?I Gat Rod Blong Harem Gud?

“Fasin blong harem gud i mekem puaman i kam rij; fasin blong harem nogud i mekem rijman i kam pua.”—Benjamin Franklin.

PLANTE man oli luksave se tok ya i tru tumas, taem oli kasem save se man i no save pem fasin ya blong harem gud. !I tru nomo se, i no isi nating blong holem tingting ya blong harem gud, from we wol ya i pulum man blong wantem gat plante samting, kasem haenem, mo blong gat wan laef we i sem mak long ol narafala! ?Olsem wanem? ?Ol samting we oli kam biaen oli gat paoa long tingting blong yu?

• Ol man we oli mekem plante toktok blong salem ol samting oli pulum yu blong tingting se, yu save harem gud sipos yu pem plante moa samting.

• Fasin blong traem winim narafala long wok no long skul i pulum yu blong ting se yu save harem gud nomo, sipos yu naf blong mekem samting olsem ol narafala oli mekem.

• Ol man oli no talem tangkiu long yu from ol samting we yu mekem blong givhan long olgeta.

• Ol fren oli pulum yu blong wantem ol samting we olgeta oli gat.

• Yu no kasem ansa blong ol bigfala kwestin we yu gat long saed blong laef.

Sipos yu kasem sam trabol long laef, ?i gat rod yet blong yu harem gud? Aposol Pol i tokbaot rod blong harem gud oltaem. Samtaem hem i gat plante samting mo samtaem, hem i no gat. Ol fren blong hem oli laekem hem be sam narafala man oli jikim hem. Nating se i olsem, hem i talem se, ‘long wanem rod we hem i stap long hem, hem i lanem blong stap gud nomo.’—Mifala nomo i jenisim raeting ya; Filipae 4:11, 12.

Maet ol man we oli neva traehad blong harem gud, oli ting se i no gat rod. Be Pol i talem se, man i save lanem fasin ya. Naoia bambae yumi tokbaot faef stamba rod we Tok blong God, Baebol, i soemaot, blong yumi save harem gud.