KƐ HA NIHI NƐ A SƐ GBA SI HIMI MI
3: Nyɛ Je Bumi Kpo Kɛ Ha Nyɛ Sibi
NƆ́ NƐ E TSƆƆ
Ke huno kɛ yo buɔ a sibi ɔ, ke ji kaa a kpa we gbi ngɛ nɔ́ ko he po ɔ, a nuɔ he ha a sibi. Womi nɛ ji Ten Lessons to Transform Your Marriage ɔ de ke, “Huno kɛ e yo nɛ a buɔ a sibi ɔ, ke e ba lɛ kaa a kpa we gbi ngɛ nɔ́ ko he ɔ, a kɛ a sibi sɛɛɔ ní, mohu pe nɛ a ti nɔ fɛɛ nɔ ma de ke e be e juɛmi tsakee. Ke a ngɛ a juɛmi tsɔɔe ɔ, a kɛ bumi buɔ a sibi tue, nɛ a guɔ blɔ nɛ da nɔ kɛ tsuɔ nyagba a he ní saminya.”
BAIBLO SISI TOMI MLAA: “Suɔmi . . . fo we lɛ pɛ e nɔ́ mi.”—1 Korinto Bi 13:4, 5.
“Bumi kpo nɛ ma je kɛ ha ye yo ɔ tsɔɔ kaa e sa nɛ ma na lɛ kaa e he jua wa, nɛ i sume nɛ ma pee nɔ́ ko kɛ pue e hɛ mi si, aloo kɛ puɛ wa gba si himi ɔ.”—Micah.
NƆ́ HE JE NƐ E HE HIA
Ke bu be gba si himi mi ɔ, hunomɛ kɛ yigbayihi yeɔ a sibi he fɛu, nɛ a jɛɔ a sibi. Ní peepee nɛ ɔmɛ ji ni komɛ nɛ níhi a mi hlali tsɔɔ kaa e ma nyɛ ma ha nɛ nihi nɛ a po gba mi.
“Ke o jɛɔ o yo, nɛ o tuɔ e hɛ mi munyu, nɛ o peeɔ ní komɛ kɛ yeɔ e he fɛu ɔ, e ma nyɛ ma ha nɛ e kɔni mi nɛ jɔ̃, nɛ e be mo hee ye, nɛ enɛ ɔ ma puɛ nyɛ gba si himi ɔ.”—Brian.
NƆ́ NƐ O MA NYƐ MAA PEE
MOO KA O HE
Moo ngɔ otsi kake kɛ hyɛ o munyu tutui kɛ o ní peepee. Lɔ ɔ se ɔ, bi o he ke:
‘Si enyɛmɛ nɛ i tu ye huno ɔ loo ye yo ɔ hɛ mi munyu, nɛ si enyɛmɛ nɛ i je e yi?’
‘Mɛni ji ní pɔtɛɛ komɛ nɛ i pee kɛ je bumi kpo kɛ ha ye huno ɔ loo ye yo ɔ?’
O KƐ O YO Ɔ LOO O HUNO Ɔ NƐ SUSU SANE BIMI NƐ ƆMƐ A HE
Mɛni níhi nɛ ke i de loo i pee ɔ, e ma ha nɛ o nu he kaa i buɔ mo?
Mɛni níhi nɛ ke i de loo i pee ɔ, e ma ha nɛ o nu he kaa i bui mo?
GA WOMI
Ngmaa níhi etɛ nɛ ke o yo ɔ pee ɔ, e ma ha nɛ o nu he kaa e buɔ mo. Ha nɛ o yo ɔ hu nɛ ngma níhi etɛ nɛ ke mo hu o pee ɔ, e ma ha nɛ e nu he kaa o buɔ lɛ. Nyɛɛ ngɔ nɔ́ nɛ nyɛ ngma a kɛ ha nyɛ sibi, nɛ nyɛɛ bɔ mɔde nɛ nyɛ tsu he ní.
Ngmaa suhi nɛ o bua jɔ he nɛ o yo ɔ loo o huno ɔ jeɔ kpo. Nɛ o de o yo ɔ loo o huno ɔ bɔ nɛ o bua jɔ su nɛ ɔmɛ a he ha.
“Bumi kpo nɛ ma je kɛ ha ye huno ɔ tsɔɔ kaa ma ngɔ ye ní peepee kɛ tsɔɔ kaa e he jua wa ha mi nɛ i suɔ nɛ e bua nɛ jɔ be fɛɛ be. Pi nɔ́ ngua ko nɛ e biɔ nɛ ma pee, mohu ɔ, ní tsɔwitsɔwi komɛ nɛ i pɔɔ peemi ɔ lɛ tsɔɔ kaa i buɔ lɛ.”—Megan.
Ngɛ lɛ tsuo mi ɔ, pi nɔ́ nɛ he hia ji nɛ o maa na o he kaa o buɔ o yo ɔ loo o huno ɔ, mohu ɔ, nɔ́ nɛ he hia ji nɛ o yo ɔ loo o huno ɔ maa nu he kaa o buɔ lɛ.
BAIBLO SISI TOMI MLAA: “Nyɛɛ wo mi mi sami nɛ mi kuɔ, mi mi jɔmi, he si bami, he jɔmi, kɛ tsui si tomi.”—Kolose Bi 3:12.
