“Mi aima asada ka geda Baibiri, ono pa wai gbangaha ninaasa re mi naabi tire nga siima fu rii ome re!”—Briana.

 Ya mo kina gu bangisapai re du tipa ro? Gi kekeapai re ima rengba ka undo ro!

•  Tipagine si aida mi gedi Baibiri ti ni?

•  Waigu si aida mi gedi Baibiri?

•  Gupai akuaro agumbaha

 Ya mo gu berãpai nga ga geda Baibiri, mo nabihe ni gupai afunga ngbarago ya? Ka singia wo duhe, ani ima rengba ka rugatirani na ni. Mo ima rengba kaa berãpa Baibiri ni gu buku du na rukutu akpehe kisusi akutu na adunga asura rogoho ya—ka i ringbisihe kuti bi TV gbiati avidio, kina bi TV gbiati avidio rengbe ka ngba tiro!

 Ono mo berẽnga kuriihe ngba gi gene re: Ka mo ye ka kura bara gu kuru baigo ahe nadu mbata kusayo, ya mo mo dunga na nyemu ka ino guhe du vuruhe yo te?

 Baibiri na wene aũkumuko rogoyo. Si na wene nyanyaki apai nga ga tatamana rogoyo nga gu naima rengba ka undo ro

•   Mo mangi wene adiaberã

•   Mo nimangipai ngba wene gene na avunguro

•   Mo zi wene abakure

•   Mo mangipai kuti afuda berãseyo

 Waigu gu kuru buku naima du bakuru kusayo re narengbe kadu na aundo ti ni furani areme? Si wo mbiko, “Ziazia Kekeapai dunduko si aye be ga Mbori Toro.” (2 Timoteo 3:16) Naida ka ya, agu arugute du rogo Baibiri, mburuhe aenge be gu tatamana tatamana boro kisusi du rogo haurago.

 Gene sa nga ka geda Baibiri ti kpewaraga kuti kura kpe waraga. Si nika saro mo ini pa gu memeapai du rogo gu pangbanga yo nga ga Baibiri. Dungu agene du ho tipa geda Baibiri. Mo bingo agi akpiapai du ue re:

•    Mo ima rengba ka geda gu rukutu abuku du 66 rogo Baibiri kina ti genehe, tona ti Bambatapai ki da kuti Yugoti.

•    Mo ima rengba ka geda Baibiri, ringbisihe kuti wai agu apangbanga du rogoho aamanga.

 Berãpai: Appendix A7 rogo New World Translation nafu tangaratangara apai ti genehe tipa gu banguapai namangi rogo ga Yesu raka yo auru kpotosende ane.

 Ue gene tipa ka geda Baibiri nga ka sia gu pangbanga nga gu nandu wa sa na gu kpakarapai mo agbia tiro na ni. Ni kpiapai:

•   Ya mo mo naida ka gbia agu abakure nga aguyo du mo na kido kuti yo? Mo gedi gu pangbanga nga ga Yonatana na Davide. (1 Samuere kapita 18-20) Fuoho, mo gbata agu apai rengbe mo ka mangaha rogo mangimangipai yo rogo gu pangbanga re.

•   Ya mo mo naida ka nyakasa gu rengba du mo na ni ka ne aasada? Mo gedi gu pangbanga du tipa wai Yosefa ane aasada. (Bambata Pai, kapita 39) Fuoho, mo ki bi agu apai rengbe mo ka wirikaha rogo mangimangipai yo ti gu pangbanga re.

•   Ya mo mo naida ka ino wai rengbe kparakpee ka undo ro? Mo gedi gu pangbanga du tipa Nemaya. (Nemaya, kapita 2) Fuoho, mo ngere ti gu goapai nayugo pa gu ome nadu ti ga Nemaya kparakpee.

 Berãpai: Ho mo ageda Baibiri ni, si naida rago ongo patiro kii tipa wa ka mo moi berãro kuti gupai mo agedaha.

 Gu biata gene tipa ka geda Baibiri nga, mo sia pangbanga, watadu bia tambuahe ka gedaha na fuoho, mo ki makiapa wai rengbe gupai re ka biro. Tifuo geda moho, mo sananga tiro na agi asanahe du re:

•    Tipagine du Yekova aidi ti ni i ke gipai re ku rogo Baibiri?

•    Ginipai si ayugoho tipa asino Yekova, gbiati gu gene ko amanga apai ngbaha?

•    Waigu rengbe mi ka mangasunge na gi pangbanga re rogo gimi raka yo?

 Berãpai: Mo moi säsä! Mo ke gu ramediwi ku sande nga gu mo aida ka tona gu gamo mbakadapai nga ga geda Baibiri ti ni.