1, 2. ¿Kunatsa Pablojj Jerusalenar saräna, ukat kuna jan walinakansa ukan uñjasïna?

 JERUSALÉN markanjja, apóstol Pablojj mayampiw kʼullkʼu callenakana ukhamarak walja jaqenakani callenakan sarnaqäna. Uka markanjja, walja waranqa maranakaw Jehová Diosar adorasïna, ukhamätapat walja jaqenakaw markapat jachʼa jachʼa tukupjjäna. Uka markankir walja cristianonakajj Moisesan Leyiparjamaw sarnaqañ munasipkakïna, janirakiw Jehová Diosajj yatichkäna ukarjamas Jupar adorapkänti, ukhamätap Pablojj sumwa amuyäna. Ukatwa jupajj Éfeso markankaskäna ukhajj Jerusalenar sarañ amtäna, ukhamat uka markankir cristianonakar Diosar serviñan yanaptʼañataki ukat apkäna uka donacionanak churañataki (Hech. 19:21). Jerusalenar sarasajj jan walinakanwa Pablojj uñjasiñapäna, ukhampachas jan ajjsarasaw ukar saräna.

² Jerusalén markanjja, Pablojj kunayman jan walinakanwa uñjasïna. Ukankir yaqhep jilat kullakanakajja, kʼarinak Pabljjat istʼasajj ukaruw creyipjjäna. Jesusar uñisipkäna ukanakajj jukʼamp jan walinakanwa Pablor uñjasiyapjjarakïna. Sañäni, kʼarinakwa Pabljjat parlapjjäna, juparojj nuwjapjjänwa, jiwayañatak kunaw amenazapjjäna. Ukham jan walinakan uñjasisajj qhawqsa Diosar confiyäna ukwa Pablojj uñachtʼayäna, humilde chuymanïtapsa, jan ajjsartʼirïtapsa, Diosat jan jitheqtatapsa uñachtʼayarakïnwa. Pablon sarnaqäwipat yatjjatañajja, jupjam chuymanïñatakiw yanaptʼistani.

3-5. 1) ¿Khitinakampis Pablojj Jerusalenan tantachasïna, ukat kuna toqetsa parlapjjäna? 2) Pablompi Jerusalenankir ancianonakamp tantachasipkäna uka toqet lupʼisajja, ¿kunsa jiwasajj yateqsna?

³ Jerusalén markar puripkäna ukhat mä uru qhepatjja, apóstol  Pablompi compañeronakapampejj congregacionankir ancianonakar uñjiriw sarapjjäna. Jichha kutinjja Pablojj janiw jakasipkäna uka apostolonakamp jikisjjänti, inas jupanakajj yaqha cheqanakar predikir sarjjapjjchïna. Jesusan Santiago jilapakiw ukankjjäna (Gál. 2:9). Kunapachatï apóstol Pablosa “taqe ancianonakas” tantachtʼatäjjapjjäna ukhajja, amuyatajj Santiagow tantachäwi sarayäna (Hech. 21:18).

⁴ Ancianonakar aruntasajja, “kunanaksa [Jehová] Diosajj jupan yatiyäwipampejj yaqha markanak taypin luräna ukanakwa Pablojj taqpach yatiyäna” (Hech. 21:19). Uka arunak istʼasajja, jilatanakajj wali chʼamañchtʼataw jikjjatasipjjpachäna. Jichhürunakan kunjamsa Diosan Reinopan suma yatiyäwinakapajj oraqpachan yatiyasiski uk istʼasajja, ukham chʼamañchtʼataw jikjjatasiraktanjja (Prov. 25:25).

⁵ Pablojj donacionanak Europa toqet apankäna ukanak ancianonakar churäna ukhajja, qhawqsa jupanakat yaqha cheqankir jilat kullakanakajj llakisipjjäna uk yatisajj wal ancianonakajj kusisipjjäna, wal yuspärapjjarakïna. Ukatjja Pablon experiencianakap istʼasajja, “Diosar jachʼañchañwa qalltapjjäna” (Hech. 21:20a). Jichhürunakanjja, yaqhep jilat kullakanakasajj terremotonakamp jan waltʼayata, jan ukajj yaqha ukham jan walinakanwa uñjasipjje, yaqhepasti wali usuntataw jikjjatasipjjaraki. Ukampis jilat kullakanakapat chʼamañchtʼkir arunak katoqasasa, horasapar yanaptʼa katoqasasa, jupanakajj wali kusisitaw jikjjatasipjje, jilat kullakanakarus wal yuspärapjjaraki.

