¿Xí rasuidy profetas lóono de Dios?
Ma de goló xidzú íz, Dios biquiin profetas par ñaibybu buñ xi raniiny gonybu. ¿Ló la Biblia raiby Dios lóono xí raquiin gonyno par guicaʼno xcalnasácbu la? Scú. Guisuidyno xi goniʼ tzón profetas xtuny Dios.
ABRAHÁN
Dios ragobiobu guirá buñ né raniiny láabu guidudybu galnasác a guirá buñgudxlio.
Dios góoch a Abrahán: «Guirá famil sacaʼ galnasác por looy» (Génesis 12:3).
¿Xí rasuidyno? Que Dios nigolú ronladx lóono né raniiny guidudybu galnasác a guirá famil (buñguieeu, buñgonaʼ né mbioxien) ni rasob láabu.
MOISÉS
Dios napbu galrronladx né radudybu galnasác buñ ni rony xtem por guimbutzaay láabu.
Dios ni nap Xiroʼ galnadip, bidudybu galnadip Moisés par ñony galrradziguiaʼ. Ná scú, Moisés gonabbu lóo Dios: «Bisuidy xinéslo naʼ par labúu guimbuya looy né diti cueʼlo naʼ tiplad» (Éxodo 33:13). Dios bioladx ni gonab Moisés né bidudybu a Moisés galnan né gocnébu Moisés nimbu mod nacbu né mod ronybu. Por ejemplo, Moisés bieen que Dios «nap galrronladx né riembu xi rasac buñ» (Éxodo 34:6, 7).
¿Xí rasuidyno? Que Dios sadudy galnasác a guiráno (buñguieeu, buñgonaʼ né mbioxien) pal ronyno xtem por guimbutzaayno láabu. Ló Xtiitzbu la Biblia, raibybu lóono ximod gony adorarno láabu né nigolú raniiny guidudybu galnasác a guiráno.
JESÚS
Jesús binladxbu buñ né bisialbu guirá clas galguitz.
Dios sadudy galnasác lóono por tipzó pal rasuidyno ni buny né ni bisuidy Jesús.
Xtiitz Dios raibyni lóono xi guirá buny Jesús né ximod bisuidybu buñ. Dios bidudy galnadip a Jesús par ñony xidal galrradziguiaʼ, Jesús bixalbu bisaló buñ ni diti labúu bibiʼ, bixalbu guidiag buñgüet né bisialbu buñ xot. Dada golísbu tipnés buñ lad gueʼet. Modcu bislooybu xi láani gony Dios ló dzú ni sietra. Jesús golexa xi raquiin gonyno par guicaʼno galnasác reʼ: «Ndeʼ radudy diitz guibany buñ tipzó: que guimbuyibu looy, toibguielot Dios ni nigolú, né guimbuyibu xiinlo Jesucristo ni bixelo» (Juan 17:3).
Jesús binladxbu né godabiobu guirá buñ. Tanli buñguieeu né buñgonaʼ de guirá clas íz cuacuentyibu invitación ni buny Jesús: «Colguisuidy de naʼ, portín naca buñ nadaʼa né buñdxo. Ronoʼya sasaladxto» (Mateo 11:29). Jesús diti góc xomod tipnés buñguieeu ni bibany ló xtzúbu, layibu diti sacró godabioyibu buñgonaʼ per Jesús binladx né gop respet buñgonaʼ.
¿Xí rasuidyno? Jesús nigolú binladxbu buñ né bisiambu toib ejemplo sacró ximod cobiono saʼno.
JESÚS DITI NACBU DIOS
La Biblia raiby lóono que «nosi noʼ toib Dios» né que Jesús góc buñdxo né bidudy mensaj xtuny Dios (1 Corintios 8:6). Jesús nayadit goniʼ que Dios rasanir nislóbu né que Dios bixel láabu ló Gudxlio (Juan 11:41, 42; 14:28). *
^ Párrafo. 17 Pal nainy looy ganlo más de Jesucristo, bisuidy lesiony 8 né 9 xtuny follet ni laa, La fe verdadera, la puerta a una vida feliz, noʼni ló www.isa4310.com.
