Yáaxeʼ unaj a wojéeltik junpʼéel baʼal: Dioseʼ táan u yilik baʼax ku yúuchul way yóokʼol kaabeʼ yéetel yaan baʼax ken u beete (Salmo 72:13, 14). Le Bibliaoʼ ku yaʼalikeʼ yaan u yáantik le máaxoʼob táan u ‹máanskoʼob muʼyajiloʼ›. ¿Baʼax kʼiin? «[Le] kʼiin ken chíikpajak Yuumtsil Jesús desde teʼ kaʼan yéetel u muʼukʼaʼan angeloʼob; [...] letiʼe ken taalak u sut u jeel le kʼaas ku beetik tuláakal le máaxoʼob maʼ u kʼaj óoloʼob Diosoʼ bey xan le máaxoʼob maʼ tu tsʼoʼokbeskoʼob le maʼalob péektsil yaan yil yéetel k-Yuumtsil Jesusoʼ» (2 Tesalonicailoʼob 1:7, 8.) Jesuseʼ yaan u chíikpajal tu «baʼatelil u noj kʼiinil le Dios yaan tuláakal páajtalil tiʼoʼ»; tiʼ le baʼatelaʼ ku yaʼalaʼal xan Armagedón (Apocalipsis 16:14, 16).

Ken kʼuchuk le kʼiinoʼ Dioseʼ maʼ wíinik ken u túuxt baʼateliʼ, baʼaxeʼ Jesucristo junmúuchʼ yéetel u angeloʼob. Letiʼob kun xuʼulsik le kʼasaʼanil yéetel le pechʼ óolaloʼ (Isaías 11:4; Apocalipsis 19:11-16).

Maʼ kʼexpajak bix u yilik Dios le baʼateltáambaloʼ. Láayliʼ le kun meyajtiʼ utiaʼal u xuʼulsil le kʼasaʼanil yéetel le pechʼ óolaloʼ. Baʼaleʼ jeʼex tu beetil úuchjeakiloʼ chéen letiʼ aʼalik baʼax kʼiin yéetel máax ku bin teʼ baʼateloʼ. Tsʼoʼok k-ilkeʼ Dioseʼ u chʼaʼtukultmaj u xuʼulsik le kʼasaʼaniloʼ, yéetel Jesucristo  kun joʼolintik le xuʼulsajiloʼ. Lelaʼ ku yeʼesikeʼ Dioseʼ maʼ de acuerdo yéetel mix junpʼéel tiʼ le baʼateltáambal ku beetaʼal bejlaʼoʼ kex ka aʼalaʼak yéetel maʼalob tuukul ku beetaʼal.

Máans ta tuukul lelaʼ: kaʼatúul sukuʼuntsiloʼobeʼ ku joʼopʼol u baʼateloʼob le maʼ kulaʼan u taataʼoboʼ. Ku jáan jetsʼtaloʼobeʼ ku tʼankoʼob u taataʼob tiʼ teléfono. Juntúul tiʼ letiʼobeʼ ku yaʼalikeʼ letiʼe uláakʼ juntúul káajsoʼ, uláakʼ juntúuloʼ ku yaʼalikeʼ táan u maltratartaʼal. Tu kaʼatúulal u kʼáat ka creertaʼakoʼob. Le taatatsiloʼ ku yaʼaliktiʼob ka xuʼuluk u baʼateloʼob yéetel ka u páaʼtoʼob u suut. Le sukuʼuntsiloʼobaʼ ku beetkoʼob baʼax ku yaʼalaʼaltiʼob, baʼaleʼ maʼ tu xáantaleʼ ku kaʼa léekeloʼob. Ku kʼuchul le taatatsiloʼ yéetel ku kʼuuxil tu yéeteloʼob, tsʼoʼoleʼ ku castigartikoʼob tumen maʼ tu yuʼuboʼob tʼaaniʼ.

