¿Biblian yatichäwiparjamapunit sarnaqañajäspa?
34 YATICHÄWI
¿Biblian yatichäwiparjamapunit sarnaqañajäspa?
Pä tawaqu masimampis recreon manqʼtʼasiskasma ukham sañäni, ukat mä waynaw uñstani, jupax jichhakiw escuelamar jutaski.
Maynix akham sistamwa: “¿Yattati?, Sergiox wal muntamxa. Qhanarakis sarnaqaskixä. Mayj uñchʼuktamxa. ¡Ukat jumarukiw uñchʼukisktamxa!” sasa.
Ukat maynïrix akham sasaw jiñchu jakʼat saraktamxa: “¡Jupax janiw khitimpïkisa! Jumankañapapuniwa” sasa.
Ukampis jumax uk yattawa. ¡Jichhakiw utapan mä fiesta wakichatayna, ukat uka fiestar sarañamwa Sergiox munäna! Ukat jumax janiw sistawa, ukampis kunjamakis uka fiestar sarasax jikxatasisamäna ukwa amuytaxa.
Ukat maynïr tawaqux jankʼakiw akham sistamxa:
“¡Jan uñtʼatanïkiriskayäta ukhaxa, nayaw jupampïskiristxa! Jan akchʼas pächasisaw jupampi sarxiristxa” sasa.
Ukat mayj uñkatasaw pächasisjam akham jisktʼaraktamxa:
“¿Jumastï? ¿Kunatsa jichhakamas sapakïskta? Janirakis khitimpis sarnaqktatixä” sasa.
¡Ukham jisktʼtamstï! Chiqansa, inas jumax ukham amigonïñ munasksta, ukampis jaqichasiñataki wakichatäxäta ukhakam suyañamawa, janiw khitimpis ukhamaki sarnaqaskätati sasin sapxtamxa.
Ukat mayni tawaqux jankʼakiw akham saraki: “Kunatsa jan khitimpis sarnaqta ukxa nayaw yatta, ¿yupaychäwimaxaya?” sasa.
Ukat inas kunjamatsa chuym yatitu sasin saraksta.
“¡Ay aka tawaqu!, Bibliakistï, ¿janit awisax mä jukʼaksa kusistʼkasma?” sasaw larusisjam sapxaraktamxa.
¿AWISAX jumat ukham larusipxirïtamti? Inas ukham sawkasitax payachasirïsta. Doris sat mä tawaqux ukhaman uñjasitayna, ukat siwa: “Biblian kamachinakapax taqi kun lurañatsa jarkʼkitaspa ukham amuyasirïta. Yatiqir masinakax kuns lurapxakirinwa, ukatwa jupanakjamäñ wal munirïta” sasa.
Sum amuytʼasiñamawa
Janiw jan walir purisapunix yatiqañasäkaspati. Yaqhanakax jan walinak lurasax kuna jan walurus puripxi uk uñjasin yatiqasiñasawa, ukhamwa Bibliax amuytʼayistu. Asaf sat mä jaqit parltʼañäni, jupax salmonak qillqatayna. Diosan kamachinakapax taqi kun lurañatsa maynir jarkʼkaspa ukham jupax amuyatayna. Ukampis sum amuytʼasxäna: Diosar jan istʼirinakax kunjamsa jakapxi, kuna jan walinsa uñjasipxi ukwa amuyatayna, ukatwa uka jaqinakax “llustʼa” thakin sarnaqapxi sasa qillqatayna (Salmo 73:18).
Ukhamasti, uka amuyumpi aka wayn tawaqunakan sarnaqäwinakapat amuytʼañäni, jupanakax Diosar jan istʼasaw janïr jaqichatäkasina wachuq jucha lurapxatayna.
● ¿Kunatsa jumax Diosat jithiqtasin ukham sarnaqirïta?
Doris: “Taqi masinakajaw uñtʼatanakapamp sarnaqapxiri ukat wali kusisitas jikxatasipkaspa ukham amuyirïta. Jupanakax jampʼattʼasipxi, qhumanttʼasipxi ukhaxa, ukham luraña munarakirïta, nayax saparstʼatas uñjaskirista ukham amuyasirïta. Mä waynampïñ nayax munirïta ukat kunjamakis uka waynampix sarnaqirista sasaw walja tiempow lupʼirïta, ukhamasti sapürutjamaw uka waynar wal jakʼachasiñ munirïta”.
Miguel: “Ikintasiñ tuqit parlir qillqatanak uñirïta, ukat ukham wakichäwinak televisionan uñjirïta. Ukat walja tiemporakiw masinakajampix uka tuqit parlirïta, ukhamasti uk lurañax kunjamakïpachas uk wal yatiñ munirïta. Mä tawaqumpi sapaki jikxatasisax wal llamktʼañsa jampʼattʼañsa munirïta, ukampis janiw juchar purkäti sasaw amuyasirïta”.
Andrés: “Internetan qʼañu luraskirinak jan ukax jan isininak uñchʼukirïta. Machiriyätwa ukat Bibliar jan yäqir wayn tawaqunakampiw fiestanakar sarirïta”.
Teresa: “Janïr jaqichaskasin ikintasiñax jan walïtap yatiyätwa, ukampis janis sinti juchäkaspa ukham amuyirïta. Janiw khitimpis ikintasiñ munirïkti. Ukampis jan wali amtanakaw atipitu. Chuymax qʼal qalaritu, jan phinqʼaniw tukuwayta”.
● ¿Ukham sarnaqasax kusisiyätati?
