KAPITA 37

Ya mo si naida mi zi bapatiza?

Mo gbahe ti gu sanduki du pati gupai nga rengo watadu gu nga ziree nibipa agi apai du kusende re:

Bapatiza nga gupai si aidaha be aKristano.

□ Rengo

□ Ziree

Gu bangua ndupai nasa boro ni zi bapatiza nga ka banda boro be ti ku rogo ingapai.

□ Rengo

□ Ziree

Bapatiza nasa boro ni rẽ tipa bata.

□ Rengo

□ Ziree

Ka si du nga mo aziongo bapatiza te, Mbori asaranga ngbanga ro tipa gamo mangapai te.

□ Rengo

□ Ziree

Ka si du nga akuaro nazio bapatiza, gure nga mo ima rẽ a tipa ka zio bapatiza.

□ Rengo

□ Ziree

KA SI DUNGA mo naraka ringbisihe kuti ga Mbori arugute, mo nasonosa pabakure na Mbori, na mo kini fura fu kura aboro tipa gamo idapase, si rẽarẽ mo niberẽpa bapatiza. Ono waigu rengbe mo ka ino singia mo ima du regerege nzunzu tipa gu diandue re? Tipa ka gbia karagapai kuti gu sanahe re, ani wisigingo agu apai i natangaraha kuari nabipa ginigu nga rengo watadu ziree.

 ● Bapatiza nga gupai si aidaha be aKristano.

Rengo. Yesu afu gu rugapai nga si naida gako abawiriki zi bapatiza. (Matayo 28:19, 20) Ka pe rengo, Yesu nitiko naima zio bapatiza. Tipa ka pekafuo Kristo, si naida mo zi bapatiza ho mo naima nyaka ni wenengai tipa ka manga gu diaberã re na kidu na ndikidi nyemu ka mangaha.

● Gu bangua ndupai nasa boro ni zi bapatiza nga ka banda boro be ti ku rogo ingapai.

Ziree. Bapatiza nayugoho gbaiga nga mo ima kpara gamo raka fu Yekova. Anga bapatiza nga gu kungbo dakutipai gbua nga gu naza ro ti manga mo gupai du mo adu na nyemu ka mangaha ni gbuko te. Kuba gure, mo nakpara gamo raka fu Yekova mbiko mo naida ka raka ringbisihe kuti gako arugute.

● Bapatiza nasa boro ni rẽ tipa bata.

Rengo. Baibiri naya bapatiza nga gu nyanyakipa diandue nasa boro ni gbia bata. (1 Petero 3:21) Anga bapatiza wa gu karte nga gu boro andu ka kusaha tipa si nibanda ni isoke ka si du nga gberãngo nika manga ni te. Mo nazio bapatiza mbiko mo ima kpinyemu Yekova na mo naida ka irisoko na kpotoroyo dũ nyeanye kindi.​—Marako 12:29, 30.

● Ka si du nga mo aziongo bapatiza te, Mbori asaranga ngbanga ro tipa gamo mangapai te.

Ziree. Yakoba 4:17 naya: “Gu ni ini ka manga wenepai, ka ni amanga nga ha ya, si nga gbegberẽpai fu ni”​—singia gu boro re zi bapatiza watadu ni aziongo ho te. Sidu, ka si du nga mo ima ino gupai du ni wenehe na mo ima nyaka wenengai ki rengbe ka wisigo gupai du tipa raka ro, isoke gere rengbe kadu nga regbo mo fura na avunguro watadu gu kura Kristano naima nyaka rogo agu apai yo nga ga Mbori. Rogo gu gene re, mo ima rengba ka wirika wai rengbe mo ka manga sonakumbatayo ki da ti bapatiza.

● Ka si du nga akuaro nazio bapatiza, gure nga mo ima rẽ a tipa ka zio bapatiza.

Ziree. Gu diaberã nga ga zio bapatiza, si naida si ye kina boro ngbaduro yo. (Atambuahe 110:3) Si naida mo zi bapatiza sa kinaho mo naima rugatiro ni wenengai na agu apai padu ni Dezire Yekova akodaha na ho mo naima inoho ni nga mo nga regerege tipa ka dia gi tindiro re kuriro.​—Batungusipai 5:4, 5.

Bapatiza Nga gu Diandue Naˈaria Gamo Raka

Bapatiza nga gu diandue naˈaria gamo raka na nga gu nandu na mo sa dungu amaku. Ti kina gu bangisa regbo re a, si nakoda nyanyakipa atindiro​—nga gu nabipa raka ringbisihe kuti gu kparatise mo nitiro amangihe fu Yekova.

Ya mo mo nga regerege tipa ka kparatiro fu Yekova? Ka sidu nga wo duhe, mo na wene ndupai bero kadu na ngbarago. Bakere momu kisusi napido ro kumbatayo nga iriso Yekova na kpotoro yo dunduko na raka ngba gu gene nayugoho nga mo ima kpara gamo raka nzunzu fuko.​—Matayo 22:36, 37.

AYUGOPAI NGA GA BAIBIRI

“Oni fú tironi ni unga ũmotumo, ni ziazia ha, si ngba fu Mbori, si nga boro gaoni mangapai.”​—ARomo 12:1.

 [Gu sura du ti kpewaraga 306]

“Pa ino mi gupai nga mi aima zio bapatiza naundo re mi mangi wene adiaberã na ka mi mangingo gupai rengbe ka ye na gbegberẽ sangbanaha ya.”​—Holly

 [Gu sura du ti kpewaraga 310]

Wakina rogatise, Bapatiza nga gu diandue naʹaria ga boro raka​—si aidanga boro bihe na paha kusende te