6. ¿Kuna jan walinaksa Judeankir jilat kullakanakajj Pablot parlapjjäna?

⁶ Ukatjja Judeankir jilat kullakanakajj kuna jan walinaksa Pablot parlapjjäna ukwa ancianonakajj Pablor yatiyapjjäna. Jupanakajj akham sapjjänwa: “Jilata, uñjam, judionak taypinjja walja waranqa waranqa creyentenakaw utji, jupanakajj taqenirakiw taqe chuyma Ley phoqapjje. Ukampis jupanakajj akham parlirwa jumjjat istʼapjjatayna: ‘Pablojj yaqha markanak taypinwa Moisesan Leyip contra saytʼasipjjañapatakejj taqe judionakar yatichaski. Wawanakamar circuncidañasa, costumbrenak arkañasa janiw wakiskiti sasaw jupajj parli’ sasa” (Hech. 21:20b, 21). a

7, 8. 1) Judío cristianonakat jilapartejj ¿kuna pantjat amuyunïpjjänsa? 2) Kuntï jupanakajj amuyapkäna ukajja, ¿janis Diosar taqe chuym servipkaspäna ukhamti uñachtʼayäna, ukat jupanakajj janiw apostatäpkänti sasajj kunatsa sissna?

 ⁷ Moisesan Leyiparjamajj janiw sarnaqasjjaniti sasin yatiyasjjäna ukhat mä 20 maranakaw pasjjäna, ukampis walja cristianonakaw Moisesan Leyiparjam sarnaqañ munasipkakïna. ¿Kunatsa jupanakajj ukarjam sarnaqañ munasipkakpachäna? (Col. 2:14). 49 maranjja, Jerusalenan tantachasipkäna uka apostolonakasa ancianonakasa mä cartwa congregacionanakar apayapjjäna, ukanjja jan judiöpki uka cristianonakajj janiw circuncidasjjapjjañapäkiti ni Moisesan Leyiparjamas sarnaqjjapjjañapäkiti sasaw qhanañchasïna (Hech. 15:23-29). Ukampis uka cartajja janiw judío cristianonakat kuns parlkänti, ukatwa jupanakat waljanejj ‘Moisesan Leyiparjam sarnaqañajj wakisiskakiwa’ sasin amuyapjjäna.

⁸ Uka judío cristianonakajj janiw cheqaparjam amuyapkänti, ukampis jupanakajj Diosat jan jitheqtir servirinakäpjjänwa. Jupanakajj janïr cristianöpkäna ukhajja, janiw falso diosanakar adorapkänti, cristianor tukjjapjjäna uka qhepatsa janirakiw falso religionan costumbrenakaparjamas sarnaqapkänti. Uka judionakarojj Jehová Diosaw Moisesan Leyip churäna, ukatwa ukajj jupanakatakejj wali importantëna. Cheqansa Moisesan Leyipan janiw demonionakan yatichäwinakapajj utjkänti, janirakiw kuna jan walïkänsa. Ukampis uka Leyejj nayra pactorjamänwa, jichhasti cristianonakajj machaq pactorjamaw sarnaqjjapjjañapäna, Jehová Dios saparuk cheqaparjam adorañatakejj janiw Moisesan Leyiparjam sarnaqjjapjjañapäkänti. Judío cristianonakajja, jaqenakajj Moisesan Leyiparjamaw sarnaqapjjañapa sasaw kutin kutin sapjjäna, ukampis ukham  sasajj Jehová Diosan mayitapar jan confiyapjjatapwa uñachtʼayapjjäna. Ukatwa kunjam adoratäñsa Jehová Diosajj munäna uk sum amuyapjjañapäna, ukarjamas sarnaqapjjañaparakïna (Jer. 31:31-34; Luc. 22:20). b

9. ¿Kunsa Pablojj Moisesan Leyipat yatichäna?

