Ba Delphine abo tulandilepo mu cipande cifumineko, balemona kwati amafya balekwata e yalelenga balenwa sana ubwalwa. Baibolo tayakanya ukunwa ubwalwa mu kulinga, lelo ilanda ukuti: “Wiba pa banwensha umwangashi.” (Amapinda 23:20) Ilingi abanwesha ubwalwa balalwala amalwele yabipisha, balakwata amafya mu lupwa, balapusana ne fibusa kabili abengi balafwa bwangu. Aya amafya kuti yacepako nga ca kuti abantu balekonka ifyo Baibolo ilanda.

Ba Delphine nabo balimona ukuti aya amashiwi ya cine. Pali ino nshita batila: “Naishileishiba ukuti ubwalwa tabupwisha amafya. Natendeke ukukonka ifyo Baibolo ilanda pa Abena Filipi 4:6, 7 apatila: ‘Mwisakamikwa nangu kamo, lelo . . . lekeni ifyo mulelomba fishibikwe kuli Lesa.’ Lyonse ubushiku nga natendeka ukutontonkanya pa mafya, nalelomba ukuti Yehova angafwe. Nalemweba fyonse ifyo naleumfwa, nampo nga ninkalipa, ningumfwa ububi nelyo ndi no bulanda, kabili nalemulomba ukuti angafwe ukwishiba ifyo ningacita pa kuti ndeumfwako bwino. Nga bwaca, naleesha ukuleka ukutontonkanya pali fyonse ifyalensakamika. Ukulapepa lyonse kuli Yehova nga naumfwa ububi, kwalingafwile ukulatontonkanya pa fyo nakwete ukucila ukutontonkanya pa fyo nshakwete. Nalilekele ukunwa ubwalwa kabili apo naleumfwa bwino sana nga napepa, nshalefwaya ukuleka ukumfwa ifi.”

Ukucita ubulalelale kulalenga umuntu aba sana no bulanda ukucila ifyo engomfwa nga ali na mafya yambi. Na lyo line, amashiwi yaba mu Baibolo kuti yatwafwa ukwishiba ifyo twingacita pa kuicingilila ku fingalenga twacita ubulalelale, pamo nga ukusengasenga no kutamba ifye shiku. Samuel atile: “Calyanguka ukusengasenga. Inshita shimo umukashana nga alenkumbwa lelo nshimutemenwe, naleishiba kabili naleumfwa bwino ukumusengasenga.” Ilingi line abantu baleeba Samuel ukuti alitemenwe ukusengasenga nangu ca kuti talesengasenga, ne ci calelenga atendeka ukusengasenga. Lelo ifyo alecita fyalengele aleumfwa ububi. Atile: “ukucita ifi kwalibipa pantu kulalenga umuntu alacita fye ifya kuisekesha.”

Samuel alibelengele icipande ca bacaice icaba pa jw.org, kabili atontonkenye pa mashiwi yaba pa Amapinda 20:11 apatila: “Umulumendo eshibikilwa ku micitile yakwe nga ca kuti imilimo yakwe isuma kabili yalilungama.” Bushe aya mashiwi yamwafwile shani? Samuel aishileishiba ukuti ukusengasenga kwalibipa. Pali ino nshita atila: “Nalisambilile no kuti uwacaice nga alesengasenga, alaba ne mibele iilenga afilwa ukwisaba umulume nelyo umukashi umusuma. Natendeke ukutontonkanya pa fyo umukashi ningopa engalaumfwa nga amona ndesengasenga umwanakashi umbi. Ukutontonkanya ifi kwalengele naishiba ukuti ifyo nalecita fyalibipile. Te kuti tutile ukusengasenga kwaliba bwino pa mulandu fye wa kuti kwalyanguka.” Samuel alyalwike kabili ukuleka ukusengasenga kwalimwafwa ukukanacita ubulalelale.

Nangu ca kuti ukusengasenga kuti kwalenga umuntu acita ubulalelale, ifyo ba Antonio balecita fyalicilanapo. Balitemenwe ukutamba ifye shiku. Nangu ca kuti balyupile umwanakashi uo batemenwe sana, ilingi line balebwekeshapo ukutamba ifye shiku. Balandile ukuti ukutontonkanya pa mashiwi yaba pali 1 Petro 5:8 kwalibafwile sana. Ili ilembo litila: “Beni abalola, cenjeleni. Umulwani wenu, Satana Kaseebanya, endauka nge nkalamo iilebuluma, iilefwaya untu ingalya.” Ba Antonio batile: “Ifye shiku fyaba fye mpanga yonse muli cino calo, kabili tafifuma mu mutwe umuntu nga afitamba. Ili ilembo lyalingafwile ukutontonkanya pa cilenga ndetamba ifye shiku. Nalingile ukulailuka bwangu nga nafimona fye ukuti filefuma kuli Satana. Nomba nalishiba ukuti ni Yehova fye e wingangafwa ukuba ‘uwacenjela kabili uwalola’ pa kuti ningaleka ukutontonkanya pali ifi fintu na pa kukwata icupo icisuma.” Baibolo yalyafwile ba Antonio kabili pali ino nshita balyaluka. Ici calilenga baicingilila ku mafya na yambi ayakalamba.

Ukwabula no kupita mu mbali, Baibolo ilatusambilisha ifya kucita pa kuicingilila ku mafya ayakalamba. Nomba kuti twacita shani nga ca kuti ubwafya bwalitendeka kale kabili bulekokola ukupwa? Lekeni tumone ifyo Icebo ca kwa Lesa cingatwafwa ukupwisha amafya ya musango uyu.