1. ¿Baʼax ku tuklik le máakoʼob yoʼolal juntúul palitsiloʼ, baʼaleʼ baʼax u jelaʼanil tiʼ le ku yaʼalik Romailoʼob 12:11?

U BEETKUBA máak palitsil jeʼex u yaʼalik le Bibliaoʼ maʼ jeʼex u tuklik le máakoʼoboʼ. Yaʼab máakeʼ ku tuklikeʼ juntúul palitsileʼ jach ku beetaʼal u muʼyaj. Baʼaleʼ le palitsiloʼob ku yaʼalik le Bibliaoʼ letiʼob óotik ka palitsiltaʼakoʼob tumen jach uts u Tsʼuuliloʼob. Ka tu yaʼalaj apóstol Pablo tiʼ le cristianoʼob teʼ yáax siglo ka u meyajtoʼob «Jéeoba bey palitsileʼ» táan u yaʼaliktiʼob kaʼach ka u beetoʼob tumen ku síijil tu puksiʼikʼaloʼob (Rom. 12:11). ¿Baʼax táakaʼan tiʼ u palitsiltaʼal máak tumen Dios? ¿Baʼax jeʼel k-beetik utiaʼal maʼ u palitsiltkoʼon Satanás yéetel le yóokʼol kaabaʼ? ¿Baʼax utsiloʼob ken u kʼam le palitsiloʼob chúukaʼan u yóoloʼob tiʼ Jéeobaoʼ?

2. 1) ¿Baʼax jeʼel u péeksik juntúul palitsil maʼ u pʼatik u tsʼuulileʼ? 2) ¿Baʼaxten ku póot lomtaʼal kaʼach u xikin le palitsiloʼ?

² Le Ley tu tsʼáaj Jéeoba tiʼ u kaajil Israeloʼ ku yáantkoʼon k-naʼat baʼax ku kʼáatik tiʼ u palitsiloʼob. Ken máanak seis jaʼaboʼobeʼ le judíoʼob palitsiltaʼanoʼob kaʼachoʼ unaj u jáalkʼabtaʼaloʼob (Éxo. 21:2). Baʼaleʼ wa juntúul palitsil u yaabiltmaj u tsʼuulil yéetel u kʼáat u seguer u meyajtikeʼ, le Leyoʼ ku yaʼalik baʼax unaj u beetik. Le tsʼuuloʼ ku nakik u xikin le palitsil tiʼ junpʼéel joonaj wa tu marcoileʼ, tsʼoʼoleʼ ku póot lomtik yéetel junpʼéel punzón (Éxo. 21:5, 6). ¿Baʼaxten ku póot lomtaʼal u xikin? Leloʼ ku yeʼesikeʼ le palitsiloʼ u kʼáat u meyajt u tsʼuulil mantatsʼ yéetel u kʼáat u beet baʼax ku yaʼalik. Lelaʼ ku yáantkoʼon k-naʼat baʼaxten k-kʼubik k-kuxtal tiʼ Jéeoba. Tumen k-yaabiltmeʼ k-kʼáat beet baʼax uts tu tʼaan.

3. ¿Baʼaxten k-kʼubik k-kuxtal tiʼ Dios?

³ Táanil tiʼ k-okjaʼeʼ t-chʼaʼtuklaj k-meyajtik Jéeoba bey palitsileʼ. Ka t-kʼubaj k-kuxtal tiʼ letiʼeʼ t-aʼalaj taak k-beetik baʼax uts tu tʼaan. Mix máak obligartoʼon. Tak le mejen paalal ku kʼubik u kuxtaloʼob tiʼ Dios yéetel ku yokjaʼoboʼ maʼ tu beetkoʼob chéen tumen ku yaʼalaʼaltiʼob tumen u taataʼob, baʼaxeʼ tumen ku síijil tu puksiʼikʼaloʼob. Jach beyoʼ t-kʼubaj k-kuxtal tiʼ Jéeoba, k-Yuum yaan teʼ kaʼanoʼ, tumen k-yaabiltmaj.  Apóstol Juaneʼ tu yaʼalaj: «Lelaʼ letiʼe baʼax u kʼáat u yaʼal u yaabiltaʼal Diosaʼ: ka k-tsʼoʼokbes le baʼaxoʼob ku yaʼalikoʼ» (1 Juan 5:3).

4. ¿Bix k-pʼáatal u ‹palitsiloʼon le justiciaoʼ›?

