BUNYSI pensary que cabiʼlo toib video de toib buñguieeu ni nan raguit pelot né radziguiaʼlo mod raguitbu. Video reʼ rasaló raslooyni dzú gócbu mbioxien, dzú rasuidybu raguitbu pelot né ximod nadip rony entrenarbu. De ngú rabiʼlo que raguitbu né toib equipo ni xidal buñ rimbu né rieebu stipnés gudxrop. Diti xidzú, rarecaa tipnés retrat ro bunybu gan xidal premios, né órni ralox video reʼ, raitybu.

Guirá ni godudy ló video reʼ nigolú gocni, per buñguieeu ni bireʼ loni ma goity. Né scúca rasaclóo toib buñnan o toib buñ ni xidal buñ rimbu. Ná layibu labúu ñonyibu xidal cós laʼga nabanyibu, sigory ranabdiitzno xi más labúu ñonyibu pal diti ñoʼxyibu né ñaityibu.

Nabanni, per guiráno sadxin dzú saityno (Eclesiastés 9:5). Ná ronyno xiroʼ xtem por guibanyno, guiráno rioʼxno né raityno. Láaca, tisintiempsi labúu gaityno ló toib desgrasy o toib galguitz labúu tzané lóono lainy baʼ. Xomod ná la Biblia, nacno xomod «goxbe ni tisintiempsi rarecaa né nimaca ranitló» (Santiago 4:14).

Tipnés buñ rony pensary que diti nanno xi guisaclono guixí né que nac nacsi nabanyno, por ngú náyibu: «Guáno né gueeno portín guixí saityno» (1 Corintios 15:32). Per ¿órni raniʼyibu scú raslooyibu que cabésyibu galgoity ja? Guirácano radxin dzú ranabdiitzno lóocano: «¿Xigony noʼno ló Gudxlio?», máspa órni cadudyno ló galrrioʼob. ¿Pu lagary labúu guidzelno ro rarexa galrranabdiitz reʼ?

Xidal buñ rayopyibu galrracné ló ciencia. Científicos né doctor ma bidzelyibu tipnés cós ni racné buñ par guibany más tiemp. Né stipnés buñnan cayopyibu mod guibany buñ más tiemp. Per ná pal guirebuʼ xchiinyibu o yaca, noʼ tipnés galrranabdiitz ni yása guirexa, xomod: ¿Xigony rioʼxno né raityno? ¿Sioʼ dzú ma diti saityno la? Ló artículos ni sieed guitlaa temas reʼ né sarexa galrranabdiitz reʼ: ¿xigony noʼno ló Gudxlio?