መጋቢት 29, 2023 | የታደሰው፦ ሚያዝያ 18, 2023
ሩሲያ

ወቅታዊ መረጃ—ወንድሞች ታሰሩ | በእስር ላይ እያሉ የይሖዋን ድጋፍ ማግኘት

አጫውት

ሚያዝያ 17, 2023 በአስትራካን ክልል የሚገኘው የአክቱቢንስኪ አውራጃ ፍርድ ቤት፣ ወንድም ሪናት ኪራሞቭ፣ ወንድም ሰርጌ ኮሮልዮቭ እና ወንድም ሰርጌ ኮስያኔንኮ ጥፋተኛ ናቸው የሚል ብይን አስተላልፏል። እያንዳንዳቸው የሰባት ዓመት እስራት ተፈርዶባቸዋል። ሦስቱም ወንድሞች ከኅዳር 2021 ጀምሮ ማረፊያ ቤት የነበሩ ሲሆን እስራታቸው በዚሁ ይቀጥላል።

አጭር መግለጫ

ሪናት ኪራሞቭ

የትውልድ ዘመን፦ 1987 (ሞስኮ፣ ሞስኮ ክልል)

ግለ ታሪክ፦ ከመታሰሩ በፊት፣ ዌብሳይት (ድረ ገጽ) የማበልጸግ ሙያ እየተማረ ነበር። የተዋጣለት የሙዚቃ ባለሙያ ነው። አማራጭ የሲቪል አገልግሎት በሰጠበት ወቅት ፖስተኛ ሆኖ ሠርቷል

እውነትን የሰማው ከእናቱ ነው። በይሖዋ ምሥክሮች መካከል የተመለከተው ፍቅርና አንድነታቸው ማረከው። በ2001 ተጠመቀ

በ2009 ከጋሊና ጋር ትዳር መሠረተ

የሪናት ባለቤት ጋሊና የሰጠችው ሐሳብ a

ሪናት በእስር ቤት ለመጽናት የረዳው ምንድን ነው?

ሪናት፣ ወህኒ ቤት ላሉ ወንድሞችና እህቶች በሙሉ በግለሰብ ደረጃ ስማቸውን እየጠቀሰ ለመጸለይ ግብ አውጥቷል። በዓለም ዙሪያ በእምነታቸው ምክንያት የታሰሩ ወንድሞችና እህቶችን ዝርዝር በየወሩ እሰጠዋለሁ። እሱም ጊዜ ወስዶ እያንዳንዳቸውን እየጠቀሰ ይጸልያል፤ እንዲህ ማድረጉ ከይሖዋ ጋር ያለውን ወዳጅነት ያጠናከረለት ከመሆኑም ሌላ በራሱ ችግሮች እንዳይዋጥ ረድቶታል። በተጨማሪም መጽናታችን ስለሚያስገኘው ውጤት ከሪናት ጋር እናወራለን፤ በመጽናታችን ግሩም ምሥክርነት እየሰጠን እንዲሁም የይሖዋን ሉዓላዊነት እየደገፍን ነው። ሪናት በአንድ ደብዳቤው ላይ ይህን ገልጾታል፦ “ጠላታችን የቱንም ያህል ኃያል ቢመስል፣ በአባታችን ድጋፍ ድል አድራጊዎች እንሆናለን። ድል እናደርጋለን ሲባል ግን ነፃነታችንን እናገኛለን ማለት ላይሆን ይችላል። ለእኛ ድል ማለት እስከ መጨረሻው ታማኝ መሆን ነው።”

የይሖዋን ድጋፍ የተመለከትሽው እንዴት ነው?

ሪናት በላከልኝ አንድ ደብዳቤ ላይ የጠቀሰው ነገር በሕይወቴ ሲፈጸም ተመልክቻለሁ፤ “በአሁኑ ወቅት እኔ ልንከባከብሽ አልችልም፤ ይህን ኃላፊነት የሚወጣው ይሖዋ ራሱ ነው” ብሎኝ ነበር። እውነትም ይህ ሁኔታ ከጀመረበት ጊዜ አንስቶ ኃያሉ የይሖዋ መንፈስ ደግፎኛል። መዝሙር 91:1 ላይ “በልዑል አምላክ ሚስጥራዊ ቦታ የሚኖር ሰው ሁሉን ቻይ በሆነው አምላክ ጥላ ሥር ይቀመጣል” የሚል ቃል ተገብቶልናል። ከዚህ ቀደም ይህን ጥቅስ ባውቀውም የይሖዋን “ሚስጥራዊ ቦታ” የተመለከትኩት አሁን ነው፤ ከመቼውም ጊዜ ይበልጥ የይሖዋን ጥበቃ አግኝቻለሁ። ይህም በእሱ ላይ ሙሉ እምነቴን እንድጥልና ደስ እያለኝ እንድጸና ረድቶኛል።

ሰርጌ ኮሮልዮቭ

የትውልድ ዘመን፦ 1973 (ፔንዛ፣ ፔንዛ ክልል)

ግለ ታሪክ፦ ፎቶግራፍ ማንሳትና የቤት ዕቃዎች መሥራት ይወዳል

ስለ ሃይማኖት አሉታዊ አመለካከት ነበረው፤ ከይሖዋ ምሥክሮች ጋር ሲገናኝና ስለ ፈጣሪ ሲማር ግን አመለካከቱ ተቀየረ። በ1996 ተጠመቀ

በ2005 ዬካተሪናን አገባ

የሰጠው ሐሳብ

ማረፊያ ቤት በቆየህበት ወቅት ከይሖዋ ጋር ያለህ ወዳጅነት የተጠናከረው እንዴት ነው?

