Lu ca dxi ni zeeda riʼ, ndaaniʼ stale guidxi ziguni votar binni, ne naquiiñeʼ guicaacabe ti decisión risaca: cuícabe tu gaca xaíque stícabe.

 ¿Xi caníʼ Biblia de laani?

 Biblia rusiidiʼ nuu stale cosa ni qué zanda guni ca xaíque stiʼ Guidxilayú riʼ.

•   «Cadi quíxhetu confianza stitu lu náʼ ca príncipe nin lu náʼ tutiica hombre, purtiʼ qué zanda gulacaʼ laatu. Riree espíritu stiʼ ne ribiguetaʼ raca yu; dxi ca nga riluxe guiráʼ ni riníʼ íquebe» (Salmo 146:3, 4).

 Neca nanna ca xaíque ca gúnicaʼ xhiiñacaʼ galán peru redandá dxi ráticaʼ. Ne neca bíʼnicabe cosa galán para gacanécabe binni, qué gánnacabe pa laaca ngueca zuni ca ni guiaana lugar stícabe (Eclesiastés 2:18, 19).

 Lu Biblia peʼ riete cadi guyáʼ diʼ binni para guni mandarsaacaʼ.

•   «Cadi lu náʼ diʼ binni nuu guni mandar ra guzuhuaa ñee» (Jeremías 10:23).

 ¿Ñee nuu tuuxa ca dxi riʼ ni zanda gaca ti buen xaíque la?

 Rusiene Biblia laanu maʼ biʼniʼ nombrar Dios ti xaíque ni jma nuu xpiaaniʼ ne ni zanda gápanu confianza laa: laabe nga Jesucristu (Salmo 2:6). Laabe nga Rey lu Reinu stiʼ Dios. Reinu stiʼ Dios nga ti gobiernu ni nuu guibáʼ ne de racá nga chiguni mandar ni (Mateo 6:10).

 ¿Zabiluʼ Jesús para gaca xaíque stiluʼ la? Rusiene Biblia laanu xiñee risaca guicaanu decisión ca:

•   “«Lagusisaca [Jesucristu], pacaa zadxiichi Dios ne zátitu lu neza stitu, purtiʼ nagueenda ridxiichibe. ¡Nayecheʼ riuu guiráʼ ca ni ruyubi guilá ra nuube!» (Salmo 2:12).

 Yanna nga naquiiñeʼ guicaanu ti decisión. Ruzeeteʼ ca profecía stiʼ Biblia bizulú Jesús cayuni mandar lu iza 1914. Ne laaca rabi ca profecía ca laanu maʼ cadi candaa zabee Reinu stiʼ Dios guiráʼ gobiernu stiʼ binni ni nuu yanna, ne maʼ laani chiguiaana ni lugar sticaʼ (Daniel 2:44).

 Para gánnaluʼ ximodo zanda guni apoyarluʼ gobiernu stiʼ Jesús la? Biindaʼ artículo «Guni apoyarnu Reinu stiʼ Dios tiempu riʼ».