliya ug sa pagtambong sa mga tigom sa kongregasyon sa among dapit. Kanunay sab kong mag-ampo aron sa pagpangayog tabang sa Diyos.

MGA KAAYOHAN NGA AKONG NABATONAN: Sa ngadtongadto, uban sa dakong paningkamot ug sa tabang sa akong Kristohanong mga igsoon, nausab ang akong personalidad. Dako ang akong kalipay sa pagkakat-on nga si Jehova nga Diyos may pagtagad gayod kanato, bisan niadtong mga nangamatay. (Buhat 24:15) Gipabilhan gayod nako ang pagkasinsero ug pagkamatinud-anon sa mga Saksi ni Jehova. Mapasalamaton ako sa ilang gipakita nga tiunayng interes kanako ug nakadayeg usab ako sa ilang pagkamaunongon sa Diyos.

Sa sinugdan, ang ubang membro sa among pamilya ug ang pipila sa akong mga higala supak sa akong bag-ong tinuohan. Apan nahunahuna ra nila nga mas maayo ning akong ginabuhat karon kay sa magpadayon ko sa paghimog krimen. Malipayon gyod ko nga wala na ko mamaligyag armas ug karon akong gigamit ang akong kinabuhi sa pagtudlo sa uban bahin sa Diyos sa kalinaw.

[Hulagway sa panid 27]

Aron dili kaayo ko tulisokon sa akong konsensiya, moapil ko sa relihiyosong mga seremonyas

[Hulagway sa panid 28]

Daghan kog kuwarta apan dili gyod ko malipayon