Yaʼab máax tuklikeʼ le Kʼaasilbaʼaloʼ chéen letiʼe baʼax kʼaasoʼ. Baʼaleʼ wa beyoʼ, ¿baʼaxten túun ku yaʼalik le Bibliaoʼ Satanás, le Kʼaasilbaʼaloʼ, tʼaanaj yéetel Jesucristo bey xan yéetel Dios? Koʼox ilik.

Le táant u yokjaʼ Jesuseʼ, le Kʼaasilbaʼaloʼ óoxtéen tu túuntaj u yóol. Yáaxeʼ tu yóotaj u yoks tu tuukul Jesús ka u kaxt chéen u yutsil yéetel ka u beet junpʼéel milagro utiaʼal ka yanak baʼal u jaante. Tsʼoʼoleʼ tu yóotaj ka u tsʼáa u kuxtal tu chiʼ kíimil chéen utiaʼal ka ilaʼak tumen tuláakal máak. Tu tsʼookeʼ tu yaʼalajtiʼeʼ wa ku xoltal tu táan kex chéen juntéeneʼ jeʼel u tsʼáaik tuláakal u reinoiloʼob yóokʼol kaab utiaʼal u gobernarte. Jesuseʼ maʼ tu chaʼaj u táabsaʼaliʼ, baʼaxeʼ óoxtéen tu chʼaʼchiʼitaj le Kiliʼich Tsʼíiboʼ (Mateo 4:1-11; Lucas 4:1-13).

¿Máax yéetel tʼaanaj Jesús? ¿Chéen wa yéetel junpʼéel baʼal kʼaas yaan ichil u wíinklil? Le Bibliaoʼ ku yaʼalikeʼ Jesuseʼ «tsʼoʼok u túuntaʼal u yóol tiʼ tuláakal baʼal jeʼex toʼoneʼ, chéen baʼaleʼ letiʼeʼ maʼ yanchaj u kʼebaniʼ» (Hebreoʼob 4:15). Ku yaʼalik xan: «Letiʼeʼ maʼ kʼebanchajiʼ yéetel mix junpʼéel tuus jóokʼ tu chiʼ» (1 Pedro 2:22). Jeʼex k-ilkoʼ Jesuseʼ maʼ kʼebanchajiʼ; tu yeʼesajtoʼon bix unaj u chúukpajal k-óol tiʼ Dios. Jesús túuneʼ maʼ tʼaanaj yéetel junpʼéel baʼax kʼaas yaan tu wíinkliliʼ, baʼaxeʼ tʼaanaj yéetel juntúul máak jach tu jaajil yaan, kex maʼ tu páajtal u yilaʼal.

Le baʼax tu yaʼalaj u Kʼaasilbaʼal tiʼ Jesusoʼ ku yeʼesikeʼ jach tu jaajil yaan le Kʼaasilbaʼaloʼ.

• Satanaseʼ tu yaʼalaj tiʼ Jesuseʼ wa ku xoltal tu táan kex chéen juntéeneʼ jeʼel u tsʼáaik tuláakal u reinoiloʼob yóokʼol kaab tiʼeʼ (Mateo 4:8, 9). Wa jaaj minaʼan le Kʼaasilbaʼaloʼ bejlaʼa maʼ tu túuntik u yóol Jesuseʼ. Tsʼoʼoleʼ Jesuseʼ maʼ tu yaʼalaj wa maʼ u tiaʼal Satanás u reinoiloʼob le yóokʼol kaaboʼ.

• Ka tu yilaj Satanás maʼ béeychaj yéetel Jesuseʼ, «lukʼ tu yiknal utiaʼal u páaʼtik uláakʼ súutukil maas maʼalob» (Lucas 4:13). Le Kʼaasilbaʼal túunoʼ juntúul kʼasaʼan ku chʼaʼtuklik tu juunal u sen chʼaʼpachtik máak.

• Le angeloʼob xanoʼ taaloʼobeʼ «ka joʼopʼ u tsʼáaikoʼob baʼax kʼaʼabéet tiʼ Jesús» (Mateo 4:11). Kex maʼ tu páajtal k-ilik le angeloʼoboʼ jach tu jaajil yanoʼob, le oʼolal páajchaj u yáantkoʼob yéetel u líiʼskoʼob u yóol Jesús. ¿Maʼ wa túun lelaʼ ku yeʼesikeʼ kex maʼ tu páajtal u yilaʼal le Kʼaasilbaʼaloʼ jach tu jaajil yaan?

U libroil Job xaneʼ ku yaʼalikeʼ kaʼatéen tsikbalnaj u Kʼaasilbaʼal yéetel Dios. Tsʼoʼoleʼ Dioseʼ kaʼatéen tʼaanaj maʼalob yoʼolal Job, tumen chúukaʼan u yóol. Le Kʼaasilbaʼaloʼ tu yaʼaleʼ Jobeʼ chéen ku meyajtik Dios utiaʼal u jóoʼsik utsil, maʼ tumen u yaabiltmiʼ. Le Kʼaasilbaʼal túunoʼ tu tsʼáaj naʼatbileʼ maas u kʼaj óol Job ke Dios. Jéeobaeʼ tu chaʼaj u toʼokol tiʼ Job le baʼaxoʼob yaantiʼoʼ, u kíimsaʼal u paalal yéetel u tsaʼaysaʼal junpʼéel kʼojaʼanil tiʼ. * Ka máan kʼiineʼ ilaʼabeʼ jaaj baʼax ku yaʼalik Dios yoʼolal Job; le Kʼaasilbaʼaloʼ chéen táan u tuus. Dioseʼ tu beetaj u bin utsil tiʼ Job úuchik u chúukpajal u yóol (Job 1:6-12; 2:1-7).