Doris: “Qalltanxa kusisiñjamänwa. Taqi kun munañajar lurasasa masinakajan katuqatas wal kusistxa. Ukampis mä jukʼa tiempokiw ukham sarnaqta. Jan waliw chuymajan jikxatasta, qʼañükiristsa ukhama. Ukhamaw qʼuma chuymanïñsa virgenäñsa aptʼasta”.
Andrés: “Jukʼat jukʼatwa jan wali luräwinakampix atipayasta. Ukampis chuymajan jan walirakiw jikxatasta, aynachtʼkiristsa ukhama”.
Teresa: “Wachuq juchar purtʼasisaw tawaqjam sum sarnaqasiñxa aptʼasta. Uñtʼatajampix wali sum jakasïxa sayätwa. Ukampis jan walirukiw puripxta, wali chuyma ustʼataw jaljtapxta. Walpun amtasta, Jehová Diosar kunatsa jan istʼkpachäta sasaw arumanakas ikiñan wal jachirïta”.
Miguel: “Jiwatäkiristsa ukham amuyasirïta. Jan walinak lurasax kunarus yaqhanakarus puriyta ukxa janiw lupʼiñ munirïkti, ukampis lupʼiñjamapunïriwa. Kusistʼañ laykukiw jaqi masir jan walinak lurta, ukaw llakisiyirïtu”.
● Mä waynas jan ukax mä tawaqus Biblian kamachinakapax janiw kunsa lurayasirjamäkiti saspa ukhaxa, ¿kunsa jupar sasma?
Teresa: “Diosan kamachipar istʼaskakim ukat ukar respetirinakamp chikachasirakma. Ukat kusisitakiw sarnaqasïta”.
Doris: “Janiw maynix jupa pachpataksa, munañanakapataksa lupʼiñapäkiti. Yaqhanakaruw jan walin uñjasiysna. Ukat Diosar jan istʼasax jiwaspachaw jan walir pursna”.
Andrés: “Janïr sum amuytʼasirïsax wali sumsa masinakamax munañaparjam sarnaqapkaspa ukhamwa amuysna. Ukat jumax jupanakjam sarnaqañ munaraktaxa. Ukatwa khitinakampis sarnaqañäni ukxa sum ajlliñasa. Jumatï Jehová Diosar taqi chuym atinisïta ukhaxa, walja jan walinakatwa qhispïta”.
Miguel: “Jehová Diosatxa pä suma churäwi katuqtanxa, suma chuymanïña ukat jaqjam suma uñjatäña. Ukampis jañchin munañanakapampi atipayasisa ukanak aptʼasisax jan waliruw purtʼassna. Jan walinakan uñjasisax arsusiñamawa. Awk taykamar jan ukax yaqha amuytʼan jilïr jaqiruw kunjamsa jikxatasta ukxa yatiyasma. Ukat jan walinak lurasas jupanakampiw jankʼaki parltʼañama, ukhamata jankʼaki askichxañataki. Jehová Diosan munañaparjam sarnaqasax wali sumaw chuymaman jikxatasïta”.
¿Diosan kamachinakapax askisatakit janicha?
Jehová Diosax ‘kusisir Diosawa’, ukat jumax kusisita jakasirakisma ukwa muni (1 Timoteo 1:11, NM; Eclesiastés 11:9). Chiqansa Biblian utjki uka kamachinakax askimatakiwa. Inas wali jarkʼxasitäkasmas ukham amuyaschisma. Ukampis jan walinakatwa jarkʼaqtamxa, kunjamatix autonxa mä cinturonax jan usuchjasiñasataki jarkʼaqkistu ukhama.
Ukhamax jan payachasisaw Bibliar atinisiñama. Ukat ukarjam sarnaqañ amtätaxa, janiw Jehová Diosaruki kusisiykätati, jan ukasti walja suma askinakwa katuqäta (Isaías 48:17).
Kunjamatsa jumax Diosan amigopäsma, uk yatxatañämawa.
BIBLIAX KAMSISA
“Nayätwa Tatitu Diosamaxa, nayasti kunatix jumatakix askïki ukwa yatichsma.” (Isaías 48:17)
AKHAM LURASMAXA
¿Jumax sullkanïtati? Ukhamax Bibliarjam sarnaqañax kunja askisa ukxa kunjamsa qhanañchasma uk amuytʼma. Iyawsäwimat yaqhanakar parlasaw sum amxäsisma.
¿YATIYÄTATI?
Jehová Diosampi sum apasiñxa mä qhawqha minutonakwa aptʼasisma; ukat mayampi sum apasiñatakix mara maraw munasispa.
¡AKANAK LURÄ!
Biblian yatichäwinakapax kunatsa wali aski uk sum yatiqañ munta. Ukatwa ak lurä ․․․․․
Diosar jan istʼirinakjam chuymajan sarnaqañ munä ukhaxa, akwa lurä ․․․․․
Awkijarus jan ukax taykajarusa, ¿kuns aka tuqit jisktʼañ muntxa? ․․․․․
JUMASTI, ¿KAMSASMASA?
● Diosar jan istʼasax jan waliruw pursna, ukampis ¿jan walinakar purisapuniti uk yatiqañasäspa?
● Doris, Miguel, Andrés ukat Teresa wayn tawaqunakan arunakapatxa, ¿kuns yatiqta?
● ¿Kunatsa yaqhipax Biblian kamachinakapax jarkʼxäsistuw sapxixa, ukat ukax kunats jan chiqäki?
[285 janan qhanañchäwipa]
“Jan walinak lurasin chiqañchayasisax usuyasismawa, ukampis jan walinak imantäta ukhax wal chuymax usütamxa.” (Sandra)
[288 janan fotonakapa]
Diosan kamachinakapax jiwasan askisatakiwa, ukatwa jan walinakat jarkʼaqistu
