35 YATICHÄWI

¿Kunjamatsa Diosan amigopïristxa?

Diosampi sum apasiñax wali askiwa, ukwa Gabriel sat mä waynitux jan walin uñjasisax amuyatayna. Akham sänwa: “Awkijax 12 maranïskayät ukhaw jaytawayapxitu. Tatajan kuttʼanxañapatakiw mä arumax wali jaya Jehová Diosar mayista” sasa.

Wali llakitaw Biblia liyiñ qalltäna. Ukat mä chiq jikxatatayna, ukanxa akham sasaw qillqirix Jehová Diosar säna: “Jumaruw jan arxatirin jaqinakax makhatxapxtam, jumaw wajchanakan yanapiripataxa” sasa (Salmo 10:14). Uka arunakaw jupar wal chuymachatayna, ukat akham saskakiwa: “Jehová Diosas yanaptʼäm siskitaspa ukhamwa liykasax amuyasta, Awkijätapsa amtaykitaspa ukhama. Janiw ukham yaqha suma awkix utjkaspati” sasa.

 INAS jumax uka waynitjam jikxatasiraksta. Ukampis janipuniw ak armañamäkiti: Jehová Diosaw juman amigomäñ muni, mä arunxa, wali sum jupampi apasisma, ukwa muni. Arupax akham siwa: “Diosar jakʼachasipxam, jupasti jumanakarux jakʼachasirakiniwa” sasa (Santiago 4:8). ¿Amuytati? Inas jupax jan uñjañjamäkchi jan ukax jiwasat sipansa wali jachʼächi. Ukampis jupan amigopäsna ukwa muni.

Ukampis janirakiw Diosampix ina chʼusataki sum apaskaraksnati. Jan ukasti chʼamachasiñasawa. Amuytʼañäni, inas utan mä panqar sum uywasirïsta. Uka panqaran sum jiltañapatakis jan ukax jan jiwarañapatakisa, ¿kunas munasi? Nayraqatxa kawkir uchañas wakisini uk amuytʼañawa, ukat tiempoparjamaw umamp warxattʼañasaraki. Janiw ukhamaki jaytjkasmati. Diosampi sum apasiñax niya ukhamarakiwa. Ukhamax jupampi jukʼamp sum apasiñatakixa, ¿kun lurañas wakisispa?

Bibliat yatiqañamapuniwa

Kunjamtï yatktanxa, khitinakatix sum apasipki ukanakax parltʼasipxapuniwa ukat purapat istʼasipxaraki.  Diosampi sum apasiñ munasax ukham lurañasarakiwa. Ukampis ¿kunjamatsa Diosar istʼasma? Arupa, mä arunxa, Biblia liyiñamawa ukat sum yatxatañamarakiwa (Salmo 1:2, 3).

Inas jumatakix yatiqañax jan munañjamäkchi, wali chʼamäkaspas ukhama. Chiqansa televisión uñchʼukiñasa masinakampi kun luraskañas jan ukax anattʼañ videonakampi anatañas jukʼamp askïkaspa ukhamwa amuyasma. Ukampis Diosampi sum apasiñ munasax kuntï Arupanx siski uk istʼañamawa.

Chiqansa, Bibliat yatiqasax janiw amjayasisin jiwkätati. Inas jumatakix libronak liyiñax wali chʼamächi, ukampis wali sumwa Bibliat yatiqasma. Ukatakix tiempo apstʼasiñamawa. Ukampis ¿kawkitsa tiempo apsüta? Laura sat mä tawaqut yatiqasisma, jupax akham siwa: “Kuntï lurañajäki ukanakatakiw tiempo apstʼasta. Sapa alwaw ikiñat sartasin Bibliat mä jalja liytxa” sasa. Ukampis María sat 15 marani mä tawaqitax mayj luraraki, jupax akham sarakiwa: “Sapa arumaw janïr ikintkasax Biblia liytxa” sasa.

¿Jumax kunapachas Bibliat yatiqäta? Nayraqat  292 janan utjki uka chiqwa uñxattʼasma. Ukat jumax kuna horas 30 minutonakaki Diosan Arup liytʼasma ukwa aka chiqar qillqtʼasïta.

․․․․․

 Ukampis janiw tiempoki apstʼasiñamäkiti. Chiqansa, qalltanxa Bibliat yatiqañax wali chʼamäspawa. Inas Jezreel sat 11 marani mä waynitjam uñjasirakchisma, jupax akham siwa: “Nayatakix yaqhip chiq amuyañax wali chʼamawa” sasa. Ukampis janiw ukharuki jaytañamäkiti. Amtañamapuniwa, Bibliat yatiqasax taqinit sipansa wali suma Amigomaruw istʼasktaxa. Ukat janiw chʼamäxaniti, jan ukasti Jehová Diosat yatiqañax wali munañjamäxaniwa. Ukat wal chʼamachasïta ukhax wali sumwa yatiqasma, wali askinakwa jikxatarakisma.

