Mo penga pa wai mo asono furani.

I avungu re rogo 1979 Amerika yo. Ho mi ada ni na garã biata, avungu re ambutiyo. Nina asonosi re ringbisi he kuti gu sino atitase nangia ga aYudo na ki kedi re ku yeshivas yo watadu agu asukuru nangia ga aYudo. Ho mi ada ni na garã saba, ani aga ku Yisaraere yo tipa garã sa, na mi anaandu ku rogo gu sukuru nadu rogo gu dagba rago nadu yo rimoho angia kibbutz. Tifuo gure, Nina gbiati re aga ku Mekisiko yo.

Wa vura duhe nga bambutiria aadunga rogo gu dagba rago re te, mi aka kindi kuti gu gi sino pambori nangia ga aYudo. Mi anaatiga baro Rago Sabiti, mi anaageda gu ziazia kekeapai nangia ga aYudo, na kini mangi kparakpee ni manga mi sunge na siddur, watadu buku kparakpee. Sukuru yo, mi anaagumba gupai dedede fu agu aboro nadu rogo gimi riko nga gimi pambori nga ndikidi pambori. Mi anaageda nga gu buku i ayambaha nga Vovo Ndika nga gu nafura gbe tipa ga Yesu Kristo sunge tungusapai gbiati yugopai te. Nirengo, Nina aima za re ka mi gedinga ha ya, ri aagunde agunde nga gaha ayugopai nika du na maapai kurire.

Tipagine du mo adiberã ti ni tipa ka geda Vovo Ndika?

Ho garã re ada ni 17, mi akaraga tire berewe ku Amerika yo tipa ka nyasa gi sukuru. Kumba adu yo mi aini ko tipa wiri bete regbo, na ya Kristano nga ko na ko agumba gupai fere nga, gimi raka arengbanga ka du ni rengberengbehe zanga Yesu te.

Mi akaragapai fuko nga, “Agu aboro idi kuti Yesu, i ima inga.”

Ko asana re nga, “Ya mo mo gedinga Vovo Ndika?”

Mi akaragapai nga, “Oó.”

“Tigu regbo re,” ko aya, “ya mo mo abingo ho tigamo nga mo nafu berãpai tipa gupai mo ainonga pai tipaha ya te?”

Afugo ko aima du na bakere maapai kurire gbe, mi anaabihe ti aregbo dunduko nga si nipa mungo ka karagapai kuti gupai mo ainongo pai tipaha ya. Mi ayugu umbasitise, ki ga na gako Baibiri ku kporo yo na mi atona geda Vovo Ndika.

Waigu gupai mo agedihe adu na maapai kuri ro?

Kina ngbare nazere ka ino gupai nga, abakeke Vovo Ndika angia aYudo. Berewe a, wa mi atona ka gedaha gbe, kina wo mi aye ka tona bi Yesu ni gu Yudo nadu na wenesino gbiati umbasitise, nanaaida kaa undo aboro, angianga ka tudo yo ya. Zavura mi andu kurogo baigo awaraga na ki di abuku tipa ko ka gedaha. Wa si avura duwo, pai ho sa dagba agi apai re nga gu nasa re mi idi kuti gupai nga ko angia Masiya te. Zavura gu kura aboro aayamba ko nga Mbori—nga gu bipai naarunga bangire ya. Gu garakaha agaraka berewe nga, da du Yesu aamanga kparakpee fu ni—ko aamangaha fu tiko? Kurigure, Yesu akpi. Ono tie, Baibiri nape gupai tipa Mbori nga: “Mo akpingo te.” *

Waigu mo amangipai kuti agi apai re?

Rengo atagbaganga tihe te, na mi aima diaberã tipa ka ino rengo. Sidu, mi amangi ndikidi kparakpee na aume fu Mbori—na gu re angia bambata regbo mi mangi kparakpee zanga siddur. Si aaimanga te wa mi anyasihe, mi ki gi woro ngbadimo i ni ngoka ha. ADezire Yekova ue du nadu. I afu waraga sa fere dagba gu gayo awaraga yo naundo boro ni gi rogo Ziazia Kekeapai yo. Gi waraga re gbiati gu sakapai ani anaamangaha na agu aDezire Yekova re, asa re mi idi kuti gupai nga gayo aida naru rii Baibiri. Ni kpiapai, aDezire Yekova ima ida kuti Yesu, angianga ni papara Tirinita ya, ono ni “Wiri Mbori” * na “ni tonatona ga Mbori kusikusiahe.” *

Fuo gure ngbutuko, mi akaraga tire ku Mekisiko yo, yo du mi atona wisigo gu buku ni nga Messianic prophecies na aDezire Yekova. Kina ngbare nazere ka bi gu badungu sangbaanebi nadu yo! Wa si avura duwo, mi adu kindi na bete kapa. Mi aabaka bangire nga: ‘Ya mo kina Yesu sa narẽ tipa agu apai gumba yo ho rogo gi sangbaanebi re? Na wa ka si du a nga, ko gbua nga gu wene boro birĩ naima ino wai ka mangapai kuti agu apai i napekehe rogo gu sangbaanebi re?’

Ginipai tie na′aria gamo bipai?

ADezire Yekova ayugu gu sangbaanebi fere nga gu ka boro amanganga ha tipa ka nangahe na ni ya. Ni kpiapai, mbata fu agarã susi 700, gu nebi nangia Mika ape gupai nga i nika vunga Masiya Betereme yo du Yuda yo. * Da rengbe ka sia gu ba i nika vunga ni rogo yo? Yesaya ake gupai nga, i nika payasi pa Masiya ya ko nga bamangi gbegberẽpai na ki imi ko, na wa vura duhe wo, ira kumuko nika kpisido ko. * Agi apai i agumbaha re dunduko aima ye ki digisitihe kuti Yesu.

Yangara gopai nayugo pa ngbatunga Yesu. Baibiri ape gupai nga Masiya nika ngia tita Bakindo Davide. * Mbiko gu pai nga agu aYudo nadu mbata kusayo anaabanda gu kekeapai naayugo pa ngbatunga aboro nga gu nadu gbaiga na gu naadu ni õkoõkoho, ka si adu nga Yesu aadunga rogo gu gene ngbatunga yo nga ga Davide te, ka avurako aima ti kango na gipai re! Ono i aarengbanga ka ti kango te mbiko ga Yesu gene ngbatunga aima kodatihe na ga Davide. Zavura ndurumo aboro anaayamba ko nga “Wiri Dawidi.” *

Rogo 70 Fuo Batikayo Kristo—agarã 37 fuo Yesu kpi—Gu riivura nangia ga aRomo yo agbarasi Yerusarema, na si nawira gupai nga gu kekepai nanaayugo pa ngbatunga aboro aima inga watadu i aima gbarasaha. Ngba gi gene re, tipa gupai nga i ini ga Masiya gene ngbatunga, si aidi ko kuru mbata fu gu garã nangia 70 F.B.K.

Waigu pa ino mo gipai re adu na maapai kuriro?

Rogo Pa Fu Rugute ni Ue he 18:18, 19, i agumba gupai yo nga, Mbori nika maa nebi Yisaraere yo wakina Moize. Mbori ape gupai nga, ai “gu boro nikadega nga tuni sa gu gimi apai gu nebi re ka pe he ti rimore ya, mi asána kina ni ti ni.” Pa gimi dudunguro wisigo pai nga ga Baibiri naabaha asa re mi idi kuti gupai nga, Yesu boro Nazareta du nangia gu nebi re.