I impoten blong hasban mo waef i soemaot se tufala i glad long tufala, mo samting ya i save mekem tufala i harem gud oltaem. Be plante hasban mo waef, oli no moa mekem olsem. Long buk ya Emotional Infidelity, wan man we i stap givim advaes long ol mared man mo woman, i luk se plante hasban mo waef “oli wari moa long ol samting we i no stap hapen long mared blong olgeta, i bitim ol samting we oli stap hapen.” Taem oli go luk hem long ofis, oli tokbaot ol samting we oli mas jenisim, be i no ol samting we oli mas gohed blong mekem. “Taswe mastik we ol hasban mo waef ya oli mekem, hemia se oli no stap talem ol gudfala toktok long olgeta blong soemaot se oli lavem olgeta.”

?Olsem wanem hasban mo waef i save blokem problem ya?

Mared i save stap gud, taem yu mekem sam samting blong soemaot se yu glad. Taem hasban mo waef i traehad blong luksave ol gudfala fasin blong tufala, mo tufala i talem ol gudfala toktok long tufala, bambae tufala i save joen gud moa. Mo taem i gat sam problem long mared, tufala i save winim from we tufala i soemaot se tufala i glad long tufala.

Ol waef. Buk ya Emotional Infidelity i talem se: “Plante woman oli no luksave bigfala wok we hasban blong olgeta i stap mekem blong lukaot long famle.” Mo tingting ya i stap tu long ol ples we hasban mo waef tugeta i wok blong kasem mane.

Ol hasban. Plante taem ol man oli ting nating long wok we ol woman oli traehad blong mekem blong lukaotgud long famle, maet oli wok blong kasem mane, oli lukaot long pikinini, no oli mekem ol wok long haos. Fiona * we i mared blong tri yia finis, i talem se: “Yumi evriwan i save mestem, mo taem mi mestem smol, mi harem nogud tumas. Be taem hasban blong mi i talem gudfala toktok from samting we mi mekem long haos, mi luksave se hem i lavem mi yet. !Mo tu, mi luk se hem i stap sapotem mi nao mi harem gud tumas!”

Be taem hasban mo waef i ting nating long tufala, hemia i save mekem problem long mared. Wan waef we nem blong hem Valeri, i talem se: “Taem hasban blong yu i no soemaot se i glad long yu, i isi nomo blong yu laekem wan narafala man.”

Luksave ol gudfala samting we hasban o waef i mekem. Long wik we i stap kam, i gud yu luksave sam gudfala fasin we hasban o waef blong yu i mekem. Mo tu, yu traem luksave ol samting we hem i stap mekem oltaem blong famle i harem gud. Hemia ol samting we maet bifo yu stap ting nating long olgeta. Long en blong wik, i gud yu mekem wan lis blong (1) ol gudfala fasin blong hem mo (2) ol samting we hem i mekem blong halpem famle.—Rul blong Baebol: Filipae 4:8.

?From wanem i impoten we yu luksave ol samting ya? Wan waef we nem blong hem Erika, i talem se: “Taem yu mared, afta we sam yia i pas, yu save stat blong ting nating long hasban o waef blong yu. Yu no moa luksave ol gudfala samting we hem i mekem, be yu stap lukluk moa ol samting we hem i no stap mekem.”

Tingbaot kwestin ya: ‘?Mi mi ting nating long ol wok we hasban no waef blong mi i mekem?’ Eksampol, sipos hasban i fiksimap sam samting long haos, ?bambae yu yu talem gudfala toktok long hem, o bambae yu ting se hemia wok we hem i mas mekem? Sipos yu wan hasban, ?bambae yu talem gudfala toktok long waef blong yu from we hem i stap lukaot long ol pikinini, o bambae yu ting se hemia wok we hem i mas mekem? I gud yu luksave ol gudfala samting we hasban no waef i mekem, blong givhan long famle blong yutufala. Mo i gud yu glad long olgeta samting we hasban no waef i mekem, nating se i smol o i bigwan.—Rul blong Baebol Rom 12:10.

Talem ol gudfala toktok oltaem long yutufala. Baebol i talem se oltaem yufala i mas “talem tangkiu.” (Kolosi 3:15) Taswe i gud we yu traehad blong talem tangkiu long hasban o waef blong yu oltaem. Jemes we i wan hasban, i talem se: “Taem waef blong mi i talem gudfala toktok long mi from ol samting we mi mekem, hemia i pusum mi blong mi wantem traehad moa blong kam wan gudfala hasban mo mi traehad blong mekem mared blong mitufala i kam strong.”—Rul blong Baebol: Kolosi 4:6.

Hasban mo waef we i talem gudfala toktok long tufala, tufala i save fren gud moa. Maekel we i wan hasban, i talem se: “Mi mi ting se plante mared oli save stap gud, sipos hasban mo waef i tingbaot ol gudfala fasin blong tufala. Sipos tufala i mekem olsem, taem i gat trabol, mared blong tufala i no save brok kwik.”