Blong save gud God, yu mas kasem plante save long saed blong hem mo tekem aksen blong mekem hem i glad. Hemia bambae i mekem se God i “kam klosap” long yu. (Jemes 4:8) Baebol i talem se hem “i no stap longwe nating long yumi evriwan.”—Ol Wok 17:27.

•  Samting we yu mas mekem blong save God

•  Sam giaman tingting long saed blong God

 Ridim Baebol

•  Samting we Baebol i talem: “Olgeta tok blong Baebol oli kamaot long God fastaem.”—2 Timoti 3:16.

•  Mining: God i Stamba blong ol tok we ol man oli raetem long Baebol. Hem i putum ol tingting blong hem oli go long tingting blong olgeta. God i yusum spesel buk ya blong soemaot samting we hem i wantem yumi blong mekem. Mo tu, long Baebol, hem i soemaot ol fasin blong hem, olsem lav, stret fasin, mo sore.—Eksodas 34:6; Dutronome 32:4.

•  Samting we yu save mekem: Ridim Baebol evri dei. (Josua 1:8) Tingting dip long ol samting we yu ridim, mo askem se: ‘?Ol save ya i tijim mi se God i gat wanem fasin?’—Ol Sam 77:12.

   Eksampol: Ridim Jeremaea 29:11, nao askem se: ‘?God i wantem se mi gat pis o trabol? ?Hem i givimbak long mi ol rong we mi mi mekem, o hem i wantem se mi gat wan gudfala laef long fiuja?’

 Lukluk kriesen

•  Samting we Baebol i talem: “Stat long taem we God i mekem wol ya, ol samting raonabaot long yumi we hem i wokem, oli soemaot klia ol fasin blong hem we man i no save luk.”—Rom 1:20.

•  Mining: Kriesen i soemaot ol fasin blong God, olsem we wan pija i soemaot plante samting long saed blong man we i droem, mo wan masin i soemaot plante samting long saed blong man we i wokem. Tingbaot bren blong yumi. I had blong kasem save olsem wanem bren i wok, mo hem i save tingbaot fulap samting, hemia i soemaot waes blong God. Mo bigfala paoa blong san mo ol narafala sta i soemaot paoa blong God.—Ol Sam 104:24; Aesea 40:26.

•  Samting we yu save mekem: Tekem taem blong lukluk gud kriesen mo lanem plante samting from. Askem se: ‘?Nambawan disaen blong evri samting we God i wokem, i soemaot wanem long saed blong hem?’ a I tru, kriesen i no soemaot evri samting long saed blong God. Taswe, hem i givim Baebol tu long yumi.

 Yusum nem blong God

•  Samting we Baebol i talem: “Bambae mi protektem hem, from we hem i save nem blong mi. Bambae hem i singaot long mi, mo bambae mi ansa long hem.”—Ol Sam 91:14, 15.

•  Mining: God, we nem blong hem Jehova, i stap lukluk mo lesin gud long olgeta we oli save nem blong hem mo oli yusum wetem respek. b (Ol Sam 83:18; Malakae 3:16) God i talemaot nem blong hem long yumi from we hem i wantem se yumi save hem. Hem i talem se: “Mi mi Jehova. Hemia nem blong mi.”—Aesea 42:8.

•  Samting we yu save mekem: Yusum nem blong Jehova taem yu tokbaot hem.

 Prea long Jehova

•  Samting we Baebol i talem: “Jehova i stap klosap long olgeta we oli stap singaot i go long hem.”—Ol Sam 145:18.

•  Mining: Jehova i kam klosap long olgeta we oli prea long hem wetem bilif. Prea i wan haf blong wosip blong yumi, we i soemaot se yumi gat bigfala respek long God.

•  Samting we yu save mekem: Prea oltaem long God. (1 Tesalonaeka 5:17) Talemaot ol wari mo ol filing blong yu long hem.—Ol Sam 62:8. c

 Mekem bilif long God i kam strong moa

•  Samting we Baebol i talem: “Sipos man i no bilif, i no posibol blong hem i mekem God i glad.”—Hibru 11:6.

•  Mining: Blong kam klosap long God, yumi mas bilif long hem. Taem Baebol i tokbaot bilif, hem i no minim nomo se yumi bilif we God i stap. Be i minim tu se yumi trastem hem fulwan, mo yumi trastem ol promes mo ol rul blong hem. Blong kam fren blong hem, yumi mas trastem hem.

•  Samting we yu save mekem: Strong bilif i stanap long ol save. (Rom 10:17) Taswe yu mas stadi long Baebol mo pruvum long yu wan se yu save trastem God mo ol advaes blong hem. Ol Witnes blong Jehova bambae oli glad blong stadi Baebol wetem yu. d

 Mekem samting we God i glad long hem

•  Samting we Baebol i talem: “Taem yumi lavem God, hemia i min se yumi stap obei long ol komanmen blong hem.”—1 Jon 5:3.

•  Mining: Jehova i stap klosap long olgeta we oli soemaot se oli lavem hem, taem oli mekem bes blong olgeta blong obei long ol komanmen blong hem.

•  Samting we yu save mekem: Taem yu stap stadi long Baebol, makem samting we God i laekem mo samting we hem i no laekem. Askem se: ‘?Mi mas jenisim wanem samting blong mekem God i glad?’—1 Tesalonaeka 4:1.

 Sipos yumi folem advaes blong God, bambae yumi luk olsem wanem hem i kea long yumi

•  Samting we Baebol i talem: “Long olgeta samting long laef blong yu, bambae yu luk se God i gud.”—Ol Sam 34:8, The Bible in Basic English.

•  Mining: God i askem long yu, blong yu wan yu luksave se hem i gud. Taem yu luk se hem i lavem yu mo i givhan long yu, bambae yu wantem kam klosap moa long hem.

•  Samting we yu save mekem: Taem yu ridim Baebol mo folem ol advaes we God i givim, bambae yu luk se i givhan bigwan long yu. (Aesea 48:17, 18) Mo tu, yu save luk eksampol blong samfala we God i givhan long olgeta, nao oli winim ol bigfala problem, mekem laef blong olgeta mo laef blong famle i kamgud moa, mo oli faenem trufala glad. e

 Giaman tingting: Yumi no naf blong save God, from we ol samting long saed blong hem oli haed.

 Trutok: I tru, i gat sam samting long saed blong God we i had blong kasem save long olgeta, olsem God i wan Spirit we yumi no save luk hem. Nating se i olsem, yumi naf blong save God. Blong talem stret, Baebol i talem se yumi mas save hem, sipos yumi wantem kasem laef we i no save finis. (Jon 17:3) Baebol i yusum ol tok we yumi naf blong kasem save long hem, blong tokbaot Krieta blong yumi, ol fasin blong hem, stamba tingting we hem i gat long ol man mo wol ya, mo ol loa blong hem. (Aesea 45:18, 19; 1 Timoti 2:4) Mo olsem yumi tokbaot finis, Baebol i talemaot nem blong God. (Ol Sam 83:18) Taswe yumi naf blong save God, mo tu, blong kam klosap long hem.—Jemes 4:8.