Ibale mandutu ma nlôl bé ni Nyambe, wee njee a nlona ni mam kiki bo njal keñi, ngandak liyep, gwét bi ngui, makon ma nyilha bôt bibôk, ni mbuge mam nya ndi nya? Bibel i nti bés balôm ba manjom baa inyu mandutu ma ma nkwél bôt ba binam:

1. I tôñ ndik wemede, huluk, ni ôa. “Mut wada a ntét numpe i boñ nye béba.” (Ñañal 8:9) Ngandak bôt i mbéna tét bape inyule i yé bikwéha bi bôt, i tôñôk ndigi bomede, i ban-ga ki ngandak ôa ikété miñem.

2. Mangéda mabe ni mimpuhge mi mam. Bôt ba binam ba nson njonok inyule “ngéda ni mpuhge ngéda ba mpémél bôt bobasôna.” (Ñañal 9:11) Hala wee i nla pam le bôt ba ba i béba homa, i béba ngéda, tole mam mabe ma puhe bo; i nla ki pam le bôt ba yoñ bé matat, tole ba boñ mahôha.

3. Nsohop nyen a ñane nkoñ isi. Bibel i nyelene bés njom i bisu i mandutu ma bôt ba binam. I nkal le: “Nkoñ isi wonsôna u niñi isi ane mut mbe.” (1 Yôhanes 5:19) “Mut mbe” nu, a yé Satan Nsohop nu a bé mpémba añgel i Djob i bibôdle, ndi “a bi telbene bé i maliga.” (Yôhanes 8:44) Biañgel bipe bi bi noñ Satan ikolba Djob inyule bi bééna njômbi i yônôs ngôñ yap ibe, jon bi bi yila mimbuu mimbe. (Bibôdle 6:1-5) Ibôdôl ngéda ba bi kolba Djob, Satan ni mimbuu nwé mimbe ba ngwélél ngui yap inyu kena mam ma nkoñ isi ni ñem mbe. Hala a nene ki loñge i ngéda yés. Nsohop a yé ñunbak ngandak, jon a “nyumus nkoñ isi wonsôna,” hala a yé ‘ngoo ngandak inyu hisi.’ (Masoola 12:9, 12) Ibabé pééna, Satan a ñénél nkoñ isi ni mbanda ibabé ngoo. Ñem wé mbe u ntinde nye i ba maséé ngéda a ntehe bôt ba binam ba nok ndutu. Satan nyen a mboñ le bôt ba son njonok, he Djob bé.

BÉÑGE KI LE: Ndik mut nu a gwé ñem mbe, a bak ki béba nyen a nla boñ le bôt ba yé ngi nsohi ba nok ndutu. Ndi maselna ma yé le, Bibel yo i nkal bés le: “Nyambe a yé gwéha.” (1 Yôhanes 4:8) Jon inoñnaga ni libak jé, “hala a yé nonok ni Nyambe le a boñ biyabda, to ni Nu Ngui yosôna le a boñ biyôgda!”​—Hiôb 34:10.

Ndi to hala, u nla ki badba le: ‘Letee ni ngéda imbe Nyambe Bayemlikok a ga nwas le Satan a ke ni bisu i tét bôt ba binam?’ Kiki di ntip tehe, Djob a ñoo béba, yak mandutu més ma nsiidaha nye ñem. U héya hala, Bañga yé i nkônde kal le: “Yugyana ki nye nduña nan yosôna inyule a ntôñ bé.” (1 Pétrô 5:7) Djob a ngwés bés, a gwé ki ngui i mélés madutu ni ngitelepsép yosôna. Yigil i noñ, i ga kônde yigye bés jam li. *