Diosar mayisiñamapuniwa

Jupar mayisisarakiw Jehová Diosampix parltʼastanxa. Chiqansa ukham parlasiñax jupan mä aski churäwipawa. Amuytʼañäni: jupampix kuna horasa, mä arunxa, arumas urus parltʼasiksnawa. Jehová Diosax kunapachas istʼakistuwa. Ukat wal istʼañ munistu. Ukatwa Biblianxa akham sistu: “Taqi kunsa Diosar sapxam oracionana, mayipxam yuspagarapxarakim” sasa (Filipenses 4:6).

Ukhamasti, kuna llakimatsa jan ukax jan waltʼäwimatsa Diosarux yatiyarakismawa. Ukampis yuspärañamarakiwa. Kunapachatï mä amigox jiwas layku kuns luri ukhaxa, yuspärañasawa. Ukat Jehová Diosaw taqi amigonakat sipansa jumarux wali askinak churtamxa (Salmo 106:1).

Kunanakatsa Jehová Diosar yuspärta ukanak aka chiqar qillqtʼasïta.

․․․․․

 Ukat awisanakax sinti jan walinakan llakita uñjasïta jan ukax wal axsaräta ukhaxa, ¿kuns lurasma? “Diosar llakinakam katuyam, jupasti chʼaman tukuyätam, Diosar jaysirin aynachtʼañapxa janipuniw jupax munkaniti.” (Salmo 55:22.)

 Kuna llakinakatsa Diosar mayisiñ munta ukanak aka chiqar qillqtʼasïta.

․․․․․

Juma pachpaw amuytʼasiñ yatiqarakisma

Ukampis Diosampi sum apasiñ munasax yaqha tuqitwa amtañasaraki. Davitax mä qʼuchu qillqkasaw akham säna: “Yantʼapxam, uñjapxarakim, Tatitun munasir kankañapa” sasa (Salmo 34:8). Jupax mä jan walin uñjasïna, uka tuqit amtasaw ukham qillqpachäna. Niyapuniw Saúl sat reyix jupar jiwayäna. Ukampis jan jiwañatakix yaqha uñisirinakap taypiruw imantasïna. Filistea markar imantasiriw saräna, ukampis jankʼakiw jupanakax katjxapxäna. Akan jiwayapxapunitaniw sasaw sispachäna. Ukampis qhispïnwa. ¿Kunjamatsa qhispïn uk yattati? Chʼikhi amuyumpiw luqhiratäkaspas ukham tukutayna (1 Samuel 21:10-15).

Ukampis Davitax janiw jupa pachpas qhispiyaskaspas ukham amuyaskänti, kunjamtï uka qʼuchu qalltan siskixa, Jehová Diosan qhispiyatapwa amuyäna, ukatwa akham  säna: “Tatituruw nayax artʼasta, jupasti taqi llakinakat irpsutu” sasa (Salmo 34:4). Ukhamasti pachpa sarnaqäwipat amuytʼasaw jupax akham satayna: “Yantʼapxam, uñjapxarakim, Tatitun munasir kankañapa” * sasa.

Inas awisax Jehová Diosas sum uñjaskiristam ukham amuyasirïsta, ukanakat amtasinwa aka manqhar qillqtʼasïta. Janiw wali muspharañjam luräwinakäñapäkiti; awisax wali askinakwa janis kunäkaspa ukhamaki uñjtanxa, ukanakwa qillqtʼasma.

․․․․․

Ukhamasti sapa mayniw Diosampi sum apasiñatakix chʼamachasiñasa, inas cristiano awk taykan uywata jilsuwaysta, ukampis jumaw chʼamachasiñama. ¿Ukhamti luraskta? ¿Jichhat qalltaskäta? Ukhamasti, aka yatichäwiw Jehová Diosampi sum apasiñatakix yanaptʼätamxa. Arupanxa akham sistuwa: “Mayipxam, Diosax churapxätamwa; thaqapxam, jikxatapxarakïtawa” sasa (Mateo 7:7).

JUKʼAMP YATXATAÑATAKIX MAYÏR LIBRON 38 UKAT 39 YATICHÄWINAKAP UÑXATÄTA

JUTIR YATICHÄWI

¿Diosat jaqinakamp parlañax jumatak chʼamati? ¿Kunjamsa Biblian yatichäwinakapar arxatasma?

[Qhanañchäwi]

BIBLIAX KAMSISA

“Kusisiñanïpxiw khitinakatix ajay tuqin aynachtʼatäpxatap amuyasipxi ukanakaxa.” (Mateo 5:3)

AKHAM LURASMAXA

Sapürun pusi jananak Biblia liyisax mä maranakwa tuksusma.

