Yes. Baebol we i wan olfala buk we i fulap long waes, i givim ansa long plante impoten kwestin long laef, mo i save givhan long yu blong yu harem gud mo glad. Traem luk sam kwestin we Baebol i ansa long olgeta.

1.   ?I gat wan man we i wokem olgeta samting? Baebol i talem se God i “mekem olgeta samting.” (Revelesen 4:11) Taswe, God i save stret samting we i save mekem yumi harem gud, mo i save mekem se laef blong yumi i gat mining.

2.   ?God i kea long mi? Baebol i no tokbaot se God i wan God we i no wantem save long ol man, nogat. Be hem i talem se: “God ya i no stap longwe nating long yumi evriwan.” (Ol Wok 17:27) Hem i intres long ol samting we oli stap hapen long yu, mo hem i wantem givhan long yu blong yu harem gud long laef.—Aesea 48:17, 18; 1 Pita 5:7.

3.   ?Sipos mi save God, olsem wanem samting ya i save mekem mi harem gud moa? God i wokem yumi long wan fasin we yumi nidim hem, yumi wantem tumas blong save from wanem yumi laef. (Matiu 5:3) Wan man we i haremsave se hem i nidim God, hem i wantem tumas blong save God ya we i wokem yumi, mo i wantem kam fren blong hem. God bambae i glad tumas sipos yu traehad blong save hem, from we Baebol i talem se: “Yufala i mas kam klosap long God, nao hem bambae i kam klosap long yufala.”—Jemes 4:8.

 Plante milian man oli luk se taem oli fren gud wetem God, hemia i mekem se oli glad, mo oli harem gud long laef blong olgeta. Be naoia we yu save God, ?hemia i min se bambae yu no moa kasem trabol? Si, bambae yu kasem trabol yet, be ol advaes blong Baebol oli save givhan long yu, blong yu

•   Gat wan famle we i hapi.

•   Gat pis wetem ol narafala.

•   Winim ol defren problem, olsem tingting we i foldaon, wari from problem blong mane, mo sik.

 Plante jos we oli yusum Baebol, oli no stap folem ol tijing blong hem. Be jos we i tru, hem i folem gud ol samting we Baebol i talem, taswe bambae hem i givhan long yu blong yu save God.