Líikʼen tu kaajil Alicante, naatsʼ tiʼ le kʼáaʼnáab yaan tu lakʼinil Españaoʼ. Tin wotocheʼ yaʼab problemaʼob yaniʼ, le oʼolal chéen calle kin máan. Naatsʼ tin wotocheʼ yaan junpʼéel llantera tuʼux ku meyaj José María, juntúul máak uts u modos. Letiʼeʼ ku chʼaʼiken en cuenta, maʼ jeʼex in láakʼtsiloʼobeʼ. Ken u yil jach chiʼichnakeneʼ ku líiʼsik in wóol. Kex veinte años maas nojoch tiʼ teneʼ kʼuchen in wil bey in sukuʼuneʼ.

José Maríaeʼ káaj u xokik le Biblia yéetel u j-jaajkunajoʼob Jéeobaoʼ. Chíikaʼan uts tu tʼaan baʼax ku kanik, tumen suuk u tsikbaltikten. Como kin respetartikeʼ kex maʼ jach uts tin tʼaaneʼ kin wuʼuyik. Pero teneʼ yaanal baʼax uts tin tʼaan; chéen paalen kaʼachi. Maʼ tin tuklaj wa yaan u séeb kʼexpajal in kuxtaliʼ.

Maʼ jach jatsʼuts in wilik in tʼaan yoʼolal le accidenteoʼ; chéen baʼax ken in waʼaleʼ juntúul loco paalen minaʼan u naʼat kaʼachi. Chéen ichil junpʼéel kʼiineʼ kʼexpaj tuláakal baʼal ichil in kuxtal. Le xiʼipal jach tʼaʼajoʼ pʼáat chéen pekekbal tu cama. Yaʼab u téenel tin tuklaj: «¿Baʼax tiaʼal ku seguer in kuxtal?».

José Maríaeʼ taal u yilen, ka tu séeb tʼanaj le j-Jaajkunajoʼob kajaʼanoʼob naatsʼ tiʼ le hospital utiaʼal u xíimbaltkenoʼoboʼ. Le baʼax tu beetoʼoboʼ jach kʼuch tin puksiʼikʼal. Chéen pʼel jóokʼiken tiʼ terapia intensivaeʼ joʼopʼ in xokik le Bibliaoʼ. Tin kanaj baʼaxten k-muʼyaj yéetel k-kíimil, yéetel baʼaxten Dioseʼ ku chaʼik u yúuchultoʼon loob. Tin wojéeltaj xaneʼ Dioseʼ yaan u beetik junpʼéel Paraíso way Luʼum, tuʼux «mix juntúul kajnáal bíin u yaʼal: Kʼojaʼanen», tumen láaj perfectoʼob (Isaías 33:24). Tin wuʼuyaj bey jeʼepaj in wicheʼ, tumen yáax u yantalten esperanza.

Le ka jóokʼen teʼ hospitaloʼ séeb tin tsʼáajil ichil in kuxtal le baʼax kin kanikoʼ. Yéetel in silla de ruedaseʼ páajchaj tak in bin tiʼ jujunpʼéel muchʼtáambal tiʼ u j-jaajkunajoʼob Jéeoba, bey xan in jóokʼol kʼaʼaytaj. Tu kʼiinil 5 tiʼ noviembre tiʼ 1988 le yaanten 20 añosoʼ, okjaʼanajen ichil junpʼéel tina (bañera). Jéeoba Dioseʼ tu yáanten in wil yaan u biilal in kuxtal. Baʼaleʼ ¿bix jeʼel in tsʼáaik u diosboʼotikil tiʼeʼ?

Tin chʼaʼtuklaj in meyajtik Jéeoba jeʼel bixak ka páajchajkeʼ (1 Timoteo 4:15). Tu káajbaleʼ jach talamchajten tumen in láakʼtsiloʼobeʼ u pʼeekoʼob le religionaʼ. Baʼaleʼ «in sukuʼunoʼob», le j-Jaajkunajoʼoboʼ, tu yáantenoʼob. Tu beetoʼob tuláakal le ku páajtal utiaʼal maʼ in peʼertik mix junpʼéel muchʼtáambal, bey xan utiaʼal in táakpajal teʼ kʼaʼaytajoʼ.

Baʼaleʼ ka máan kʼiineʼ t-tsʼáaj cuenta kʼaʼabéet in kanáantaʼal bul kʼiin yéetel bul áakʼab. Ka tsʼoʼok k-sen kaxtik tuʼux jeʼel u páajtal in wantaleʼ, tin wojéeltaj yaan junpʼéel residencia utiaʼal discapacitadoʼob tu kaajil Valencia, kex 160 kilómetros tu xamanil Alicante. Tak bejlaʼeʼ tiʼ kajaʼaneniʼ.

Kex maʼ tu páajtal in líikʼil tin camaeʼ yaan u seguer in meyajtik Jéeoba. Yéetel le pensión bey xan yéetel le uláakʼ áantaj ku tsʼaʼabaltenoʼ tin manaj junpʼéel computadora, ka tsʼaʼab tu tséel in cama. Tin manaj xan junpʼéel celular. Sáamsamaleʼ yaan máax tʼabikten le computadoraoʼ bey xan le celularoʼ. Utiaʼal in controlartik le computadoraoʼ ku meyajten junpʼéel chan palanca kin péeksik yéetel in noʼoch. Tsʼoʼoleʼ kin náachik juntsʼíit cheʼ utiaʼal in tsʼáankʼabtik u teclasil le computadora wa u numerosil le celularoʼ.

