Badungu airangbii rogo zegino kirikiri naida gupai be aboro nga i nisungu na dagba ti akurayo na i aidanga aboro naadunguratiyo ku rogo ba sa te. ADezire Yekova ima diaberã kaa irisa agu andiko nga ga airangbii re ono kini ndu kindi kumbatayo kaa irisombori kina sa na akurayo. Tipa ka manga gipai re, adungurati namangasunge na vidio apps, wa gu nga, Zoom, tipa kaa manga adunguratise.

 Tipa ani naamanga gaani adunguratise dedede, Riigbu Bipasunge amangisunge na gu marã i afuhe ni gamahe tipa ka tumo aira Zoom tipa i zaki gene fu adungurati tipa i nimangi dunguratise rogoho. Gere ima du ni pa undo fu agu adungurati kaa tumongo gu marã nga 15-20 adorari watadu kuari ti gu re tipa kaa manga adunguratise rogo Zoom ya. Agi adungurati re anaamangasunge na kina gu nga ga gbua nga gu nadia kina bete aboro na adunga ni bandabandaha ya. Ono awere, agu adungurati dunduko namangasunge na gu Zoom riigbu natumo tipaha ima rengba ka manga dunguratise na badungu aboro ti aregbo dunguratise nibasasa. Ka da ku awere, adungurati naima susa 65,000 rogo aringara naima susa 170 namangasunge na gu Zoom riigbu natumo tipaha re.

 Gu dungurati nga Kairagi, du Manado, North Sulawesi Indonesia yo, ambu mangasunge na gu Zoom nga ga gbua ki tona mangasunge na gu Zoom riigbu atumo tipaha. Wiriba Hadi Santoso asakipai tipaha nga: “Zavura agu awirina ainongo wai ka mangasunge na erekturoni wenengai ya, ima rengba awere kaa du pati adunguratise dunduko bambiko si aidanga gupai beyo berewe nga i naarimo ku rogo Zoom bara dunguhe ti regbo bangisa dunguratise sa te.”

 Lester Jijón, Jr., nga bakumba rogo gu dungurati nga Guayacanes Oeste du Guayaquil, Ecuador yo, agumba gupai nga: “Mbiko gu zingo marã du dungu awirina na ni i aarengbanga ka tumo fu aira Zoom tipa gupai nga aboro rogo dungurati nabayo dunduko du pati adunguratise te. Ono awere tie, wa i naima tumo tipaha ani ima rengba ka yamba aboro tipa i ye ka du na ani pati dunguratise zanga gunde tipa bange agu aboro ani ayamba yo.”

 Johnson Mwanzanga nga bakumba rogo gu dungurati nga ga Ngwerere North du Lusaka, Zambia yo aya: “Dungu awirina ima pe gupai bara dunguhe nga gu mbakadapai nga ga riigbu du tipa Zoom asangaha si du taata furani ani mbedi na kina awirina gbua te, ono si nasarani ani bi tirani nga Yekova na kpinyemu rani akpi na kini ngerefuo rani.’”

 Gu Zoom riigbu natumo tipaha re, i natumo ho na gu marã i afuhe tipa sunge fu undo. Gu marã aboro afuhe tipa si songodi sunge tungusapai rogo zegino dũ, si du na undo tipa gi ngbatunga asunge re. I nafu badungu agi agamaha re rogo gaani bangiriba nga donate.isa4310.com. Tambuahe furoni tipa gu gamahe oni afuhe esuesu re, si naundo a tipa gu sunge fu undo namanga rogo zegino dũ.—2 AKorindo 8:14.