Zeʼ dxi jma cazaaca desastre natural. Nga runi maʼ gudixhe Grupu ni Zániru chuʼ ti Departamentu de Labor de Socorro ndaaniʼ cada sucursal lu guidubi Guidxilayú para quixhe chaahuiʼ dxiiñaʼ ni runi ca hermanu ora guizaaca ti desastre.

Ora ganna ca hermanu ni nuu lu departamentu riʼ bizaaca ti desastre, nagueendaca riniʼnécabe ca ancianu de lugar ca para gánnacabe xi caquiiñeʼ ca publicador. Pa nabé bininá desastre natural riʼ ne qué zanda guni ca publicador dxiiñaʼ riʼ stúbicaʼ la? runi nombrar sucursal caadxi hermanu ni nuu capacitadu para guni dirigir ca dxiiñaʼ ca. Ca hermanu encargadu riʼ zándaca guinábacaʼ chuʼ tu gacané casi voluntariu o guinábacabe xiixa ni caquiiñeʼ raqué ne laaca zándaca sícabe ne quíʼzicabe ni caquiiñeʼ ca hermanu.

¿Xiñee zacá raca organizar ca dxiiñaʼ ca yaʼ? Purtiʼ zacá zaquiiñecabe bueltu, stipa ne ca material ca jneza ne qué zúnicabe dxiiñaʼ chupa biaje. Pa tuuxa hermanu de laasi gacalaʼdxiʼ guni apoyar la? zándaca gucueezabe modo maca nexheʼ gaca dxiiñaʼ riʼ.

Zanda guiníʼ ca hermanu ni guni nombrar sucursal pabiáʼ bueltu ne panda voluntariu zaquiiñeʼ para gaca dxiiñaʼ ca. Laaca zanda guiniʼnécabe ca autoridad para gudii lugar gúnicabe dxiiñaʼ ca jma nagueenda. Nga runi, pa qué guinábacabe lii la? cadi gutópaluʼ bueltu, guseendaluʼ despensa o cheluʼ lugar ra guca desastre ca.

Dxandíʼ, cumu nadxiinu ca hermanu stinu la? pa ñanda nagueendaca ñacanenu laacabe (Heb 13:16). ¿Peru xi zanda gúninu yaʼ? Ni jma galán nga guni orarnu pur ca hermanu de lugar ra gucaná ca ne pur ca ni cayuni dxiiñaʼ lu ca labor de socorro. Laaca zanda gudiʼnu donación para obra mundial. Maʼ gudixhe Grupu ni Zániru ca sucursal ca nga gúʼyacaʼ ximodo ne pora iquiiñecaʼ ca donación stinu. Ne pa racaláʼdxinu chuunu chigacanenu la? naquiiñeʼ guchanu Solicitud de voluntario local de diseño y construcción (DC-50) ne cuézanu guiniʼnécabe laanu.

DESPUÉ DE GÚʼYALUʼ VIDEU NI LÁʼ MODO BILAAHUA BRASIL, ZANDA GUICÁBILUʼ PREGUNTA RIʼ:

¿Xi jma bidxagayaaluʼ de modo gucané ca testigu stiʼ Jehová lu ca labor de socorro dxi bilaahua Brasil?