⁹ ‘Jan judiöpki uka jaqenakarojja, “wawanakamar circuncidañasa, costumbrenak arkañasa janiw wakiskiti” sasaw Pablojj yatichaski’ sasinwa jaqenakajj parlapjjäna. Ukampis ak amtañäni: Pablojja jan judiöpkäna ukanakar suma yatiyäwinak predicañatak khitatänwa, ukatwa Moisesan Leyiparjam sarnaqañajj kunatsa jan wakisjjäna uk jupanakar qhanañchäna. ‘Jan judiöpki ukanakajj circuncidasipjjañapawa, Moisesan Leyiparjamas sarnaqapjjañapawa’ sasin kutin kutin sapkäna ukanakarus cheqañcharakïnwa (Gál. 5:1-7). Kawkïr markanakarutï sarkäna uka markanakanjja, judionakarus Pablojj suma yatiyäwinak yatiyarakïnwa. Jupar istʼapkäna uka judionakarojja, ‘Jesusan jiwatapampiw Moisesan Leyipajj tukusiwayjje, Diosamp cheqapar uñjatäñatakejj janiw uka Leyirjam sarnaqañajj wakisjjeti’ sasaw yatichäna (Rom. 2:28, 29; 3:21-26).

10. Moisesan Leyiparusa circuncidasiñarusa, ¿kunjamsa Pablojj respetomp uñjatap uñachtʼayäna?

 ¹⁰ Khitinakatï judionakan yaqhep costumbrenakaparjam sarnaqasipkakïna, mä arunjja sábado uru imapkäna, yaqhep manqʼañanak janirak manqʼapkäna ukanakarojj janiw Pablojj juchañchkänti (Rom. 14:1-6). Circuncisión toqetsa janirakiw akaw lurasiñapa jan ukajj janiw ukajj lurasiñapäkiti sasin reglanak apskänti. Mä kutejja, Pablojj Timoteo waynarojj circuncidasiñapwa mayïna, ukhamat griego tatanïtap yatisajj Timoteor judionakajj jan rechazapjjañapataki (Hech. 16:3). Cheqansa sapa mayniw circuncidasiñsa jan ukajj jan circuncidasiñsa amtjjañapäna. Ukatwa Pablojj Galacia markankirinakarojj akham sispachäna: “Circuncidatäñasa jan circuncidatäñasa inamayakiwa, antisas munasiñampi Cristor confiyatanakapaw jukʼamp sumajja” sasa (Gál. 5:6). Ukampis maynitï Moisesan Leyipar istʼas circuncidasispäna, jan ukajj Diosamp sum uñjayasiñatakejj circuncidasiñaw wakisi sasin saspäna ukhajja, janipuniw akchʼas walïkaspänti, Diosar jan confiyatapwa uñachtʼayarakispäna.

11. ¿Kamsasas ancianonakajj Pablor ewjjtʼapjjäna, ukat uka ewjjtʼarjam lurañatakejj kunsa Pablojj lurañapäna? (Nota liytʼarakïta).

¹¹ Kunanaktï jilatanakajj apóstol Pabljjat istʼapkäna ukajj janis cheqäkchïnjja, judío cristianonakajj payachasisipkakïnwa. Ukatwa ancianonakajj akham sasin Pablor ewjjtʼapjjäna: “Nanak taypin pusi chachanakaw utji, jupanakajj kuntï Diosar mä promesan arsupki uk phoqasipki. Uka chachanakar irpam, Leyirjam jupanakamp chik qʼomachasinim, jupanakan gastopatakis qollqemat irtarakïta, ukhamat jupanakajj ñikʼutap qʼal  mururayasipjjañapataki. Ukhamatwa kunanaktï juma contrajj parlapki ukanakajj jan cheqätap yatipjjani, jan ukasti sum sarnaqaskatamsa Leyirjam phoqaskatamsa taqeniw yatipjjani” sasa (Hech. 21:23, 24). c

12. ¿Kunjamsa Pablojj ancianonakar istʼatap uñachtʼayäna?

