Kʼaʼabéet tumen Dioseʼ u kʼáat ka k-muchʼba utiaʼal ka k-adorarte. Le Bibliaoʼ ku yaʼalik: «Koʼoneʼex ilik bix jeʼel k-paklan áantikbaʼex utiaʼal ka yanak yaabilaj ichiloʼoneʼex bey xan utiaʼal ka k-beeteʼex baʼaloʼob maʼalobtakeʼ. Tsʼoʼoleʼ maʼ unaj u xuʼulul k-muchʼikba[iʼ]» (Hebreos 10:24, 25).

 Jesúseʼ tu yaʼalaj tiʼ u discípuloʼob: «Wa ka paklan yaabiltikabaʼexeʼ tuláakal máak ken u yojéelteʼ teʼexeʼ in discípuloʼex» (Juan 13:35). Leloʼ tu yeʼeseʼ u discípuloʼob Jesúseʼ yaan u táakpajloʼob ichil junpʼéel grupo máakoʼob jach tu tsoolol ku meyajoʼob. Utiaʼal u yeʼeskoʼob yaabilajeʼ kʼaʼabéet u muchʼkubaʼob mantatsʼ tiʼ grupoʼob utiaʼal u adorarkoʼob Dios (1 Corintios 16:19). Letiʼobeʼ junmúuchʼ ken u adorartoʼob Jéeoba tiʼ tuláakal yóokʼol kaab (1 Pedro 2:​17).

Maʼ chéen ka yanak u religión máakiʼ

 Le Bibliaoʼ ku yaʼalikeʼ unaj u muchʼkuba máak utiaʼal u adorartik Dios. Chéen baʼaleʼ mix tuʼux ku yaʼalik wa Dioseʼ ku kʼamik máak chéen ikil u yantal tiʼ junpʼéel religión. Baʼaxeʼ ku yaʼalik unaj u tsʼáaik máak ichil u kuxtal le baʼax ku kanikoʼ. Le Bibliaoʼ ku yaʼalik: «Yaan junpʼéel clase religión limpio yéetel kʼamaʼan tumen Dios k-Taata. Le máaxoʼob yaantiʼob le adoración jeʼelaʼ unaj u beetkoʼob lelaʼ: unaj u kanáantkoʼob le paalaloʼob kimen u taataʼoboʼ bey xan le viudaʼob táan u muʼyajoʼoboʼ, yéetel unaj u náachkuntkubaʼob tiʼ le baʼaloʼob kʼaastak ku beetaʼal teʼ yóokʼol kaabaʼ» (Santiago 1:​27, nota).