⁴ Jach kiʼimak k-óol tumen Jéeobaeʼ u kʼammoʼon bey u palitsiloʼobeʼ. Yoʼolal k-fe tiʼ u kuxtal Jesús tu kʼuboʼ tsʼoʼok u pʼáatal maʼ u palitsiloʼon le kʼebanoʼ. U jaajileʼ láayliʼ j-kʼebanoʼoneʼ, baʼaleʼ kex beyoʼ tsʼoʼok k-chʼaʼtuklik k-uʼuyik u tʼaan Dios yéetel Jesús. Tsʼoʼoleʼ tsʼoʼok k-chʼaʼtuklik k-ilik Jéeoba yéetel Jesús bey k-yuumiloʼobeʼ. Tiʼ junpʼéel le cartaʼob tu tsʼíibtoʼ, Pabloeʼ tu yaʼalaj: «Tsʼáa ta tuukuleʼex tsʼoʼok a kíimleʼex tiʼ baʼaloʼob yaan yil yéetel le kʼebanoʼ, baʼaleʼ kuxaʼaneʼex utiaʼal Dios tu yoʼolal Cristo Jesús». Tsʼoʼoleʼ tu yaʼalaj: «¿Maʼ wa a wojleʼexeʼ, wa ku seguer a kʼubkabaʼex bey palitsil tiʼ wa máax utiaʼal a beetkeʼex baʼax u kʼáateʼ, palitsileʼex tiʼ letiʼ tumen ka beetkeʼex baʼax u kʼáat? Wa teʼex táan a beetkabaʼex u palitsil le kʼebanoʼ yaan a kíimleʼex, baʼaleʼ wa táan a beetkabaʼex u palitsil Dioseʼ yaan u yantalteʼex junpʼéel toj kuxtal. Baʼaleʼ gracias tiʼ Dioseʼ, teʼexeʼ kex palitsileʼex kaʼach tiʼ le kʼebanoʼ tsʼoʼok a wuʼuyikeʼex yéetel tuláakal a puksiʼikʼaleʼex u tʼaan le kaʼansajoʼ; le kaʼansaj tu kʼubajteʼex Diosoʼ. Jach beyoʼ, le ka tsʼoʼok a jáalkʼabtaʼaleʼex tiʼ le kʼebanoʼ kʼuch a beetabaʼex palitsil tiʼ le justiciaoʼ» (Rom. 6:11, 16-18). Jeʼex k-ilkoʼ Pabloeʼ tu yaʼaleʼ unaj k-uʼuyik u tʼaan Dios «yéetel tuláakal [k-]puksiʼikʼal». Ken u kʼub u kuxtal máak tiʼ Dioseʼ junpʼéel bix u yeʼesik taak u beetik baʼax uts tu tʼaan Jéeoba yéetel tuláakal u puksiʼikʼal. Tumen letiʼ u Diosil le justiciaoʼ, ken k-kʼub k-kuxtal tiʼ letiʼeʼ k-pʼáatal u ‹palitsiloʼon le justiciaoʼ›.

5. ¿Tu contra baʼax k-baʼateʼel, yéetel baʼaxten?

⁵ Baʼaleʼ ken tsʼoʼokok k-kʼubik k-kuxtal tiʼ Dioseʼ yaʼab baʼax ken k-aktáante. Yaan k-baʼateʼel yéetel kaʼapʼéel baʼal. Yáaxeʼ, k-aktáantik le baʼax tu aktáantaj Pablo úuchjeakiloʼ. Letiʼeʼ tu yaʼalaj: «U jaajileʼ jach ku kiʼimaktal u yóol in puksiʼikʼal yoʼolal u ley Dios, baʼaleʼ kin tsʼáaik cuentaeʼ tin wíinklileʼ yaan uláakʼ ley ku baʼateʼel tu contra le ley yaan tin tuukuloʼ, yéetel ku bisken bey palitsil tiʼ u leyil le kʼeban yaan tin wíinkliloʼ» (Rom. 7:22, 23). Tumen j-kʼebanoʼoneʼ sáamsamal k-baʼateʼel tu contra xan le baʼaloʼob maʼ maʼalob k-tsʼíiboltikoʼ. Le oʼolal apóstol Pedroeʼ ku yaʼaliktoʼon: «Kuxleneʼex jeʼex máakoʼob jáalkʼabtaʼanoʼobeʼ, baʼaleʼ maʼ u meyajteʼex le jáalkʼabil yaanteʼex utiaʼal a balikeʼex le baʼaloʼob kʼaastak ka beetkeʼexoʼ, baʼaxeʼ meyajnakteʼex utiaʼal a beetkabaʼex palitsilil tiʼ Dios» (1 Ped. 2:16).

