Jupar istʼapki ukanakarojj Diosajj bendisiwa
Moisés profetajja Diosan mayitanakapar istʼañäni ukhajj bendisistaniwa sasaw säna (Deuteronomio 10:13; 11:27). Diosarojj janiw jan castigayasiñ laykukejj istʼktanti. Antisas wali suma Diosätap laykuw istʼtanjja, ukatwa Jupar munasiraktanjja, janirakiw kunatï llakisiykaspa ukanak lurañ munktanti. “Jiwasatejj Diosar munasstan ukhajja, mandamientonakap phoqarakiñäniwa” (1 Juan 5:3).
Ukampis ¿Diosar istʼasajj kuna bendicionanaksa katoqtanjja? Ukanakat pay uñjañäni.
1. DIOSAR ISTʼAÑAW YATIÑANIR TUKUYISTU
“Nayätwa Tatitu Diosamajja, nayasti kunatejj jumatakejj askïki ukwa yatichsma, kawki thakinjamtejj sarañamäki ukanjam irparaksma” (ISAÍAS 48:17).
Jehová Diosasajja sum uñtʼistu, kunsa lurañasa kunsa jan lurañasäkaraki uk amuyañatakis yanaptʼarakistuwa. Ewjjtʼanakapamp yanaptʼayasis suma amtanakar puriñ munstan ukhajja, Sagrado Qellqatanakanwa sum yatjjatañasa, ukat ukarjamaw lurañasaraki.
2. DIOSAR ISTʼAÑAW KUSISIYISTU
“¡Diosan arunakap istʼapki phoqapkaraki ukanak kusisipjjpan!” (LUCAS 11:28).
Jichha tiemponjja, Diosan Arupar istʼirinakat walja millón jaqenakaw cheqpachapun kusisitäpjje. Amuytʼañataki: España markan jakasir mä chachajja, nayrajj facilakiw kunatsa colerasirïna, mayninakarus qhoru arunakampiw toqjjerïna, esposaparus ukhamaraki. Ukampis mä urojja, Joseajj kunja suma jaqënsa ukwa Moisés profetan qellqatanakapan liytʼäna, Joseajj Jacobun yoqapänwa. Juparojj esclavotwa aljapjjäna, kʼarintasaw carcelar llawintapjjarakïna. Ukhamansa uñjaskchïnjja, janiw ukhamat ukhama kuttʼaykänti, jupajj suma chuymampiw uñjaskakïna, mayninakats khuyaptʼayasirakïnwa (Génesis capítulos 37-45). España markankir chachajj akham siwa: “José chachat lupʼiñaw suma chuymanïñataki, khuyaptʼayasirïñataki, jan jankʼak colerasiñatak yanaptʼawayitu. Jichhajja, familiajampejj wali kusisitaw jakasjjta” sasa.
Mayninakarojj kunjamsa uñjañasa uka toqetjja, Sagrado Qellqatanakanwa jukʼamp ewjjtʼanak jikjjattanjja. Akjjar jutki uka yatichäwinwa uka toqet jukʼamp yatjjataskakiñäni.
