1, 2. Ginipai kura aboro aberãha tipa Mbori?

DUNGU aboro naberãha nga wiri ngbaya ho du dagba gupai i amangaha na gu Mbori amangaha te. Nirengo, bete aboro nabihe nga Mbori aberãnga pa agu apai namanga aboro te. Fuo gu kere bavugumo i aayambaha nga Super Typhoon Haiyan gbarasi gu ringara nga Philippines rogo Ngbangba 2013, gu bakere pa-boro nangerafuo gu gbata re aya: “Si nawira wa Mbori adu rogo gu kura ba kia.”

² Gu kura aboro namangapai wa Mbori abingo agu apai i amangaha te. (Yes. 26:10, 11; 3 Yo. 11) I wakina agu aboro Pauro afura tipa yo ho ko ayani wẽ: “I aka berã pa Mbori.” Ngbatunga agu aboro re “hi be irairapai, gbegberẽpai, kpihe, [na] ngbaduse.”—Rom. 1:28, 29.

3. (a) Gini asanahe rengbe ani ka sana tirani na ni tipa Mbori? (b) A wa mangiyo sunge na ni rogo Ziazia Kekeapai, “be” Yekova narukuba gine dedede?

³ Na ginipai du tipa rani tigaani? Ani wa agu aboro i nafura tipa yo kuari re te, ani ima inoho nga Yekova nabi agu apai dunduko ani mangaha. Ya mo ani inihe nga ko na kina nyemurani na beko nasongoda rani asongoda? Kurigure, ya mo ani dagba aguyo  Yesu afura tipa yo ya “i abi Mbori”? (Mt. 5:8) Tipa ka ino rogo gupai re, si naida ani wisigingo bete akpiapai nga ga Ziazia Kekeapai mbata nga ga agu aboro nabi bee Mbori si nimangipai gbiati aguyo naka ka mangaha wo. Fuani ani nika wirika wai rengbe ani ka bi bee Yekova ziazia rogo gaani raka yo na gu bangirani nga ga idapase. Wa ani kaa wisigo agi apai re, ani moi gupai ku berãrani yo nga Ziazia Kekeapai dedede nafura tipa “be” Mbori ho si afura ni tipa wai ko amangasunge na gako ome, nga gu ko amangasunge na ni ka undo gako amoyambu na ka diabe avurako.—Oni gedi Pa Fu Rugute ni Ue he 26:8.

4. Tipagine avura aYisaraere aka ka bi bee Yekova si nimangisunge?

⁴ Rogo gu pangbanga nga ga aYisaraere, aboro aima du na momu beyo tipa ka bi na ka gia wai Yekova aamangapai kuba aYisaraere. Yekova abatasi gako aboro ngba iʹiriwo gene Ezipeta yo, na ki gbarasi dungu abakindo naasovura kuti yo. (Yos. 9:3, 9, 10) Wa agu abakindo naadu pavuru Yaradene ku padiyo avura gia agi apai re na ki bihe, ‘i adunguratiyo wa boro sa, ka sovura kuti Yosua na aYisaraere.’ (Yos. 9:1, 2) Zavura ho agi abakindo re atona ka sovura ni, i aima bi bee Mbori si ni mangisunge. Vurube ga Yekova rugapai, “uru ki ru aru zaa, diwi ki ru a, da kina ho gu rikaaboro airi bape ni ti avurayo.” (Yos. 10:13) Ono Yekova ‘anyakasi kpoto avurayo yo, i ndu fuo aYisaraere ni vura.’ (Yos. 11:20) Avura aYisaraere aaidanga ka ida kuti gupai nga Yekova aasovura tipa aYisaraere te, na gipai re asa gupai nga Yekova dibe yo.

5. Ginipai gu gbegberẽ Bakindo nangia Aba aka ka idaha?

⁵ Kusa, gu gbegberẽ Bakindo nangia Aba aima du na momu beko ka bi bee Mbori rogo agu apai naamanga. Eriya aya fuko wẽ: “Ndomo ati nga na mai rogo agi agarã te re, kina kuti sangbare.” (1 Aba. 17:1) Nirengo, Yekova adu kina kugii agu afugo re, ono Aba aima ka ká ida kuti gu gopai re. Kusa, Aba abi we si niye ngbangbaturũ yo ho Eriya akpari ni tipa we si riti gako motumo. Fuani Eriya ayugu gupai nga Yekova nika digiso gu ugure re na ki ya fu Aba: Mo “zorõ, ka mai dika nga ro ya.” (1 Aba. 18:22-45) Aba aima bi agi apai re dunduko si nimangi, ono wa si vura duwo, ko aka ka ida gupai nga nyanyaki bee Mbori nga ga ome du naamangapai. Gi kpiapai re gbiati agu niye mbata fuhe nayugo nyanyakipa pai furani nga, ani duwa ka ani inihe nga bee Yekova du namangasunge.

