Le Bibliaoʼ ku yaʼalikeʼ Jobeʼ «sen toj kaʼach u kuxtal» (Job 1:1). Ku yaʼalikeʼ Loteʼ juntúul «máak toj u kuxtal» (2 Pedro 2:8). Ku yaʼalik xaneʼ Davideʼ ‹tu beetaj baʼax toj tu táan Dios› (1 Reyes 14:8). Baʼaleʼ koʼox ilik bix kuxlajik le máakoʼobaʼ. Yaan k-tsʼáaik cuentaeʼ 1) yaan tuʼux fallarnajoʼob, 2) yaan baʼax jeʼel k-kanik tiʼ letiʼobeʼ yéetel 3) jeʼel k-lúubul utsil tiʼ Dios kex j-kʼeban máakoʼoneʼ.

Jobeʼ yaʼab baʼaxoʼob tu muʼyajtaj. Le oʼolaleʼ kʼuch u tukleʼ baʼax u kʼáaj tiʼ Dios wa yaan u fe máak, baʼaleʼ le tuukul beyoʼ junpuliʼ maʼ maʼalobiʼ (Job 9:20-22). Tsʼoʼoleʼ Jobeʼ maʼ tu xuʼulul kaʼach u yaʼalik juntúul máak uts. Le máaxoʼob uʼuyik baʼax ku yaʼalikoʼ hasta kʼuch u tukloʼobeʼ Jobeʼ maas uts u yuʼubikuba ke Dios (Job 32:1, 2; 35:1, 2).

Loteʼ maʼ séeb tu beetil baʼax tu yaʼalaj Diosiʼ.  U kajnáaliloʼob Sodoma yéetel Gomorraeʼ jach kʼaas u kuxtaloʼob, le oʼolal Loteʼ jach «ku yaatal kaʼach u yóol u puksiʼikʼal» (2 Pedro 2:8). Dios túuneʼ tu yaʼalajtiʼ nukaʼaj u xuʼuls le máakoʼob kajaʼanoʼob teʼ kaajoʼoboʼ, wa u kʼáat u salvart u láakʼtsiloʼobeʼ kʼaʼabéet u jóoʼskoʼob teʼeloʼ. Baʼaleʼ tu lugar u séeb beetik baʼax tu yaʼalaj Dioseʼ, Loteʼ jach xáanchaji; maʼ u kʼáat kaʼach u pʼat u yotochiʼ. Le angeloʼob túuxtaʼab tumen Dios utiaʼal u salvartikoʼobeʼ anchaj tak u machkoʼob tu kʼaboʼob utiaʼal u jóoʼskoʼob teʼ kaajoʼ (Génesis 19:15, 16).

Juntéenjeakeʼ Davideʼ maʼ tu controlartaj u tsʼíibolaleʼ ka núupkʼebanchaj yéetel juntúul koʼolel tsʼokaʼan u beel. Tsʼoʼoleʼ maʼ chéen leloʼ: tu túuxtaj kíimsbil u yíicham le koʼolel utiaʼal maʼ u yojéeltaʼal tumen mix máak le baʼax úuchoʼ (2 Samuel, capítulo 11). Le Bibliaoʼ ku yaʼalikeʼ «maʼ lúub utsil tiʼ Yuumtsil baʼax tu beetaj Davidiʼ» (2 Samuel 11:27).

Le óoxtúul máakoʼobaʼ fallarnajoʼob; hasta kʼuch u beetoʼob baʼaloʼob jach kʼaastak. Baʼaleʼ jeʼex ken k-il beoraaʼ, jach tu jaajil u kʼáat u beetoʼob kaʼach baʼax ku yaʼalik Dios. Tu yeʼesoʼob jach tu jaajil arrepentirnajoʼob yéetel u kʼáat u yutskíint u kuxtaloʼob, le oʼolal lúuboʼob utsil tu táan Dios. Kex fallarnajoʼobeʼ le Bibliaoʼ ku yaʼalikeʼ tu tsʼáaj u fejoʼob tiʼ Dios.