¿Bix u meyajten le baʼaloʼobaʼ? Yáaxeʼ ku páajtal in wokol Internet teʼ jw.org, bey xan teʼ BIBLIOTECA ICH INTERNET Watchtoweroʼ. Jach tsʼoʼok u yáantken le nuʼukuloʼobaʼ. Óoliʼ sáamsamal táan in xokik le publicacionoʼoboʼ, beyoʼ kin kanik u maasil yoʼolal Dios bey xan yoʼolal u jatsʼuts modos. Ken in wuʼuyinba tin juunal wa ken chan lúubuk in wóoleʼ mantatsʼ yaan baʼax líiʼsik in wóol teʼ jw.org.

Yéetel in computadoraeʼ ku páajtal xan in wuʼuyik le muchʼtáambaloʼob ku beetaʼal teʼ Najil Reinooʼ. Desde tin cuartoeʼ kin comentar, kin beetik oración, kin máansik tsoltʼaanoʼob yéetel kin xokik tak le revista U Pʼíich Tulumil Kanan ken aʼalaʼaktenoʼ. Kex maʼ tu páajtal in bin teʼ muchʼtáambaloʼ kin wuʼuyik táakpajaʼanen ichil le múuchʼuliloʼ.

Yéetel in celular bey xan yéetel in computadoraeʼ ku páajtal tak in kʼaʼaytaj. Kex maʼ tu páajtal in máan joonaj joonajil jeʼex u maasiloʼ, ku páajtal in tsikbaltik tiʼ uláakʼ máakoʼob le baʼax kin creertikoʼ. Como jatsʼuts in wilik in tʼaan tiʼ telefonoeʼ, le ancianoʼoboʼ —máaxoʼob kanáantik le múuchʼuliloʼ— tu chaʼajoʼob in nuʼuktik le kʼaʼaytaj ku beetaʼal tiʼ telefonooʼ. Le máaxoʼob ku táakpajloʼoboʼ sukuʼunoʼob maʼ tu páajtal xan u jóokʼloʼob tu yotochoʼob.

 Baʼaleʼ maʼ chéen le kin beetkiʼ. Sáamsamal ku xíimbaltken in amigoʼob. Ku taaskoʼob u láakʼtsiloʼob wa uláakʼ máaxoʼob u kʼáatoʼob kaanbal tiʼ le Bibliaoʼ, yéetel suuk u yaʼalikoʼobten ka in tsoltiʼob. Yaan kʼiineʼ ku taal familiaʼob utiaʼal ka k-múul xok le Bibliaoʼ. Junpʼéel baʼax jach uts tin tʼaaneʼ letiʼe ken kulak le mejen paaloʼob tin cama u tsikbaltoʼob baʼaxten u yaabiltmoʼob Jéeobaoʼ.

Jach kiʼimak in wóol in sen xíimbaltaʼal. Mantatsʼ chuup in cuarto yéetel in amigoʼob; yaan tiʼ letiʼobeʼ náach kajaʼanoʼob. Le máaxoʼob atenderken teʼ residenciaoʼ ku jaʼakʼal u yóoloʼob ken u yiloʼob. Sáamsamal kin tsʼáaik gracias tiʼ Jéeoba tumen tu chaʼaj in wantal ichil u jatsʼuts kaajal.

Cada ken kʼáataʼakten bix u binteneʼ, suuk in waʼalik: «Láayliʼ wayaneneʼ; maʼ tin pʼatkinba». In wojel maʼ chéen teen kin muʼyajiʼ. Yoʼolal jejeláas baʼaloʼobeʼ tuláakal le cristianoʼob ‹táan u baʼateloʼob yoʼolal le fejoʼ›, pero maʼ xan tu pʼatkubaʼob (1 Timoteo 6:12). ¿Baʼax tsʼoʼok u yáantken tiʼ tuláakal le añosaʼ? Sáamsamal kin orar utiaʼal in tsʼáaik gracias tiʼ Jéeoba úuchik u yeʼesikten yaan u biilal in kuxtal. In tsʼaamaj in wóol in meyajt Dios yéetel in chʼikmaj in paakat tiʼ le jatsʼuts kuxtal kun antaltoʼonoʼ.

Mantatsʼ kin tuukul tiʼ le Paraíso kun antal way Luʼumoʼ yéetel kin máansik tin tuukul táan in wáalkab yéetel táan in síitʼ tu kaʼatéen. Yaan horaeʼ kin báaxaltʼaan yéetel in amigo José María, máax tsaʼay polio tiʼ, yéetel kin waʼalik: «¿Máax tiʼ toʼon jeʼel u ganar tiʼ junpʼéel carreraeʼ?». «Jeʼel máaxak ka ganarnakeʼ mix baʼal tiʼ —ku núukik—. U maas kʼaʼanaʼanileʼ eske yaan k-áalkab teʼ Paraísooʼ.»

Maʼ chéen chʼaʼabil in kuxtal yéetel le kʼojaʼanilaʼ. In wojel jach koʼoj jóokʼikten le baʼax tin beetaj tin táankelmiloʼ. Kex beyoʼ kin tsʼáaik u diosboʼotikil tiʼ Jéeoba tumen maʼ tu xúumpʼatteniʼ. Tu tsʼáajten junpʼéel familia yaan tiʼ tuláakal yóokʼol kaab, tu yeʼesajten yaan u biilal in kuxtal, tu beetaj u kiʼimaktal in wóol ikil in wáantik u maasil, yéetel tu tsʼáajten junpʼéel jatsʼuts esperanza. Ichil junpʼíit tʼaanoʼobeʼ jeʼel u páajtal in waʼalikeʼ Jéeobaeʼ tu tsʼáajten maas tiʼ le kin merecertikoʼ.