6, 7. Ginipai kura aboro abihe ziazia ti rago Yosua?

⁶ Kura aboro aima bi be Mbori si nimangisunge, i aadunga wa gu gbegberẽ abakindo re te, wa vura duhe nga apai adu tipa yo wakina gu ani nifura tipaha kuari re. Ni kpiapai, aboro Gibona amangi zereda na aYisaraere, i aadunga wa gu dungu arikaaboro naasovura kuti aYisaraere ti regbo Yosua te. Tipagine? I aya: “Gamo amoyambu naye . . . mbiko rimo Yekova ga Mbori. Bambiko ani gi pande ko, na gu pai ko amangi.” (Yos. 9:3, 9, 10) I aima inoho nga Mbori du naasongoda aYisaraere.

⁷ Raba aima bi bee Mbori nibi agu apai namangi ti rago ri. Fuo ri ini wai Yekova abatasi gako aboro, ri aya fu agu abamoirago ue nangia aYisaraere wẽ: “Mi ini ya Yekova fu gi ringara re furoni.” Wa si avura du nga gu diaberã re adu ni kpakarakpakaraha furi, ri adu na idapase kuti Yekova nga ko nika batasa ri na gari aborokporo.—Yos. 2:9-13; 4:23, 24.

8. Wai du kura aYisaraere abi bee Mbori si nimangisunge?

 ⁸ Gu kura aboro aadunga wagu gbegberẽ Bakindo nangia Aba te, i aima bi bee Mbori si nimangisunge ho Yekova akaragapai ni fu Eriya tipa we ye ka ri gako motumo. Ho i abi gu we ni naye be Yekova si niri gu motumo re i aya: “Yekova, ko nga [ndikidi] Mbori.” (1 Aba. 18:39) Gipai re aima du fuyo gbaiga!

9. Wai rengbe ani ka bi Yekova gbiati bee ko areme?

⁹ Agu akpiapai du ni wenehe gbiati gbegberẽhe ani nawisigihe re naundo rani ani rugu tirani na rogo gupai bi bee Mbori ayugoho watadu ho si amangasunge ni. Wa ani ka inoko, ani a nika bi bee ko mbiko ani ima ino asinoko na gako mangapai na gu ‘bangirise nga ga kpotorani’ yo. (Ef. 1:18) Nirengo, si naida ani du wakina agu aboro naadu mbata gbiati aguyo du awere naima bi bee Yekova si nisongodi gako aboro. Wa vura duhe wo, ya mo ani na gopai berani nga bee Yekova naundo gako aboro areme?

10. Gini gopai du berani nayugo gupai nga Yekova naundo aboro areme? (Oni bi gu sura du ti tonatonaha.)

¹⁰ Ani na badungu nduapai berani tipa ka ya Yekova naundo gako aboro kindi. Dedede, ani aima gia agu akpiapai nga ga agu aboro nakpari fu Mbori tipa ko undoyo rogo toro yo na ko ki ima undo yo. (Tam. 53:2) Baraho wirina nga Allan aatungusapai ni kporo na kporo rogo gu gbaria nga Philippines, ko agbia dee natona ka kpara. Ko aya: “Rogo gu wiso re, ri akpari fu Yekova tipa ko kedi gako Dezire wa ka ni gbia ri. Ho ri adu ni ni sosono degude, ri awiriki Ziazia Kekeapai na Dezire Yekova sa ono ri aabingo gu Dezire Yekova re berewe te fuo diari kumba na ki guari rogo gu gbaria re. Mbori aima karagapai kuti gari kparakpee niʹipo, si du rago angba tiri ti ni.” Si adi ri na garã sa ri ki kpara gari raka fu Yekova.

11, 12. (a) Rogo gini gene Yekova aundo gako amoyambu? (b) Oni penga gu kpiapai du tipa gu boro Yekova aundo ni.

