KƐ HA NIHEWI KƐ YIHEWI
9: Moo Le Nɔ Nɛ O Ji
NƆ́ NƐ E TSƆƆ
Pi o biɛ kɛ bɔ nɛ o nɔmlɔ tso ngɛ ha a pɛ nɛ tsɔɔ nɔ́ nɛ o ji. O subai, níhi nɛ o heɔ yeɔ, kɛ bɔ nɛ o baa o jemi ha a hu piɛɛ he. Ngɛ anɔkuale mi ɔ, nɔ nɛ o ji ɔ ji bɔ nɛ o ngɛ ha tutuutu ngɛ kpo nɔ kɛ laami mi tsuo.
NƆ́ HE JE NƐ E HE HIA
Ke o le nɔ nɛ o ji tutuutu ɔ, o maa pee níhi nɛ o heɔ yeɔ mohu pe nɛ o maa ngmɛ blɔ nɛ o juami bi nɛ a kudɔ mo.
“Nihi fuu ngɛ kaa tso bihi nɛ a kɛ juaa tadehi ngɛ tsuapohi a mi. Pi mɛ nitsɛmɛ nɛ a hlaa tadehi nɛ a maa wo, ni kpahi nɛ a hlaa nɔ́ nɛ a maa wo ha mɛ.”—Adrian.
“Ke i kɛ nyagba nɛ mi wa ko kpe ɔ, i bɔɔ mɔde kaa ma pee nɔ́ nɛ da ke jã a peemi he wa po. Ni nɛmɛ nɛ a ji ye huɛmɛ nitsɛnitsɛ ɔ ji nihi nɛ ke i ngɛ a kasa mi ɔ, ye bua jɔɔ, ejakaa a ngɛ bu kɛ ha je mi bami he mlaahi nɛ i kɛ tsuɔ ní ɔ.”—Courtney.
BAIBLO SISI TOMI MLAA: “Nyɛ ha nɛ níhi a blɔ nya tomi nɛ ɔ nɛ jɔɔ nyɛ kudɔmi, mohu ɔ, nyɛ ha nɛ a tsake nyɛ kɛ gu nyɛ juɛmi nɛ nyɛ maa hi tsakee ɔ nɔ.”—Roma Bi 12:2.
NƆ́ NƐ O MA NYƐ MAA PEE
Moo kpa o mi nɛ o hyɛ o nyɛmihi, o gbɔjɔmihi, kɛ níhi nɛ o heɔ yeɔ, bɔ nɛ pee nɛ o le nɔ nɛ o ji tutuutu amlɔ nɛ ɔ, kɛ nɔ nɛ o suɔ nɛ o ma ba pee hwɔɔ se. Sane bimihi nɛ nyɛɛ se ɔ maa ye bua mo nɛ o le nɔ nɛ o ji.
O nyɛmihi: Mɛni nguɛ nya ní tsumi loo ní kpa komɛ nɛ i nyɛɔ peeɔ? Mɛni ji níhi nɛ i bɔɔ mɔde ngɛ a mi wawɛɛ? (Kaa nɔ hyɛmi nɔ́ ɔ: Anɛ i yeɔ be nɔ lo? I yeɔ ye he nɔ lo? I tsuɔ ní wawɛɛ lo? Ye mi mi jɔ lo?) Mɛni ní kpakpahi nɛ i peeɔ ɔ?
GA WOMI: Anɛ e he wa ha mo kaa o ma yɔse ní kpakpahi nɛ o peeɔ ɔ lo? Ke jã a, lɛɛ mo bi o fɔli loo o huɛ ko nɛ o he lɛ ye konɛ e tsɔɔ mo nyɛmihi nɛ o ngɛ, kɛ nɔ́ he je nɛ e de jã.
BAIBLO SISI TOMI MLAA: “Nyɛ ha nɛ nɔ fɛɛ nɔ nɛ e hyɛ lɛ nitsɛ e ní tsumihi a mi, kɛkɛ ɔ, lɛ nitsɛ pɛ e ma ná nɔ́ ko nɛ e maa da nɔ kɛ nya nɛ pi kaa e kɛ e he ngɛ nɔ kpa ko he toe.”—Galatia Bi 6:4.
O gbɔjɔmihi: Mɛni ji su komɛ nɛ i jeɔ kpo nɛ e biɔ nɛ ma tsu a he ní? Mɛni si fɔfɔɛ mi nɛ ke i ya je ɔ, e he wɛ kaa ma pee nɔ́ yayami? Mɛni ji si fɔfɔɛ komɛ a mi nɛ e biɔ nɛ ma ye ye he nɔ wawɛɛ?
BAIBLO SISI TOMI MLAA: “Ke wa de ke, ‘Yayami be wa he’ ɔ, wɔ nitsɛmɛ wa he nɛ wa ngɛ sisie.”—1 Yohane 1:8.
Níhi nɛ o heɔ yeɔ: Mɛni je mi bami he mlaahi nɛ i kɛ tsuɔ ní, nɛ mɛni he je? Anɛ i heɔ yeɔ kaa Mawu ngɛ lo? Mɛni odasehi lɛ haa nɛ i náa nɔ mi mami kaa Mawu ngɛ? Mɛni ji ní peepee komɛ nɛ i naa mɛ kaa a hí, nɛ mɛni he je? Mɛni nɔ mi mami nɛ i ngɛ kɛ ha hwɔɔ se?
BAIBLO SISI TOMI MLAA: “O he nile, kɛ o nɔ́ sisi numi maa bu o he.”—Abɛ 2:11.
Eko ɔ, O Bua Maa Jɔ Enɛ ɔ Hu He
SANEHI 10 NƐ NIHEWI KƐ YIHEWI BIƆ Ɔ A HETOHI
Kɛ I Ngɛ Ha Kɛɛ?
Ke o le níhi nɛ o heɔ yeɔ, níhi nɛ o nyɛɔ peeɔ, o gbɔjɔmihi, kɛ otihi nɛ o kɛ ma o hɛ mi ɔ, lɔ ɔ maa ye bua mo konɛ o nyɛ nɛ o pee juɛmi nɛ da ke nihi ngɛ o nɔ nyɛe po.