ማረፊያ ቤት ሆነህ ስለ ሁኔታው አሉታዊ ነገር አለማሰብ ትግል ይጠይቃል። ጽናቴ፣ እምነቴ፣ ተስፋዬ እና ፍቅሬ ተፈትኗል። በዋነኝነት የረዳኝ ነገር ጸሎት ነው። ከአባቴ ጋር የልቤን የማወራበት ሰፊ ጊዜ አግኝቻለሁ። በሕይወቴ ውስጥ የአሁኑን ያህል በብዛት ከይሖዋ ጋር ልብ ለልብ የተነጋገርኩበት ጊዜ የለም! ኢየሱስ ሌሊቱን ሙሉ ወደ አባቱ ሲጸልይ ያደረው እንዴት እንደሆነ የገባኝ አሁን ነው። በዚህ ሁኔታ ውስጥ መሆኔ በአምላክ ሙሉ በሙሉ መታመንን አስተምሮኛል፤ መታሰሬ ያስገኘልኝ ትልቁ ጥቅም ይሄ ይመስለኛል።

ሰርጌ ኮስያኔንኮ

የትውልድ ዘመን፦ 1961 (ዬላን፣ ቮልጎግራድ ክልል)

ግለ ታሪክ፦ የአካል ብቃት እንቅስቃሴ አስተማሪ ነው

በ1983 ከኦልጋ ጋር ትዳር መሠረተ። መጽሐፍ ቅዱስ ከታሪክና ከትንቢት አንጻር ትክክል መሆኑ ትኩረቱን ሳበው። በ2002 ተጠመቀ

የሰርጌ ባለቤት ኦልጋ የሰጠችው ሐሳብ b

ተስፋ እንዳትቆርጪ የረዳሽ ምንድን ነው?

ጠቃሚ ተግባራትን በማከናወን ራሴን በሥራ አስጠምዳለሁ። መጽሐፍ ቅዱሳዊ ጽሑፎችን አነባለሁ፤ እንዲሁም የተስፋ መቁረጥ ስሜትን ለማሸነፍ ብርታት እንዲሰጠኝ ይሖዋን በጸሎት እለምነዋለሁ። ሰርጌ የጻፈልኝን ደብዳቤዎች ደጋግሜ አነብባቸዋለሁ፤ ይህ ሁሉ አልፎ ስንገናኝ የሚኖረውን ሁኔታ በዓይነ ሕሊናዬ እሥለዋለሁ። በመጽሐፍ ቅዱስ ላይ የተመሠረቱ መዝሙሮቻችንን ማዳመጤና አብሬ መዘመሬም ረድቶኛል።

ለመጽናት የረዳሽ ጥቅስ አለ?

በ1 ቆሮንቶስ 10:13 ላይ ያለውን ሐሳብ በጣም እወደዋለሁ፤ አምላክ ‘ልንሸከመው ከምንችለው በላይ ፈተና እንዲደርስብን እንደማይፈቅድ’ ቃል ገብቶልናል። ይሄን ሁሉ ነገር በራሴ ብርታት ልቋቋመው እንደማልችል ይገባኛል፤ ይሖዋ ለመጽናት እንደሚረዳኝም አውቃለሁ። ይሖዋ ይህ እንዲደርስብን ከፈቀደ፣ በጽናት ልንወጣው እንችላለን ማለት ነው። ደግሞም ፈተናው የሆነ ጊዜ ላይ ማብቃቱ አይቀርም።

ይሖዋ ለታማኝ አገልጋዮቹ ምንጊዜም መሸሸጊያ እንደሚሆን ማወቃችን ያጽናናናል፤ ‘ዘላለማዊ ክንዶቹን ከእነሱ በታች’ በማድረግ ይንከባከባቸዋል።—ዘዳግም 33:27

የክሱ ሂደት

ኅዳር 9, 2021

የወንጀል ክስ ተመሠረተባቸው። ባለሥልጣናቱ በአኽቱቢንስክ እና በዝናምንስክ የሚገኙ 15 የይሖዋ ምሥክሮችን ቤቶች ፈተሹ፤ ቤታቸው ከተፈተሸባቸው መካከል ወንድም ሪናት ኪራሞቭ፣ ወንድም ሰርጌ ኮሮልዮቭ እና ወንድም ሰርጌ ኮስያኔንኮ ይገኙበታል
ኅዳር 10, 2021

ሰርጌ ኮሮልዮቭ በቁጥጥር ሥር ዋለ
ኅዳር 11, 2021

ሪናት ኪራሞቭ እና ሰርጌ ኮስያኔንኮ በቁጥጥር ሥር ዋሉ። ሦስቱም ወንድሞች ማረፊያ ቤት ወረዱ
ኅዳር 14, 2022

ክሳቸው በፍርድ ቤት መታየት ጀመረ