U jaajileʼ tuláakloʼon k-fallar tumen j-kʼebanoʼon (Romailoʼob 3:23). Baʼaleʼ jeʼel u páajtal k-arrepentir yéetel k-beetik tuláakal le ku páajtal utiaʼal k-kaʼa natsʼikba tiʼ Diosoʼ.

 ¿Bix tu beetil Job, Lot yéetel David utiaʼal u kaʼa natsʼkubaʼob tiʼ Dios? Jobeʼ uts u puksiʼikʼal, le oʼolal arrepentirnaj yoʼolal baʼax tu yaʼalaj yéetel tu kʼexaj u tuukul ka tsʼoʼok u tʼaan Dios tu yéetel (Job 42:6). Loteʼ kʼaas u yilik xan bix u kuxtal kaʼach u kajnáaliloʼob Sodoma yéetel Gomorra. Kex xáanchaj úuchik u pʼatik u yotocheʼ tu tsʼookeʼ tu beetaj baʼax aʼalaʼabtiʼ tumen Dios. Jóokʼ tiʼ le kaajoʼ, mix tu sutaj u paakat tiʼ le baʼax tu pʼatoʼ. David xaneʼ kex lúub tiʼ junpʼéel nojoch kʼebaneʼ tu yeʼesaj uts u puksiʼikʼal: arrepentirnajeʼ ka tu kʼáat óoltaj tiʼ Dios ka perdonartaʼak (Salmo 51).

Dioseʼ u yojel j-kʼeban máakoʼon. Le oʼolaleʼ kex fallarnaj le óoxtúul máakoʼob tsʼoʼok k-ilkoʼ maʼ xuʼul u yilkoʼob bey utsul máakoʼobeʼ. Dioseʼ maʼ tu kʼáatiktoʼon baʼax maʼ tu páajtal k-beetik tumen u «yojel yéetel baʼax beetaʼanoʼon: maʼalob u yojlil, toʼoneʼ maʼay luʼumoʼon» (Salmo 103:14). ¿Baʼax túun ku páaʼtik Dios tiʼ toʼon?

Le ka tsikbalnaj yéetel u hijoeʼ, Davideʼ tu yaʼalaj baʼax jeʼel u páajtal k-beetkeʼ: «Techeʼ Salomón in paal, táan óolt u [Dios] a taata, meyajt yéetel tuláakal a puksiʼikʼal» (1 Crónicas 28:9). ¿Bix jeʼel k-meyajtik Dios yéetel tuláakal k-puksiʼikʼaleʼ? Unaj k-yaabiltik, tsʼoʼoleʼ unaj k-tsʼíiboltik k-ojéeltik yéetel k-beetik baʼax uts tu tʼaan. Maʼ u kʼáat u yaʼal wa mix juntéen ken k-fallariʼ, baʼaxeʼ yaan k-tsʼíiboltik u nuʼuktikoʼon yéetel yaan k-chaʼik u tojkíintik k-kuxtal. Job yéetel Loteʼ úuchik u beetkoʼob beyoʼ aʼalaʼab «toj u kuxtal[oʼob]»; David xaneʼ aʼalaʼab ‹toj baʼax tu beetaj›. Kex tu yóoxtúulal fallarnajoʼobeʼ lúuboʼob utsil tiʼ Dios.

Le oʼolaleʼ wa ku taal t-tuukul baʼaloʼob kʼaastak, k-aʼalik baʼaloʼob yéetel ken tsʼoʼokkeʼ ku yaatal t-óol, bey xan wa k-beetik wa baʼax tsʼoʼoleʼ k-ilik maʼ maʼalobeʼ, maʼ unaj k-chaʼik u lúubul k-óoliʼ. Kʼaʼajaktoʼon le óoxtúul máakoʼobaʼ. Dioseʼ u yojel tuláakloʼon k-fallar, baʼaleʼ ku páaʼtik ka k-meyajt yéetel tuláakal k-puksiʼikʼal: ka k-yaabilte yéetel ka k-tsʼáa k-óol k-beet baʼax uts tu tʼaan. Wa k-beetik beyoʼ yaan u páajtal xan k-lúubul utsil tiʼ Dios.