¹² Pablo contra parlapkäna uka judío cristianonakajja, Moisesan Leyiparjamaw sarnaqasiñapa sasaw kutin kutin sasipkakïna. Ukhamätap Pablojj qhanwa jupanakar saspäna, ukampis jupajj ancianonakan mayitaparjam lurañatakiw chʼamachasïna, janirakiw Dios contras saytʼañ munkänti. Ukatwa jupajj akham säna: “Janis nayajj Leyirjam sarnaqkstjja, Leyirjam sarnaqapki ukanakatakejj Leyirjamas sarnaqkirista ukhamaw tukta, ukhamat Leyirjam sarnaqapki ukanakaru Criston thakipar irpaniñataki” sasa (1 Cor. 9:20). Uka textorjamajja, Pablojj Jerusalenankir ancianonakaruw istʼäna, ‘Leyirjamas sarnaqkaspa’ ukhamaw tukurakïna. Ukham luratapajj jiwasatakejj wali yateqaskayawa, jiwasajj ancianonakarojj taqe chuymaw istʼañasa, janipuniw kuns munañasarjam lurasiñapatakejj mayiñasäkiti (Heb. 13:17).

13. 1) ¿Kunatsa yaqhep judionakajj templon chʼajjwapjjäna? 2) ¿Kunjamsa Pablojj jiwañat salvasïna?

¹³ Uka pusi chachanakan promesanakap phoqañ urojj purinjjäna ukhajja, Asiankir judionakajj Pabloruw uñjapjjäna, ukatjja jan judiöpki uka jaqenakar templor irpatapatwa kʼarintapjjarakïna. Ukham pasatapatjja jan walinakaw utjäna, ukampis Roma markankir ejercitopan comandantepaw Pablor jarkʼaqäna, ukhamatwa jupajj jiwañkam nuwjat jan uñjaskänti. Antisas uka comandantejj romano soldadonakaruw Pablor katuntapjjañapatak mayïna. Uka urut qalltasajj pusi maranakaw Pablojj carcelan llawintat uñjasïna, ukhampachas kunayman jan walinakanwa uñjasïna. Kunapachatï comandantejj ‘¿kunatsa Pablo contrajj jan walinak parlapjjta?’ sasin judionakar  jisktʼäna ukhajja, jaqenakajj may may arnaqasipjjäna. Jaqenakan wal chʼajjwapjjepanjja, ejerciton comandantepajj kunapunis pasatayna uk janiw amuykänti, ukatwa jupajj soldadonakan cuartelapar Pablor apapjjañapatak mayïna. Pablompi romano soldadonakampejj cuartel manqhar niya mantañampïsipkäna ukhajja, akham sasaw Pablojj ejerciton comandantepar säna: “Mirä amp suma, jaqenak nayraqatan arstʼayakitaya” sasa (Hech. 21:39). Comandantejj arstʼaskakim sasin säna ukhajja, Pablojj jan ajjsartʼasaw creencianakapat parläna.

14, 15. 1) ¿Kunsa Pablojj judionakar qhanañchäna? 2) Judionakajj kunatsa Pablotak wali coleratäpjjäna uk yatiñatakejja, ¿kunsa comandantejj luräna?

