Abena Roma 3:1-31
3 Bushe ni mwi kanshi umo abaYuda+ bacilila abena fyalo, atemwa busuma nshi ubwa kusembululwa?+
2 Balibacila fye umwingi nga nshi kabili umwalekanalekana. Ica ntanshi cena ca kuti abaYuda e bo baseekeshe ifyebo fya mushilo ifya kwa Lesa.+
3 Nga, kanshi, umulandu ubelele pi? Nga bamo tabatetekele,+ bushe napamo ukukanatetekela kwabo kukalenga Lesa ukuba uwa bufi?+
4 Nakalya! Nangu abantu bonse bengaba aba bufi,+ Lesa ena alanda icine,+ nga filya calembwa ati: “Mulalungika mu fyo mulanda kabili tamwakasangwe no mulandu ilyo balemulubulwisha.”+
5 Lelo, ngo kukanalungama kwesu kwasokolola ubulungami+ bwa kwa Lesa, tutile shani? Bushe Lesa nga akalipa kuti twatila wa lufyengo?+ (Ndelanda nge filanda fye umuntu+ onse.)
6 Nakalya! Acibe fyo, ninshi Lesa akapingula shani icalo?+
7 Lelo nga ca kuti ubufi bwandi bwalenga icine ca kwa Lesa+ ukwishibikwa sana no kumuletela ubukata, mulandu nshi na lyo line balempingwila ukuti ndi mubembu?+
8 Kanshi natusose filya fine abantu batubepesha+ kabili filya fine bamo balanda ati tutila ati: “Natulecita ifyabipa pa kuti mulefuma ifisuma.”+ Ubupingushi+ aba bantu bakapingulwa bwalilungama.+
9 Nga tutile shani? Bushe twalibacila?+ Nakalya! Pantu natushininkisha kale ukuti abaYuda pamo pene na baGriki bonse babembu;+
10 nga filya calembwa ati: “Takuli uwalungama, takuli fye nangu umo;+
11 takuli uwashilimuka, takuli no ulefwaya Lesa.+
12 Abantu bonse nabapaatuka, bonse nabasanguka ifinangwa; takuli uuli ne cikuuku, takuli nangu fye umo.”+
13 “Utunwa twabo ni nindi iyacenama, kabili ku ndimi shabo e ko bacitila ubucenjeshi.”+ “Mu milomo yabo mwaba ubusungu bwa nsoka.”+
14 “Kabili akanwa kabo kaisulamo fye ukutiipa na mashiwi yabipa.”+
15 “Amakasa yabo yabutukila ku kusumya umulopa.”+
16 “Mu nshila shabo mwaba ubonaushi no bulanda,+
17 kabili tabaishiba inshila ya mutende.”+
18 “Tabatiina Lesa.”+
19 Lelo ifwe twalishiba ukuti fyonse ifyo Amafunde+ yasosa, yeba abali mu Mafunde, pa kuti beba no mwa kubepesha+ kabili pa kutila bonse aba muli ici calo bakalinge+ ukukandwa kuli Lesa.+
20 E ico pa ntanshi yakwe, umuntu nangu umo takalungamikilwe+ pa kusunga amafunde, pantu ukwishiba amafunde+ e kwishiba bwino ulubembu.+
21 Lelo nomba Lesa nasokolola ubulungami+ bwakwe ukwabula amafunde, nge fyo amabuuku ya Mafunde+ na ya bakasesema+ yasosa.+
22 Bonse abatetekela+ Yesu Kristu,+ kuli Lesa ninshi balilungama. Pantu Lesa taba na kapaatulula.+
23 Pantu bonse babembu+ kabili balifilwa ukufika pa bukata bwa kwa Lesa,+
24 kabili ni ku luse+ fye balelungamikilwa ku cikuuku+ cakwe mu cilubula+ ca kwa Kristu Yesu.
25 Lesa apeele Kristu ukuba ilambo lya kufutilako+ imembu sha baletetekela mu mulopa wakwe.+ Ici cali pa kuti alange ubulungami bwakwe, pantu Lesa aeleele imembu+ ishacitilwe kale ilyo aleshishimisha.+
26 Lelo pali nomba alefwaya ukulanga ubulungami+ bwakwe, pa kuti abe uwalungama ilyo alelungamika+ uwaba ne citetekelo muli Yesu.
27 Nga kanshi ukutakisha kuli kwi?+ Nakwisalilwa ku nse. Kwi funde nshi?+ Bushe ni kwi funde lya milimo?+ Awe iyo, lelo kwi funde lya citetekelo.+
28 Pantu tuleti umuntu alungamikilwa ku citetekelo ukwabula imilimo ya mafunde.+
29 Nelyo Lesa bushe ni Lesa wa baYuda beka fye?+ Bushe te Lesa wa bena fyalo na bo bene?+ Cine cine, ni Lesa wa bena fyalo na bo bene,+
30 apo ni Lesa umo,+ uukalungamika abasembululwa+ ku citetekelo cabo no kulungamika abashasembululwa+ ku citetekelo cabo.
31 E ico, bushe tulenasha amafunde ku citetekelo cesu?+ Nakalya! Lelo tuleyakosha.+