¹¹ Dungu ga Yekova amoyambu naima bi gu gopai nayugopa wai Mbori aundo yo ho i ambu gu ngbatunga mangapai ni duwa vugundö, dia kere angua kutii kpotose yo, watadu bi agu ahe nayugo kundiri aboro. Bete aguyo naya i aasadi bara dunguhe ka mbuhe ngba gayo ome ka i adunga na diabese ya. Ono tie, ho i akpari ni fu Yekova tipa undo, ko aima fu “gu bakere tandu susi” fuyo na i ki ima diabe gayo arungbura.—2 Kor. 4:7; Tam. 37:23, 24.

¹² Yekova ima undo dungu gako amoyambu tipa i sovura kuti akpakarapai. Ni kpiapai, Amy asota ho ri atona mangasunge dua aBambu Kindo ni gbiati ga amokedi kporo rogo gu Kisanga nga Pasifiki. Ri aya: “Ani aasungo rogo tooni bambu ti marã, na aʹuru dunduko ani anaandu ngba gu gene du na ime rogoho tipa ka da basunge yo.” Si aidi ri tona ka manga apai ringbisihe kuti sino gu rago re, na dedede karaba (électricité) aadunga yo na ime te. Ri agbia kurapai kutini nga: “Gu nagberẽ agberã gbe nga, mi azingi kuti wirina nga dee naamanga sunge yo na ani. Mi aga ku kporo yo kidu na kina bakere gberãrago. Yuru rogo gu ba ani aara rogoho, mi akpari fu Yekova na ki sanako tipa undo.” Ho karaba atona ka kii ni berewe, Amy adi Ngbaõbambu Sinziri naadu na pa agu aboro nanyasi gu sukuru nga ga Girada rogoho na si asakipai tipa agu apai dunduko ri aasota na ni wa: vovo sino mangapai, zingo tipa agumeri, na kodatise na vovo aboro. Ri aya: “Mi abihe nga Yekova du nafura fere rogo gu yuru re. Si afu undo fere tipa mi ndu ku mbatayo na gimi sunge.”—Tam. 44:25, 26; Yes. 41:10, 13.

13. Gini gopai du berani nayugo gupai nga Yekova naundo gako aboro tipa i “banda” wene pangbanga?

 ¹³ ADezire Yekova ima du na diabese rogo “pa banda” wene pangbanga, na si nga gu gopai nayugo gupai nga bee Yekova du ni nyanyakihe naundo yo. (Frp. 1:7) Gu kura agbia-ngbi aima manga ome tipa ka rugusa gu sunge nga ga ga Mbori aboro nyeanye kindi. Ono ho ani angera ni kusayo ka bi gupai nga aDezire Yekova ima du na diabese nga ga angbanga wa 268 kodihe na agu 24 rogo gu Bapengbanga Nga ga Putu Du Tipa agu Arengo Nga ga Aboro natona rogo gu garã nangia 2000, si nayugoho ziazia nga bee Yekova na kina yo.—Yes. 54:17; oni gedi Yesaya 59:1.

14. Wai du ani abi bee Yekova rogo gaani sunge tungusapai gbiati gu kodatise du dagbarani?

¹⁴ Gu tungusapai namanga rogo zegino dunduko nayugo pa ga Yekova undo. (Mt. 24:14; Amo. 1:8) Kurigure, gu kodatise nga ga ga Yekova aboro du rogo zegino dunduko areme, si nga gupai aboro zegino arengbanga na ka mangaha ya, na ani nabi ndu gupai abi kura aboro aya ti ni wẽ: “Mbori du dagba roni yo nirengo.” (1 Kor. 14:25) Ani na bakere gopai berani nayugoho nga Mbori namangapai kuba gako aboro. (Oni gedi Yesaya 66:14.) Ono tie, ginipai du tipa ro tigamo? Ya mo mo nabi bee Yekova rogo gamo raka yo?

