Leta i go long Filipae 4:1-23
4 Taswe ol brata blong mi, mi mi lavem yufala mo mi wantem tumas blong luk yufala. Yufala i mekem mi mi glad, mo yufala i olsem praes we mi mi wok had blong kasem.+ Ol gudfala fren blong mi, olsem we mi talem finis, hemia nao rod blong yufala i stanap strong+ olsem ol man blong Masta.
2 Mi talem strong long yu Yuodia, mo long yu Sintike, se yutufala i mas gat wan tingting nomo from we yutufala i joen long Masta.+
3 Yes, mo mi askem long yu tu we yu stap mekem sem wok olsem mi,* blong yu givhan long tufala woman ya we tufala i wok had* wetem mi long wok blong gud nius, wetem Klemen mo ol narafala we oli stap mekem sem wok olsem mi. Nem blong olgeta i stap long buk blong laef.+
4 Oltaem yufala i mas glad from Masta. Mi talem bakegen se: !Yufala i mas glad!+
5 Yufala i mas soemaot long olgeta man se yufala i no stap mekem i strong tumas long ol narafala.+ Masta i stap klosap nomo.
6 Yufala i no mas wari tumas from eni samting,+ be yufala i mas askem olgeta samting we yufala i wantem long God. Yufala i mas prea long hem, yufala i mas krae i go long hem, mo yufala i mas talem tangkiu long hem,+
7 nao tru long Kraes Jisas, pis ya+ blong God we i bigwan tumas i bitim olgeta save blong yumi, bambae i lukaot gud long hat+ mo tingting* blong yufala.
8 Ol brata, hemia las tok blong mi. Yufala i mas gohed blong tingting* long olgeta samting we oli tru, olgeta samting we oli impoten, olgeta samting we oli stret, olgeta samting we oli klin, olgeta samting we i mekem man i gat lav, olgeta samting we i stret blong yumi leftemap, olgeta samting we oli gud, mo olgeta samting we God bambae i glad long olgeta.+
9 Yufala i mas mekem olgeta samting we yufala i lanem mo yufala i akseptem, mo olgeta samting we yufala i harem mo yufala i luk long mi.+ Nao God ya blong pis bambae i stap wetem yufala.
10 From we mi mi joen long Masta, mi mi glad tumas we naoia yufala i stap tingbaot mi bakegen.+ Fastaem yufala i stap tingbaot mi, be yufala i no gat janis blong soemaot samting ya.
11 Mi mi no tok olsem from we mi sot long sam samting, nogat. Mi mi lanem finis blong harem gud nomo long wanem samting we mi gat, nomata se laef blong mi i olsem wanem.+
12 Mi mi save olsem wanem blong laef wetem smol samting nomo,+ mo olsem wanem blong laef wetem plante samting. Mi mi lanem finis sikret ya blong harem gud long evri samting mo eni samting we i hapen long laef, nomata se mi mi fulap gud o mi hanggri, mo nomata se mi gat plante samting o mi no gat samting nating.
13 Mi mi gat paoa blong fesem olgeta samting from God* ya we i givim paoa long mi.+
14 Be yufala i mekem i gud tumas long mi taem yufala i givhan long mi long ol trabol blong mi.
15 Yufala ol man Filipae, yufala tu i savegud se taem mi aot long Masedonia, hemia afta we yufala i jes lanem gud nius, i no gat wan narafala kongregesen i joen wetem mi blong givim sam samting mo kasem sam samting, be yufala nomo i mekem olsem.+
16 Taem mi stap long Tesalonaeka, yufala i sanem sam samting we mi mi nidim, i no wan taem nomo, be tu taem.
17 Hemia i no min se mi mi wantem kasem presen, nogat. Be mi wantem se ol gudfala wok blong yufala oli mekem se yufala i kam rij* moa.
18 Mi mi gat evri samting we mi nidim mo mi gat plante moa. Mi mi kasem ol samting ya long Epafrodaetas+ we yufala i sanem i kam, mekem se naoia mi mi no moa sot long wan samting. Samting we yufala i sanem, hem i olsem senta we smel blong hem i naes,+ mo wan sakrefaes we God i glad long hem.
19 Nao from samting ya, God blong mi we i gat plante gudgudfala samting, bambae i yusum Kraes Jisas blong givim olgeta samting we yufala i nidim.+
20 Bambae yumi givim glori long God ya we i Papa blong yumi gogo i no save finis. Amen.
21 Yufala i pasem halo blong mi long olgeta tabu man we oli joen long Kraes Jisas. Ol brata we oli stap wetem mi, olgeta tu oli talem halo long yufala.
22 Olgeta tabu man, speseli olgeta we oli stap long haos blong Sisa,+ oli talem halo long yufala.
23 Prea blong mi se Masta Jisas Kraes i gohed blong kaen long yufala, taem yufala i stap soemaot ol gudfala fasin.
Ol futnot
^ PT: “we yu prapa man we i joen wetem mi blong karem yok.”
^ NT: “faet strong.”
^ NT: “maen.”
^ NT: “tingbaot o tingting dip.”
^ PT: “man.”
^ NT: “oli mekem se mane blong yufala long bang i kam plante.”