Le ken u yaʼal le Biblia tʼaanaj Dios yéetel le Kʼaasilbaʼaloʼ, ¿u kʼáat wa u yaʼaleʼ tʼaanaj yéetel junpʼéel baʼal kʼaas yaan ichil u wíinklil? Maʼ, tumen le Bibliaoʼ ku yaʼalik: «U beeloʼob Yuumtsileʼ tojtak» (2 Samuel 22:31). Ku yaʼalik xan: «Kiliʼich, kiliʼich, kiliʼich Jéeoba Dios, le Máax yaan tuláakal páajtalil tiʼ[oʼ]» (Apocalipsis 4:8). Kiliʼicheʼ u kʼáat u yaʼal junpʼéel baʼal santo, sagrado, limpio yéetel minaʼan mix junpʼíit kʼaas tiʼ. Lelaʼ ku yeʼesikeʼ Jéeobaeʼ junpuliʼ minaʼan u kʼasaʼanil.

Yaan máaxoʼob aʼalik xaneʼ mix Job anchaji, chéen bin junpʼéel tsikbal patjoʼoltaʼabi. Baʼaleʼ ¿jaaj wa? Le Bibliaoʼ ku yeʼesikeʼ Jobeʼ jach tu jaajil anchaji. Jeʼex teʼ Santiago 5:7-11, ku yaʼalaʼal tiʼ le cristianoʼob ka chúukpajak u yóoloʼob jeʼex Jobeʼ, tumen Dioseʼ ku bendecirtik máax ku chúukpajal u yóol. Baʼaleʼ wa maʼ tu jaajil anchaj Job, yéetel maʼ jaaj wa túuntaʼab u yóol tumen le Kʼaasilbaʼaloʼ, ¿bix túun jeʼel u líiʼsaʼal u yóol le cristianoʼoboʼ? Tsʼoʼoleʼ teʼ Ezequiel 14:14, 20, ku chʼaʼchiʼitaʼal Job paʼteʼ yéetel Noé bey xan Daniel. Jeʼex le máakoʼobaʼ, Jobeʼ jach tu jaajil anchaji yéetel tu tsʼáaj u fe tiʼ Dios. ¿Maʼ wa túun lelaʼ ku yeʼesikeʼ jach tu jaajil anchaj xan le Kʼaasilbaʼal, le máax chʼaʼpachtoʼ?

Ken tʼaanak le Biblia tiʼ le Kʼaasilbaʼaloʼ ku chíikbesik jach tu jaajil kuxaʼan. Baʼaleʼ ¿jeʼel wa u beetik loob tiʼ teech yéetel tiʼ a láakʼtsiloʼobeʼ? Koʼox ilik.

Máans ta tuukuleʼ ku kʼuchul kʼasaʼan máakoʼob ta kaajal. Ku pʼáatal sajbeʼentsil u máan máak yéetel ku káajal u kʼastal u kuxtal uláakʼ máakoʼob. Beoraaʼ tuukulnen tiʼ lelaʼ: wa ka yanak le Kʼaasilbaʼal yéetel u kʼasaʼan angeloʼob ta kaajaleʼ ¿baʼax jeʼel u yúuchleʼ? Utiaʼal a núukikeʼ tuukulnen tiʼ le noticias ku máansaʼal ta kaajal yéetel tiʼ tuláakal yóokʼol kaaboʼ.

• ¿Máasaʼ kex yaʼab baʼax ku beetaʼal utiaʼal u xuʼulsaʼal le kʼasaʼaniloʼ, maʼ béeyak u xuʼulsaʼaliʼ?

• ¿Tsʼoʼok wa a tsʼáaik cuentaeʼ bejlaʼeʼ maas ku yoksaʼal espiritismo ichil le náaysaj óolaloʼob kex yaʼab taatatsiloʼob maʼ u kʼáatoʼobiʼ?

• ¿Ka wilik wa bix táan u kʼaskúuntaʼal yóokʼol kaab kex yaʼab baʼaloʼob ku beetaʼal utiaʼal u kanáantaʼal?

• ¿Maʼ wa ta tʼaan yaan máax táan u kʼaskúuntik u tuukul wíinik utiaʼal u xuʼulskuba tu juunal?

Le Bibliaoʼ ku yaʼalik máax yaan tu paach tuláakal le baʼaloʼobaʼ: «Puʼul way yóokʼol kaab le nojoch kaanoʼ, le úuchben kaanoʼ, le ku yaʼalaʼal Kʼaasilbaʼal wa Satanás tiʼoʼ, le máax táan u tusik tuláakal yóokʼol kaaboʼ; puʼul way Luʼum paʼteʼ yéetel u angeloʼobeʼ. [...] ¡Óotsil tiʼ le Luʼumoʼ bey xan tiʼ le kʼáaʼnáaboʼ!, tumen le Kʼaasilbaʼaloʼ tsʼoʼok u yéemel ta wiknaleʼex yéetel jach pʼujaʼan tumen u yojel chéen junpʼíit kʼiin pʼaataltiʼ» (Apocalipsis 12:9, 12). Yéetel le baʼaxoʼob tsʼoʼok k-xakʼaltikoʼ yaʼab máaxoʼob tsʼoʼok u tsʼáaikoʼob cuenta jach tu jaajil yaan le Kʼaasilbaʼaloʼ; kex maʼ tu páajtal k-ilkeʼ letiʼ kʼaskúuntik u tuukul máak bejlaʼeʼ.

¿Bix túun jeʼel u páajtal k-kanáantikba tiʼ le Kʼaasilbaʼaloʼ? Tuláakʼ xookoʼ yaan k-ilik bix jeʼel u páajtal k-kanáantikbaeʼ.