?Bambae yu mekem wanem taem wan samting olsem i hapen?

1.   Tija i tok strong long yu from yu stap pleplei long taem blong klas.

    ?Bambae yu talem sore long tija, nating sipos yu ting se hem i bitim mak?

2.   Wan fren i faenemaot se yu talem wan samting long saed blong hem we i no kaen.

    ?Bambae yu talem sore long fren blong yu, nating se samting we yu talem i tru?

3.   Yu kros long papa blong yu mo yu tok long hem long fasin we i no soem respek.

    ?Bambae yu talem sore long papa blong yu, nating se yu harem se samting we i hapen i fol blong hem?

 Ansa blong trifala kwestin ya, hem i yes. ?Be from wanem yu mas talem se “mi mi sore,” nating se yu harem se yu gat gudfala risen blong mekem samting we yu mekem?

•  ?From wanem yu mas talem sore?

•  ?Olsem wanem blong talem se “mi mi sore”?

•  Sam yangfala oli talem wanem

•   Taem yu talem sore yu soemaot se yu bigman long tingting. Taem yu tekem aksen blong talem sore from samting we yu talem o mekem, yu stap wokem wan impoten fasin we bambae yu nidim taem yu kam bigman.

   “Tingting daon mo longfala tingting i save givhan long yumi blong talem sore, mo lesin long samting we narafala i wantem talem.”—Rachel.

•   Taem yu talem sore yu soemaot se yu wantem mekem pis. Ol man we oli talem se “mi mi sore” oli soemaot se oli tingbaot moa blong mekem pis i bitim we oli pruvum olgeta wan se oli mekem i stret mo narafala i mekem i rong.

   “Nating we yu ting se i no fol blong yu, be fasin ya blong mekem pis i mas faswan samting blong mekem. I wan smol samting nomo blong talem se “mi mi sore,” be hemia i save mekem se yu frengud bakegen wetem narafala.”—Miriam.

•   Taem yu talem sore bambae yu harem gud. Taem yu stap harem nogud from samting we yu mekem o talem long narafala, hemia i olsem we yu stap karem wan hevi samting. Be taem yu talem sore, i olsem we hevi samting ya i kamaot long solda blong yu. a

   “I gat samtaem we mi tok strong long papa mo mama blong mi, nao mi harem nogud from, be mi harem se i had blong talem sore. Nating se i olsem, taem mi talem sore, oltaem mi harem gud mo samting ya i mekem se i gat pis long famle.”—Nia.

 ?I had blong talem sore? !Yes! Dena, wan yangfala woman we i mas talem sore plante taem long mama blong hem from we hem i no kaen long mama blong hem, i talem se: “I no isi blong talem se “mi mi sore.” !I olsem se i gat wan lam long trot blong mi, nao i had blong ol toktok i kamaot long maot blong mi!”

•   I gud yu toktok stret long man blong talem sore. Sipos yu toktok fes tu fes long man ya blong talem sore, hemia i givhan long hem blong luk se yu rili sore. Be sipos yu sanem teks mesej long hem, maet bambae hem i ting se yu no rili sore. Nating sipos yu putum ol pija tu we i soem se yu sore, be samting ya bambae i no tajem hat blong man.

   Advaes: Sipos yu no save toktok stret long man, i gud yu ringim hem o yu raetem wan kad long hem. Nomata wanem rod we yu yusum, i gud yu jusum gud ol tok blong yu.

   Advaes blong Baebol: “Gudfala man i tingting gud fastaem, nao biaen i tok.”—Ol Proveb 15:28.

•   Talem sore kwiktaem. Taem yu wet longtaem blong stretem wan trabol, trabol ya bambae i kam bigwan moa, mo bambae yu no moa frengud wetem man ya we yu mekem hem i harem nogud.

   Advaes: Putum wan mak, olsem, ‘bambae mi talem sore tede.’ Putum taem we bambae yu talem sore mo wok folem.

   Advaes blong Baebol: ‘Yu mas go kwiktaem blong luk man, blong yutufala i stretem trabol.’—Matiu 5:25.

•   Soemaot se yu rili sore. !Taem yu talem se “mi sore we yu harem olsem” i no soemaot se yu rili sore! Wan yangfala woman we nem blong hem Janelle i talem se “Man bambae i respektem yu moa taem hem i luk se yu mekem sam samting blong stretem mastik we yu yu mekem.”

   Advaes: Yu mas fogivim narafala long fasin we i stret. Yu no mas talem se, “bambae mi talem sore from samting we mi mekem sipos yu talem sore from samting we yu mekem.”

   Advaes blong Baebol: “I gud yumi traehad long evri rod blong gat pis wetem ol narafala.”—Rom 14:19.