I NGÉDA MBUGE JAM (TOLE KUU KEÑI) I MPAM, BAA U YÉ U BADBA LE, ‘NYAMBE A BÉ HEE?’ TOLE IKÉTÉ NIÑ YOÑ, BAA MBUGE JAM I BI TINDE WE I BADBA LE, ‘BAA DJOB A NTÔÑ TOI ME?’

Bebek le yak we u nôgda nlélém kiki Sheila nu a niñ i loñ Amérika. A bi néñél ikété lihaa li li bé gwés Djob ngandak, a nkal le: “Me bi bôdôl gwés Djob me mañge, inyule a yé Nhek wés. Ndi me bé nôgda le a ta bé me bebee. Me bé hoñol le a mbéñgne me haa. Me bé nôgda bé le Djob a ñoo me, ndi me bé hoñol bé to le a ntôñ me.” Inyuki Sheila a bééna pééna i ñem? A ntoñol le: “Mbuge mam i bi kwél lihaa jem, jada mbus jada, ndi i bé nene wee Djob a bé hôla bé bés.”

Nlélém kiki Sheila, bebek le to we u mpééna bé le Nyambe Bayemlikok a yé toi. Ndi to hala, u nla badba le too a ntôñ toi we. Yak mut telepsép le Hiôb, a bé hémle lipémba ni pék bi Nhek, ndi a bi bana nlélém pééna. (Hiôb 2:3; 9:4) Kiki mbuge mam i bé kwél Hiôb, jada i mbus jada​—i nen-ge ki nye le hogbe i bé bé bebee​—jon a bi bat Nyambe le: “Inyuki u nsôô su woñ, u ñañ ki me kiki mbala woñ?”​—Hiôb 13:24.

Kii Bibel i nkal? Baa Djob nyen a nlona mbuge mam (tole bikuu bikeñi)? Kii i nkwés bés nkaa le Nyambe a ntôñ bôt ba binam bobasôna, yak ni hiki wada wés? Lelaa hiki wada wés a nla pam i yi ibale ni toi Djob a mbéñge bés, a nok bés, a ntôñ bés tole a nhôla bés i pamba mu mandutu més?

Mu gwigil bi bi noñ ha, di ga tehe mam bihégél bi niiga bés, inyu unda le Nyambe a ntôñ bés. (Rôma 1:20) I mbus, di ga wan lelaa yak Bibel yomede i ñunda le Djob a ntôñ bés. Kiki u mba u nyéñ i “yi nye” ni njel bihégél gwé, yak ni njel Bañga yé, hala ki nyen u mba u nkwo nkaa le ‘a ntôñ we.’​—1 Yôhanes 2:3; 1 Pétrô 5:7.