¹⁴ Akham sasaw Pablojj parlañ qalltäna: “Istʼapjjeta, kunatï paski uk nayajj qhanañchapjjäma” sasa (Hech. 22:1). Pablojj hebreo arutwa jupanakar parläna, ukatwa jaqenakajj amuktʼapjjäna. Ukatjja kunjamatsa Jesusan arkiripar tuküna ukwa jupanakar qhanañchtʼäna, kunanaktï judionakajj yatipkäna uka toqetsa parlarakïnwa. Cheqansa Pablojj wali uñtʼat Gamaliel tatan yatichatänwa, Jesusan arkirinakaparuw jan waltʼayañatak arknaqarakïna, amuyatajj tantachatäpkäna uka jaqenakat mä qhawqhanejj ukanak sum yatipjjäna. Pablojj Damasco markar sarkäna ukhajja, mä visionwa uñjäna, ukanjja Jesusaw jupar parläna. Jupamp chik sarapkäna uka chachanakajja, mä kʼajkir qhanwa uñjapjjäna, mä aru istʼapjjarakïna, ukampis uka  arojj kamsañsa munäna uk janiw amuyapkänti (Hech. 9:7; 22:9). Niyakejjay Pablojj qhanan wal qhantʼatap laykojj jan kuns uñj-jjchïnjja, jupamp chik sarapkäna uka chachanakajj Damasco markaruw Pablor irpapjjäna. Uka markanjja, judionakan wali uñtʼat Ananías chachaw Pablor yanaptʼäna, wasitat uñj-jjañapatakejj mä milagro toqew jupar qollarakïna.

¹⁵ Ukjjarusti Jerusalenar kuttʼanjjasajja templonwa Jesusar uñjta sasaw Pablojj säna. Uk istʼasajja judionakajj walpun colerasipjjäna, akham sasaw arnaqasipjjarakïna: “¡Uka jaqejj aka oraqet chhaqtayatäpan, janiw jakañapajj wakiskiti!” sasa (Hech. 22:22). Ukatwa ejerciton comandantepajj soldadonakan cuartelapar Pablor irpantapjjañapatak ordenäna. Kunatsa jaqenakajj ukham jupa contra arnaqasipjje uk sumpach yatiñatakejja, jawqʼjasin arsuyapjjam sasaw sarakïna. Jupar jawqʼjañatak listokëjjapjjäna ukhajja, nayajj romano jaqëtwa sasaw Pablojj säna. Jichhürunakanjja, ukhamarakiw Jehová Diosan Testigonakapajj derechonakapsa creencianakapsa leyinakarjam arjjatawayapjje (“ Roma markan leyipampi romanonakjam derechonïñampi” sat recuadro uñjjattʼäta, ukatjja “ Suma yatiyäwinak yatiyasiñapatakiw tribunalanakan arjjatasi” sat recuadro uñjjattʼarakïta). Kunapachatï comandantejj Pablon romano jaqëtap yatïna ukhajja, janiw jawqʼjayjjänti, jan ukasti yaqha toqetwa arsuyañ thaqäna. Qhepürojja Sanedrinankir jaqenakaruw tantachasipjjañapatak jawsthapiyäna, ukhamat kunatsa Pablor juchañchasïna uk yatiñataki.

16, 17. 1) ¿Pablojj Sanedrín nayraqatan parlkäna ukhajj kunas pasäna? 2) Nuwjatas uñjaskchïnjja, ¿kunjamsa Pablojj humilde chuymanïtap uñachtʼayäna?

¹⁶ Sanedrín nayraqatanjja, Pablojj akham sasaw parlañ qalltäna: “Jilatanaka, aka urkamajj wali qʼoma concienciampiw nayajj Dios nayraqatan sarnaqawayta” sasa (Hech. 23:1). “Uk istʼasasti Ananías sat jachʼa jilïr sacerdotejj Pablo jakʼan sayaskir jaqenakaruw lakapat  nuwantapjjañapatak ordenäna”, ukatwa Pablojj jan jukʼamp parljjänti (Hech. 23:2). Jachʼa jilïr sacerdoten ukham luratapajj yaqhachasir jaqëtapwa uñachtʼayäna, janïr kuns arskipanwa kʼari jaqëkaspas ukham Pablor juchañchäna. Ukatwa Pablojj jupar akham säna: “Kʼari chuyman jaqe, Diosaw jumarojj nuwantätam. Leyirjam nayar juzgañatakiw qontʼastajja, ukhampachas ¿Ley pʼakintasat nayar nuwantayañ ordenta?” sasa (Hech. 23:3).

