¿LII YAʼ? ¿HUAYÚNILUʼ PREGUNTA CA ORA GÚʼYALUʼ GUIZAACA TI DESGRACIA LA? ¿HUAZAACALUʼ XIIXA NI BININÁ LII NE PUR NGA RINÍʼ ÍQUELUʼ QUÉ RIZAALAʼDXIʼ DIOS LII LA?

Sheila, ti gunaa ni nabeza Estados unidos ne biniisi ndaaniʼ ti familia ni nabé biʼniʼ cré ni bisiidiʼ religión sticaʼ, guníʼ: «Dede dxi nahuiineʼ runeʼ cré Dios ni Bizáʼ guiráʼ xixé ni nuu, peru qué ñuu dxi ñuneʼ sentir nuaaʼ gaxha de laabe. Neca nannaʼ zanda gúʼyabe naa, peru qué rulábibe naa. Nannaʼ cadi nanaláʼdxibe naa, peru laaca qué rizaaláʼdxibe naa». ¿Xiñee guníʼ íquebe zacá yaʼ? Laabe bisiénebe: «Deche ca deche bidxagalú familia stinneʼ jma desgracia ne ruluíʼ qué ñacané Dios laadu».

Cásica Sheila, zándaca neca runi creluʼ Dios ni jma napa poder, peru laaca rinabadiidxaluʼ pa dxandíʼ rizaaláʼdxibe lii. Zacaca guníʼ ique Job, ti hombre biʼniʼ ni jneza ne biʼniʼ cré poder ne guendanuuxpiaaniʼ napa Dios ni Bizáʼ guiráʼ xixé ni nuu (Job 2:3; 9:4). Despué de bidxaagalube deche ca deche stale desgracia ne maʼ bireebe gana, gunabadiidxabe Dios: «¿Xiñee rucaachiluluʼ de naa, ne ruuyuʼ naa casi ti enemigu stiluʼ?» (Job 13:24).

Peru ¿xi rusiidiʼ Biblia yaʼ? ¿Ñee Dios napa donda pur guiráʼ ca yuubaʼ nuu la? ¿Ñee rizaaláʼdxibe guiráʼ xixé binni ne cada tobi de laanu la? ¿Ñee nuu modo gánnanu runibiáʼ chaahuibe laanu, riénebe laanu ne racanebe laanu ora guidxaagalunu guendanagana la?

Lu xcaadxi artículo ca, zadúʼyanu ximodo racané guiráʼ xixé cosa bizáʼ Dios ne Biblia gánnanu rizaaláʼdxibe laanu (Romanos 1:20). Ra jma gunibiáʼ chaahuiluʼ Dios ni Bizáʼ guiráʼ xixé ni nuu, jma ziuuluʼ seguru dxandíʼ nadxiibe lii (1 Juan 2:3; 1 Pedro 5:7).