Le luʼumoʼob ku baʼateloʼob teʼ kʼiinoʼobaʼ ku sen kʼáat óoltikoʼob ka áantaʼakoʼob tumen Dios. Pero Dioseʼ maʼ tu apoyartik mix junpʼéeliʼ. Tak le Bibliaoʼ ku yaʼalik: «Maʼ a boʼotkeʼex kʼaas yéetel kʼaas tiʼ mix máak» yéetel «maʼ a sutkeʼex u jeel le kʼaas ku beetaʼalteʼexoʼ» (Romailoʼob 12:17, 19). Dioseʼ u yaʼalmaj xan tiʼ máak ka chúukpajak u yóol u páaʼt u salvartaʼal ken u taas le Armagedonoʼ (Salmo 37:7). Le oʼolal u pʼeek u paklan kíimskuba le máakoʼob teʼ baʼateltáambaloʼoboʼ. Tu kʼiinil Armagedoneʼ yaan u yeʼesik kʼaas u yilik u baʼateʼel máak, tumen yaan u xuʼulsik tuláakal le baʼateltáambaloʼoboʼ (Salmo 46:9; Isaías 34:2). Jeʼex k-ilkoʼ Armagedoneʼ letiʼe baʼax kun meyaj tiʼ Dios utiaʼal u xuʼulsik le baʼateltáambaloʼ.

U pʼáatal minaʼan baʼateleʼ chéen junpʼéel tiʼ le bendicionoʼob ken u taas u Reino Diosoʼ. Jesuseʼ tʼaanaj tiʼ le Reino ichil le oración jach kʼaj óolaʼanaʼ: «Taalak a Reino, beetaʼak baʼax a kʼáat teʼ kaʼanoʼ bey xan way Luʼumeʼ» (Mateo 6:10). Le Reinoaʼ maʼ chéen yaan u xuʼulsik le baʼateltáambaloʼ, yaan xan u xuʼulsik le kʼasaʼaniloʼ, tumen letiʼe baʼax beetik u yantal baʼateliloʼ (Salmo 37:9, 10, 14, 15). * Le oʼolal le cristianoʼoboʼ jach taak u yilkoʼob u béeytal le baʼaxoʼob ken u beet u Reino Diosoʼ (2 Pedro 3:13).

¿Yaʼab u bin wa utiaʼal ka xuʼulsaʼak le muʼyajil, le pechʼ óolal yéetel le kʼasaʼanil tumen u Reino Diosoʼ? Bejlaʼeʼ táan k-ilik u béeytal le baʼaxoʼob ku yaʼalik le Biblia kun úuchul «tu tsʼook kʼiinoʼo[boʼ]» (2 Timoteo 3:1-5). * Leloʼ ku yeʼesikeʼ junpʼíit kʼiin u bin utiaʼal u káajal u gobernar u Reino Dios way Luʼumeʼ. Lelaʼ yaan u káajal ken tsʼoʼokok u baʼatelil Armagedón.

Tsʼoʼok k-ilkeʼ chéen le máaxoʼob maʼ tu kʼamkoʼob «le maʼalob péektsil yaan yil yéetel k-Yuumtsil Jesús» kun xuʼulsbiloʼob tu baʼatelil Armagedonoʼ (2 Tesalonicailoʼob 1:8). Kʼaʼajaktecheʼ Dioseʼ maʼ uts tu tʼaan u kíimil máakiʼ, mix le kʼasaʼanoʼoboʼ (Ezequiel 33:11). Como «maʼ u kʼáat ka xuʼulsaʼak tiʼ mix máak[eʼ]», táanil tiʼ u taasik le xuʼulsajiloʼ Dioseʼ u kʼáat ka kʼaʼaytaʼak «tiʼ tuláakal yóokʼol kaab» le maʼalob péektsiloʼ «utiaʼal ka ojéeltaʼak tumen u kajnáaliloʼob tuláakal kaajoʼob» (2 Pedro 3:8, 9; Mateo 24:14; 1 Timoteo 2:3, 4). Yoʼolal le kʼaʼaytaj ku beetik u j-jaajkunajoʼob Jéeoba tiʼ tuláakal yóokʼol kaaboʼ, tiʼ tuláakal máak ku yantal u oportunidadil u kʼuchul u kʼaj óoltoʼob Dios yéetel u beetkoʼob le baʼaxoʼob tu kaʼansaj Jesusoʼ. Beyoʼ yaan u páajtal u kuxtaloʼob tiʼ junpʼéel Luʼum tuʼux maʼ tun antal baʼateliʼ.