¹⁷ Ukankapkäna uka jaqenakat yaqhepajja, janiw khititï Pablor nuwantkäna uka jaqetakejj colerasipkänti, jan ukasti Pablon arunakap istʼasaw wal colerasipjjäna. Akham sapjjarakïnwa: “¿Diosan jachʼa jilïr sacerdoteparut jumajj jiskʼachta?” sasa. Ukjjarusti Pablojj jankʼakiw humilde chuymanïtapsa Moisesan Leyipar respetomp uñjatapsa uñachtʼayäna. Jupajj akham sänwa: “Jilatanaka, nayajj janiw jupan jachʼa jilïr sacerdotëtap yatkayätti. Qellqatäskiwa: ‘Marka apnaqerimarojj janiw jiskʼachañamäkiti’ sasa” (Hech. 23:4, 5; Éx. 22:28). d Ukjjarusti jupanakar amuytʼayañatakejj yaqha toqetwa Pablojj parläna.  Sanedrín taypinjja, fariseonakampi saduceonakampiw utjäna, ukatwa jupajj akham säna: “Jilatanaka, nayajj fariseötwa, fariseonakan yoqaparaki. Jichhürojj jiwatanakan jaktaniñapar creyitaj laykuw nayar juzgapjjetu” sasa (Hech. 23:6).

18. ¿Kunatsa Pablojj fariseötwa sasin sispachäna? ¿Jupat yateqasisajj kunjamsa jaqenakamp parlsna?

¹⁸ ¿Kunatsa Pablojj fariseötwa sasin sispachäna? Kuna laykutejj jupajj ‘fariseonakan yoqapänwa’, mä arunjja uka religionankir familiatänwa. Ukhamätapatwa waljanejj fariseot Pablor uñtʼasipkakpachäna. e Niyakejjay fariseonakajj jiwatat jaktañ toqet falso creencianïpjjchïnjja, ¿kunatsa Pablojj fariseot uñtʼatäpachäna? Fariseonakajja, ‘maynejj jiwjje uka qhepat almapajj jakaskakiwa, cheqap sarnaqer jaqenakan almapas mayampiw jañchi cuerponir tukupjjaspa’ sasaw amuyapjjäna. Ukampis Pablojj janiw ukanakar creykänti, antisas Jesusajj jiwatat jaktañ toqet kuntï yatichkäna ukaruw creyïna (Juan 5:25-29). Ukhampachasa, fariseonakajj jiwatat jaktañar creyipkäna ukarojj janiw Pablojj juzgkänti. Cheqansa fariseonakajj janiw saduceonakjamäpkänti, uka saduceonakajj janiw jiwatat jaktañarojj creyipkänti. Pablot yateqasisajja, jiwasjam jan creencianïpki uka jaqenakamp parlasajj ukhamarakiw wali amuyump parlsna, kuna toqettï yatiñ munapki ukarjamaw parltʼaraksna. Waljanejj kunayman diosanakarus creyipkchejja, jiwasajj cheqpach Diosar adorañatakiw chʼamachastanjja. Ukampis yaqha religionankirinakasa jiwasasa Diosan utjataparuw creytanjja.

19. ¿Kunatsa Sanedrín taypin tʼaqanoqtañajj utjäna?

¹⁹ Pablojj kuna arunaktï siskäna ukajja, Sanedrín taypinkirinakarojj tʼaqanoqtayänwa. Uka toqet Bibliajj akham siwa: “Waljaniw wali jachʼat arnaqasipjjäna. Ukatwa fariseonakan arkirinakapat mä qhawqha escribanakajj saytʼasipjjäna, wali colerataw toqesipjjarakïna, akham sasa: ‘Janiw kuna jan walis aka jaqen utjkiti, inas juparojj mä espiritus jan ukajj mä angelas parljjaychi’ sasa” (Hech. 23:9). Saduceonakajj janiw angelanakan utjatapar creyipkänti, ukhamajj uka arunak istʼasajj wal colerasipjjäna (“ Saduceonakampi fariseonakampi” sat recuadro uñjjattʼäta). Walpun jaqenakajj chʼajjwapjjäna, ukatwa Roma markan comandantepajj mayampi Pablor salväna (Hech. 23:10). Ukhamäkchïnsa Pablojj jan walinakan uñjasiskakïnwa. Jutïr yatichäwinwa uka toqenakat jukʼamp yatjjataskañäni.