Abena Roma 15:1-33
15 Awe, ifwe fwe bakosa tufwile ukwafwa abanaka+ mu kunaka kwabo, kabili twilacita ifya kutuwamina fye.+
2 Ifwe umo umo tufwile ukucitila abanensu ifingabakuula.+
3 Pantu nangu fye ni Kristu talecita fye ifyalemuwamina;+ lelo filya calembwa ati: “Umuseebanya wa bamuseebanya waponena pali ine.”+
4 Pantu fyonse ifyalembelwe kale fyalembelwe+ ku kutufunda,+ pa kuti mu kushipikisha+ kwesu na mu cisansamushi+ ca mu Malembo tube ne subilo.+
5 Awe Lesa uupeela ukushipikisha no kusansamusha amulenge ukuba no mutima+ umo wine uo Kristu Yesu akwete,
6 e pa kuti bonse capamo mu kwikatana+ mucindike Lesa kabili Wishi wa kwa Shikulwifwe Yesu Kristu mwi shiwi limo.
7 E ico mulepokelelana,+ ifyo na Kristu atupokelele,+ pa kuti Lesa acindikwe.
8 Pantu ndetila Kristu cine cine aishile ku kubombela+ abasembululwa+ pa mulandu wa cine+ ca kwa Lesa, ku kubalanga ukuti amalayo+ Lesa alaile ifikolwe fyabo ya cine,
9 kabili pa kuti abena fyalo+ bacindike Lesa pa luse lwakwe.+ Filya calembwa ati: “E co nkalamulumbanishisha mu nko kabili nkembila ishina lyenu amalumbo.”+
10 Na kabili atila: “Mwe nko, sansamukileni pamo na bantu bakwe.”+
11 Alundapo no kuti: “Lumbanyeni Yehova, mwe nko shonse, kabili lekeni abantu na bantu bonse bamulumbanye.”+
12 Kabili Esaya na o atile: “Kukaba umushila wa kwa Yese+ uukesa, kabili ukema ku kwisateka abena fyalo;+ kabili e o abena fyalo bakatetekela.”+
13 Shi Lesa uumupeela isubilo alenge ukuti mube ne nsansa nga nshi kabili mube no mutende pa mulandu wa citetekelo cenu, e pa kuti ku maka ya mupashi wa mushilo isubilo lyenu lilekoselako fye.+
14 Mwe bamunyinane, ine nalishininkisha ukuti muli basuma icine cine, kabili mwalishiba+ fyonse ifyo mufwile ukucita. Kanshi mulefundana.+
15 Lelo, ndemulembela no kumwebelapo ifishinka fimo fimo, kwati kumucinkulako+ na kabili, pa mulandu wa cikuuku ico Lesa ankwatila+
16 pa kuti mbe umubomfi wa kwa Kristu Yesu uwa kubombela abena fyalo,+ uubomba umulimo wa mushilo uwa mbila nsuma+ iya kwa Lesa, pa kuti Lesa abapokelele+ ngo mutuulo,+ uo umupashi+ wa mushilo wasangulula.
17 E ico nalikwata apa kwangila muli Kristu Yesu+ mu fintu fya kwa Lesa.+
18 Pantu te kuti ntiine ukulanda pa fintu ifyo Kristu abombeele muli ine+ pa kuti abena fyalo banakile+ Lesa, ku mashiwi+ mbeba na ku fyo ncita,
19 na ku maka ya fishibilo ne fipesha amano,+ na ku maka ya mupashi wa mushilo; pa kuti ukufuma ku Yerusalemu no kushinguluka+ ukufika ku Iluriki nalishimikila sana imbila nsuma pali Kristu.+
20 Awe ico mfwaisha ca kukanashimikila imbila nsuma uko Kristu kale kale aishibikwa, pa kuti nikuula pa mufula wa muntu umbi;+
21 lelo filya calembwa ati: “Abantu abashatala abebwa pali ena bakamona, na bashatala abomfwa bakeluka.”+
22 Imiku iingi nalefwaya ukwisa kuli imwe lelo nalifilwa.+
23 Apo nomba nshikwete icifulo umushabombelwa kuli ino ncende, kabili apo nalifuluka ukwisa kuli imwe pa myaka iingi+
24 nomba ndesubila ukwisamumona ilyo nkaba pa lwendo lwa kuya ku Speni,+ kabili ndesubila ukushindikwa+ na imwe pa numa ya kutala nasangalala pa kwikala na imwe akashita kanono.
25 Lelo pali nomba ndi mupepi no kuya ku Yerusalemu ku kutwalilako abantu ba kwa Lesa ifya kubafwilisha.+
26 Abena Makedonia na bena Akaya+ bali-itemenwe ukupeela ifyo bakwete pa kusangwila+ abapiina pa bantu ba kwa Lesa mu Yerusalemu.
27 Ca cine, bali-itemenwe ukucita ifyo, na lyo line e fyo fye bafwile ukucita kuli bena; pantu abena fyalo nga balapeelwako ifintu ifisuma ififuma kuli Lesa,+ na bo bene nacilinga ukuti baleafwilishako abaYuda ku fintu ifyo bakwete.+
28 E ico nga napwa uyu mulimo no kubatwalila+ umusangulo, nkesapita kuli imwe pa kuya ku Speni.+
29 Kabili, ninjishiba ukuti ilyo nkesa kuli imwe nkesa ne paalo ilikalamba ukufuma kuli Kristu.+
30 Awe ndemukoselesha, mwe bamunyinane, muli Shikulwifwe Yesu Kristu na pa mulandu wa kutemwa ukwafuma ku mupashi,+ ukuti mukosepo ukumpepelako kuli Lesa nge fyo na ine ndepepa,+
31 pa kuti mpokololwe+ ku bashatetekela Lesa mu Yudea kabili pa kuti nkafishe bwino bwino ku ba mushilo ba ku Yerusalemu+ ifintu ifyo ndebatwalila,+
32 nga Lesa atemwa, ilyo nkesa kuli imwe no kutuushisha+ pamo na imwe nkasansamuka.
33 Awe Lesa uupeela umutende abe na imwe bonse.+ Ameni.