¿YATIYÄTATI?

Aka libro liyisax akan utjki uka suma yatichäwinak istʼasktaxa, ukanakax Bibliat apstʼatawa, ukhamatwa Jehová Diosax amigopäñam munatapxa uñachtʼayi (Juan 6:44).

¡AKANAK LURÄ!

Bibliat jukʼamp sum yatiqañatakix akanak lurä: ․․․․․

Diosar sapakuti mayisiñatakix akanak lurä: ․․․․․

Awkijarus jan ukax taykajarusa, ¿kuns aka tuqit jisktʼañ muntxa? ․․․․․

JUMASTI, ¿KAMSASMASA?

● ¿Bibliat wali sum yatiqañatakix kuns lurasma?

● ¿Kunatsa Jehová Diosax pantjasir jaqinakan mayisitap istʼañ munpacha?

● ¿Kunjamatsa Diosar jukʼamp sum mayisisma?

[291 janan qhanañchäwipa]

“Wawäkasinxa sapürus pachpakjamaki Diosat mayisiskirïtxa. Ukampis jichhax kuna askis jan ukax kuna jan walis sapurunjam pasitu ukanakat mayistxa. Niyakixay urunakax may mayächixa, janiw pachpaki sapürux mayiskti.” (Eva)

 [292 janan recuadropa/fotopa]

 Biblia sum uñtʼañamawa

1. Biblian utjki uka sarnaqäwinakatxa kawkïris jumatakix munañjama uk thaqtma. Uka sarnaqäw sum amuyañatakix Jehová Diosar yatiñ mayisiñamawa.

2. Amuyumpiw liyïta. Janiw jankʼaki liyirañamäkiti. Kuna tuqitsa parlaski uk amuytʼañamawa, wal chʼamachasiñamawa: sañäni, kunas kamachaski uk uñjkasmasa, khitinakatï parlki uk istʼkasmasa, kuna suma qʼaphinaksa muktʼkasma, jan ukax manqʼanaksa muktʼkasma ukham amuyañamawa. Ukhamatwa wali sum yatiqätaxa.

3. Jisktʼasiñamarakiwa. Liyiñ tukuyasax akham jisktʼasiñamawa:

● ¿Kunatsa Jehová Diosax Arupanxa uka tuqit qillqaypachäna?

● ¿Khitinakatsa yatiqasirista, ukat khitinakatsa jan yatiqasiñajäkaspa?

● ¿Kuna yatichäwis nätakix utji?

● ¿Bibliax kunsa Jehová Diosat ukat luratanakapat yatichitu?

4. Diosar mayisiñamawa. Kunsa yatiqta ukat kunjamsa ukarjam sarnaqañ munta ukanak Jehová Diosar sañamawa. Ukampis Bibliata, mä arunxa, Qullan Qillqatanakapat yuspärañ janiw armasiñamäkiti.

[Foto]

“Arunakamax sarnaqäwixatak qhanawa, thakixan qhantirirakiwa.” (Salmo 119:105)

[294 janan recuadropa/fotopa]

Kunas nayraqatankañapa

¿Jumatakix janipunit tiempox Diosar mayisiñatakis Bibliat yatiqañatakis utjki? Ukampis kunas nayrankañapa uk amuytʼañamawa, ukaw yanaptʼätamxa.

Uk amuytʼañäni: Mä balde aptasin jachʼa qalanakampi phuqantasma. Ukat chʼalla phuqarañapkam phuxtuntarakisma. ¿Kunas utji? Jïsa: baldex qalampi chʼallampi phuqantatawa.

Jichhax qalsa chʼallsa apsusma, ukat wasitat apantasma. Ukampis chʼalla nayraqat uchasma ukhaxa, ¿kunas kamachani? Janiw taqpach qalanakax mantirjamäxaniti. Kuna laykutix chʼallwa nayraqat waranttaxa.

¿Kunsa yatiqsna? Chiqansa, kunatix jiskʼanakäki, mä arunxa kusistʼañanakampi jakäwisar phuqantayañäni ukhaxa, wali wakiskirinakaw jiltʼxani, mä arunxa kunatix Diosamp sum apasiñ yanapkistu ukanakaw jiltʼxaspa. Ukatwa Biblianxa “askïkis ukpin ajlli[pxam]” sistuxa (Filipenses 1:10). Jichhax, jumatï ukham luräta ukhaxa, kunanakatï Jehová Diosar jakʼachaykiristam ukanakatakix tiempox utjxaniwa ukat kusistʼañatakis tiempox utjaskarakiniwa. Ukhamax kunatix jachʼäki, mä arunxa wakiski uk nayraqat thaqhapxañäni.

[290 janan fotopa]

Diosampi sum apasiñax mä panqarar uñtatawa: sum jiltañapatakix sum uñjañasawa