A wa ani nabihe ti gu vura namanga Ukraine yo, dungu abangbembatayo rogo gu pambori nga ga aKristano nangarasa aboro tipa i sovura. Mo bingo wai bete kura agbia pambori asongoda gayo aboro tipa i sovura:

•   “Ani nafu bakere irisa na bakere tambuahe fu gaani abasovura du Ukraine ane tipa sovura kuti avurayo tipa gayo ringara . . . Ani namanga kparakpee kina boro kpotoraniyo tipa roni na ani nikaa songoda roni ti aregbo dunduko.”—Metropolitan Epiphanius I nga ga Kyiv ko, a wa i atingidihe rogo The Jerusalem Post, Marungu 16, 2022.

•   “Barii gu kanisa nga ga Orthodox du Russia yo amangi kparakpara mbakadapai nga ga pambori rago Poso na ko angarasi abanzengere tipa i sovura ka banda gu ringara ‘zereda na nyemuse’ nga Russia wa Moscow andu kindi kumbatayo na gayo vura kuti Ukraine.”—Reuters, Zerekpe 3, 2022.

 Ya mo si naida aKristano niso vura? Ginipai Baibiri ayugoho?

 Baibiri nayugo gupai nga ndikidi apekefuo Yesu Kristo arimisongo tiyo kurogo sovura te.

•   “Mo mói ga basape ku sirikpa ha yo. Bambiko agu yo dunduko naroga basape i akpi kina be basape.”—Matayo 26:52.

   Ya mo gu boro nasongoda vura watadu nasovura nagiasangba Yesu nzunzu?

•   “Vovo rugute fu mi fu roni nga, oni kpi nyemu akuaroni akpi; a wa mi akpi nyemu roni, oni kpi nyemu akuaroni a wo. Ka oni akpi nyemu akuaroni, si ka aboro ini ti ni dunduko ya gimi abawiriki nga oni.”—Yoane 13:34, 35.

   Ya mo gu boro nasongoda vura nayugo ngbatunga gu nyemuse Yesu agumba paha nga si i nika ino gako abawiriki watadu apekefuoko ti ni?

 Tipa ka ino kura apai, mo gedi gu kekeapai nga “Is War Compatible With Christianity?”

 Ya mo si ruaru fu aKristano areme i ne rimisotiyo kurogo vura? Ii. Baibiri aima agumba gupai nga, ti gi gaani regbo i ayambaha nga “yangara arame” re, aboro dagba rikaaboro dunduko ‘awírika nga pa sovura berewe te,’ a wa Yesu ayuguhe.—Yesaya 2:2, 4.

•   Tipa ka ino kura apai, mo gedi gu kekeapai nga ga Ngbaõbambu Sinziri du riihe nga “Wai du Mbori Abi Vura?”

 Barambeda, Yekova a nga “Mbori zereda” nika mangasunge na gu gako zogarago du ngbangbaturũ yo tipa ka batasa aboro be “bau pai na zuu.”—AFiripoio 4:9; Atambuahe 72:14.

•   Tipa ka bi wai ko nika mangaha, mo bi gu vidio nga Ga Mbori Kindo Nga Gine?