«Teneʼ kin paktik le puksiʼikʼaloʼ»
Ilawil a natsʼkaba tiʼ Dios
«Teneʼ kin paktik le puksiʼikʼaloʼ»
TULÁAKLOʼON k-uʼuymaj u yaʼalaʼaleʼ maʼ jeʼex u yilaʼal máakeʼ maʼ bey u modosiʼ. Lelaʼ u kʼáat u yaʼaleʼ maʼ tu páajtal k-kʼaj óoltik utúul máak chéen yéetel ka k-pakte. U suukaʼanileʼ ken pakt u yich wa máaxeʼ k-jáan aʼalik bix letiʼ, baʼaleʼ Jéeobaeʼ maʼ bey u beetkiʼ. Lelaʼ bey u yeʼesik le baʼax ku yaʼalik 1 Samuel 16:1-12.
Tuukulnen tiʼ le baʼax ku yúuchlaʼ. Dioseʼ nukaʼaj u yéey u túumben reyil u kaajil Israel. Le oʼolal ku yaʼalik tiʼ le profeta Samueloʼ: «In kʼáat ka xiʼikech tu yotoch Isaí [wa Jesé], le Beleniloʼ, tumen tsʼoʼok in yéeyik utiaʼal [u] beet u [reyil] juntúul tiʼ u paalal» (versículo 1). Teʼelaʼ maʼ aʼalaʼabtiʼ bix u kʼaabaʼ le máax tsʼoʼok u yéeyaʼaloʼ, chéen aʼalaʼabtiʼeʼ utúul tiʼ u paalal Jesé. Maʼ xaaneʼ le táan u bin Samuel teʼ Belenoʼ, táan u tukultik lelaʼ: «¿Bix túun ken in wojéelt máakalmáak tiʼ u paalal Jesé tsʼoʼok u yéeyik Jéeoba?».
Le ka kʼuch Samueleʼ tu beetaj upʼéel siibal tiʼ Jéeoba yéetel tu yaʼalaj tiʼ Jesé yéetel u paalal ka táakpajkoʼobiʼ. Le ka tu yilaj Eliab, u maas nojchil tiʼ u paalal Jeseeʼ, Samueleʼ tu tukleʼ letiʼe yéeyaʼan tumen Jéeobaoʼ, tumen jach maʼalob u yilaʼal utiaʼal u beet u reyil (versículo 6).
Baʼaleʼ Jéeobaeʼ maʼ bey tu yilil Eliabiʼ. Letiʼeʼ ku yaʼalik tiʼ Samuel: «Maʼ a paktik u wíinklil mix u kaʼanalil u baakel, tumen teneʼ tsʼoʼok in tsʼáaik juntséelil» (versículo 7). Jéeobaeʼ maʼ chéen tu yilaj u kiʼichkelmil Eliabiʼ, baʼaxeʼ letiʼeʼ ku yilik upʼéel baʼax maas jatsʼuts tiʼ máak.
¿Bix k-ojéeltik lelaʼ? Jéeobaeʼ ku yaʼalik tiʼ Samuel: «Tumen maʼ chéen kʼaʼabéet le baʼax ku yilik le wíinikoʼ; tumen le wíinikoʼ chéen ku paktik le wíinkliloʼ, baʼaleʼ teneʼ kin paktik le puksiʼikʼaloʼ» (versículo 7). Jeʼex k-ilkoʼ le baʼax ku yilik Diosoʼ letiʼe baʼax yaan tu puksiʼikʼal máakoʼ: tumen teʼ ku síijil k-tuukuliʼ, baʼaxoʼob taak k-beetik, yéetel baʼaxoʼob k-uʼuyik, lelaʼ u kʼáat u yaʼaleʼ jach máaxoʼon ichiloʼon. Le oʼolal ku yaʼalaʼaleʼ Jéeobaeʼ ku xakʼaltik le puksiʼikʼaloʼ (Proverbios 17:3, NM). Le oʼolal maʼ tu yéeyaj Eliab, mix uláakʼ seis tiʼ u paalal Jeseiʼ.
Baʼaleʼ Jeseeʼ yaan uláakʼ utúul u paal, David u maas chichnil, «letiʼ kanáantik le tamanoʼoboʼ» (versículo 11). Ka túuxtaʼab tʼambil, le ka kʼucheʼ Jéeobaeʼ tu yaʼalaj tiʼ Samuel: «Líikʼen a jumpáaykunt utiaʼal u beet [u reyil]» (versículo 12). Kex David «kiʼichkelem, ku tsʼoʼokoleʼ ku lúubul utsil[eʼ]», yéeyaʼab tumen Dios tumen jach uts u puksiʼikʼal (1 Samuel 13:14).
Teʼ kʼiinoʼobaʼ yaʼab máakoʼobeʼ chéen ku chʼíikil u yiloʼob u jaʼtsil máak. ¿Máasaʼ jach ku kiʼimakkúunsik k-óol k-ojéeltik Jéeobaeʼ maʼ bey u beetkiʼ? Letiʼeʼ maʼatech u yilik wa kaʼanal k-baakel bey xan wa maʼ, mix xan tu yilik wa jaʼtsoʼon wa maʼ, baʼaxeʼ letiʼeʼ ku yilik le baʼax yaan ichil k-puksiʼikʼaloʼ. K-ojéeltik lelaʼ, ¿máasaʼ ku péekskoʼon utiaʼal ka yanaktoʼon jatsʼuts modos yéetel ka lúubkoʼon utsil tu táan Dios?