Taudtaod na ang inyong relasyon, pero morag nagduhaduha na ka. Ipadayon pa ba ninyo ni o dili na? Kini nga artikulo makatabang nimo nga makadesisyon.

Niining artikuloha

•  Kon nagduhaduha ka

•  Dihang maghimog desisyon

•  Kon makadesisyon ka nga makigbulag

 Ang managtrato nga bag-o pang nagdeyt maghunahuna nga parehas kaayo sila, pero kadugayan makita seguro nila nga dili diay. Pananglitan:

•   Ang usa ganahang mag-swimming; ang usa ganahang mag-hiking.

•   Ang usa estoryador; ang usa hilomon.

•   Ang usa magsigeg pangilad; ang usa kanunayng matinud-anon.

 Matikdi nga lahi ang matag situwasyon. Ang una lahi silag gusto; ang ikaduha lahi silag kinaiya; ang ikatulo lahi silag prinsipyo.

 Hunahunaa: Asa aning tulo ang malisdan kaayo kag adjust kon magminyo na mo? Asa pod ani ang makaya ra ninyog adjust?

 Ang magtiayon nga lainlaig gusto o kinaiya puwede gihapong magmalipayon. Dili man god kinahanglan nga parehas gyod sila aron magkasinabot. Sa ubang kahimtang, ang bana ug asawa makakat-on ra nga maganahan sa kon unsay gusto sa iyang kapikas, o magkasinabot pa gani bisag lainlain silag kinaiya. a

 Pero importante kaayo nga parehas mog prinsipyo—ang inyong gituohan bahin sa relihiyon, sukdanan sa moral, ug kon unsay husto ug sayop. Kon dili mo parehas ug prinsipyo, klaro nang ilhanan nga basig kinahanglan mong magbulag.

 Pananglitan, konsideraha ang kahimtang sa magtiayon nga dili parehas ug relihiyon. Ang libro nga Fighting for Your Marriage nag-ingon: “Gipakita sa research nga ang mga magtiayon nga dili parehas ug relihiyon mas dakog purohan nga magdiborsiyo.”

 Prinsipyo sa Bibliya: “Ayaw kamo pagpakighiusa uban sa dili magtutuo.”—2 Corinto 6:14, Ang Biblia, 2011.

 Ang Bibliya nag-ingon nga kadtong magminyo “makaagom ug kasakitan.” (1 Corinto 7:28) Maong ayawg katingala kon nakaeksperyensiya na mog ingon ana nga mga problema samtang managtrato pa mo.

 Kon naa moy ginagmayng mga dili pagsinabtanay, wala na magpasabot nga magbulag na gyod mo. Pero ang pangutana, Kaya ra ba ninyo ning sulbaron nga dili ra maglalis o mag-away? Importante na labina kon magminyo na mo.

 Prinsipyo sa Bibliya: “Magpakita mog kaayo sa usag usa, magmabination, kinasingkasing nga magpasaylo sa usag usa.”—Efeso 4:32.

 Pero kon grabe o magsige na mog lalis, basin nagpasabot na nga dili gyod kamo ang para sa usag usa kay dili man mo magkasinabot. Kon mao nay kahimtang, mas maayo nga mahibalo na mo daan kay sa dihang minyo na mo.

 Ang punto: Kon naa kay grabeng mga pagduhaduha sa imong trato o kon andam na ba gyod ka nga magminyo, ayaw nig balewalaa!

 Prinsipyo sa Bibliya: “Ang tawong maalamon makakita sa kapeligrohan ug molikay niana, pero ang walay kasinatian moderetso ra ug mag-antos sa resulta.”—Proverbio 22:3.

 Sakit gyod nang magbulag. Pero kon ikaw o kamong duha naay grabeng mga pagduhaduha bahin sa inyong relasyon, basin mas maayo nga magbulag na lang mo.

 Unsaon nimo na paghimo? Kon posible, ayawg pakigbulag pinaagig text o email. Mas maayong makig-estorya gyod ka niya ug sabotan ninyo kon asa ug kanus-a ninyo ni hisgotan.

 Prinsipyo sa Bibliya: “Sulti mog tinuod sa usag usa.”—Zacarias 8:16.

 Kon nagbulag mo, wala na magpasabot nga naa kay nahimong sayop. Hinumdomi nga ang pagpakigdeyt makatabang nimo nga makahimog desisyon—kon magminyo ba mo o magbulag. Bisag nagbulag mo, makakat-on gihapon kag importanteng mga leksiyon sa maong eksperyensiya.

 Pangutan-a ang imong kaugalingon: ‘Unsay nakat-onan nako niini nga relasyon? Nakatabang ba ni nako nga makita ang mga kinahanglan nakong bag-ohon sa akong kaugalingon? Unsay puwede nakong himoon sa sunod kon makigdeyt ko pag-usab?’