15. Oni sakingo wai du rengbe ani ti kura regbo ka zanga bi bee Yekova si nimangisunge rogo gaani raka yo.

¹⁵ Gini bete nduapai rengbe ka sa gupai nga ka ani bingo bee Yekova rogo agu apai ani amangaha ya? Agu akpakarapai nga ga raka ima rengba ka fu rii omerani. Ho pai amanga ni wa gure, bangirani ima rengba ka go ti wai Yekova naundo rani. Ho Nakindo Izebere aserekpo gu nebi nangia Eriya ni, bangiriko aima go ti agu apai Mbori amangihe fuko. Ziazia Kekeapai nafura tipa Eriya niya: “Ko ki sana he Mbori idi he fu ko ko kpi.” (1 Aba. 19:1-4) Gini ziga si aaidaha tipa gu kpakarapai Eriya adu rogoho? Si aaida ko ngere ku be Yekova tipa ngarasaro.—1 Aba. 19:14-18.

16. Ginipai rengbe ani ka mangaha tipa ka bi Mbori wa Eyobo amangihe?

 ¹⁶ Agu akpakarapai namangi Eyobo asako ko ni berẽ kina agu apai naamanga zanga ko berẽkurii ga Yekova bipai. (Eyo. 42:3-6) A wa si adu tipa Eyobo, si ima rengba ka ida ani mangi ome tipa ka bi Mbori. Wai du rengbe ani ka manga gipai re? Ringbisihe kuti Ziazia Kekeapai, si naida ani berẽkurii agu apai namanga pati rani. Ka ani ta ino wai Yekova aundo rani, ko nika da furani ni ndikidi boro. Sidu, a wa si adu tipa Eyobo, ani rengbe ka ya: “Mi agi pa ro be kina gu giapai nga ga tue; ono awere bangire nabi ro.”

17, 18. (a) Gini gene rengbe ani ngbaha ka ino singia Yekova naundo rani? (b) Oni penga gu kpiapai nayugo wai Yekova aundo rani areme.

¹⁷ Wai du rengbe ani ka bi bee Yekova? Bete akpiapai gere: Si rengbe kadu nga mo nabihe nga gu gene mo agbia rengo ngbaha ga Mbori rugapai du naadu. Ya mo mo adunga pati dunguratise gumbapai ki mangi mo ki ya: “Gere nzunzu nga gupai mi aidaha”? Watadu si rengbe kadu nga mo bihe nga mo ima gbia karagapai kuti gamo kparakpee. Isoke mo adiberã tipa ka kiiso gamo sunge tungusapai na iriworago ki zi ro ka bi wai Yekova aundo ro tipa apai ngba foro. Watadu si rengbe kadu nga mo ambu sunge mbiko gupai nga ga toro na mo ki bi gu rengo du gii gu ga Mbori kidohe naya: “Mi ambú nga ro a wa sa te.” (Eb. 13:5) Ka ani angera angera rogo toro yo, ani ima rengba ka bi wai Yekova aundo rani rogo dungu agene yo.

¹⁸ Sara du Kenya yo ape gupai du tipa ri ki ya: “Mi agbia boro nawirika Ziazia Kekeapai ono ka ni akpingo nyemuhe ya. Mi asana Yekova singia mi mbu wisigo Ziazia Kekeapai na ni. Nibasa fuo ya mi ‘Amina,’ gimi terefuni ki poi. Gu boro re ayambuhe ki sanahe singia ri rengbe ka ye tipa ani ndu ku ba dunguratise yo na ri! Iriworago aima zio re!” Ka ani angera rogo toro yo, ani ima rengba ka bi agu agene Mbori aundo rani ngbaha rogo gaani raka yo. Wirinarani du Asia yo nga Rhonna aya: “Si nadia regbo adia tipa boro ini wai Yekova angbe funi ku mbatayo. Bara sa kindi mo na inihe, iriworago na zio ro azio tipa ka ino wai nzunzu ko akpinyemu rani!”

19. Gini kurapai si aidaha tipa ani du dagba agu aboro yo nika bi Mbori?

¹⁹ Yesu aya: “Aboro maku nga agu yo du ziazia kpotoyo yo, bambiko i abí Mbori.” (Mt. 5:8) Wai du rengbe ani kadu ‘ziazia kpotoraniyo’? Si naida ani du gigiri kpotoraniyo na ki mbu gbegberẽ mangaapai. (Oni gedi 2 AKorindo 4:2.) Wa ani kaa nyakasa tirani rogo toro yo na kini mangi rurupai, gure nga ani dagba agu aboro yo rengbe ka bi Mbori. Gu kekeapai ngbefuo gere nika sakapai tipa guhe rengbe ka undo rani ani bi gu mangapai nga ga Yekova ziazia rogo gaani raka yo gbe—gaani idapase.