6, 7. ¿Baʼax ku beetik Satanás utiaʼal u jatsʼutstal u yilaʼal le yóokʼol kaabaʼ?

⁶ U kaʼapʼéeleʼ, k-baʼateʼel tu contra junpʼéel yóokʼol kaab nuʼuktaʼan tumen kʼasaʼan angeloʼob. Satanás, máax nuʼuktik le yóokʼol kaabaʼ, yaʼab baʼax ku beetik utiaʼal u xuʼulul k-meyajtik Jéeoba bey xan Jesús. U kʼáat u palitsiltoʼon, le oʼolal yaʼab baʼax ku beetik utiaʼal u táabsikoʼon (xok Efesoiloʼob 6:11, 12). Letiʼeʼ ku beetik tuláakal utiaʼal u yilaʼal jatsʼuts le yóokʼol kaabaʼ. Apóstol Juaneʼ tu yaʼalaj: «Wa yaan máax ku yaabiltik le yóokʼol kaaboʼ maʼ u yaabiltmaj le Taataoʼ; tumen tuláakal le baʼax yaan teʼ yóokʼol kaabaʼ —u tsʼíibolal le bakʼoʼ, u tsʼíibolal le ichoʼ bey xan u sen kaʼantal u yich máak tu yoʼolal le baʼaxoʼob yaantiʼoʼ— maʼ tiʼ le Taata u taaloʼ, baʼaxeʼ tiʼ le yóokʼol kaabaʼ» (1 Juan 2:15, 16).

⁷ Teʼ kʼiinoʼobaʼ le máakoʼoboʼ ku tsʼíiboltkoʼob u maasil jeʼel baʼaxakeʼ. Satanaseʼ u kʼáat ka u tukult máakeʼ letiʼe taakʼin beetik u yantal kiʼimak óolaloʼ. Tuláakal tuʼux ku beetaʼal nukuch kúuchiloʼob tuʼux ku koʼonol jejeláas baʼaloʼob. Mantatsʼ ku yeʼesaʼal maas maʼalob ka kuxlak máak jach maʼalob yéetel ka u náays u yóol. Yaan xan máaxoʼob bisik máak xíimbal tiʼ jatsʼuts kúuchiloʼob, baʼaleʼ u suukileʼ yéetel máaxoʼob maʼatech u meyajtikoʼob Dios. Jeʼel tuʼux k-sutikbaeʼ ku yaʼalaʼaltoʼon ka k-maas maʼalobkíint bix k-kuxtal, baʼaleʼ jeʼex u kuxtal le yóokʼol kaabaʼ.

8, 9. ¿Baʼax jeʼel u yúuchul tiʼ máakeʼ, yéetel baʼaxten jach yaj ka úuchuk tiʼ beyoʼ?

⁸ Ka tʼaanaj Pedro tiʼ le máaxoʼob yanoʼob kaʼach teʼ múuchʼulil joʼopʼ u tuukuloʼob jeʼex u máakiloʼob le yóokʼol kaabaʼ, tu yaʼalaj: «Letiʼobeʼ  jach kiʼ u yuʼubikoʼob u béeykuntkoʼob u tsʼíibolal u bakʼeloʼob tak de kʼiin. Beyoʼob u luʼumil yéetel u yéekʼil junpʼéel nookʼeʼ, yéetel uts tu tʼaan u kaʼanskoʼob baʼaloʼob maʼ jaajtak le ken kulakoʼob janal ta wéeteleʼexoʼ», tsʼoʼoleʼ tu yaʼalaj: «Tumen letiʼobeʼ ku tʼaanoʼob yéetel kaʼanal ichil, baʼaleʼ chéen kunel baʼax ku yaʼalikoʼob. Tsʼoʼoleʼ ikil u binoʼob tu paach u tsʼíibolal u bakʼeloʼob yéetel ikil u kuxtaloʼob ichil x-maʼ suʼtalileʼ, ku kʼaskúuntikoʼob u tuukul le máaxoʼob istikyaj u púutsʼloʼob tiʼ le máaxoʼob beetik baʼaloʼob kʼaastakoʼ. Le máakoʼobaʼ ku yaʼalikoʼob jeʼel u yantalteʼex jáalkʼabileʼ, baʼaleʼ letiʼobeʼ palitsiltaʼanoʼob tumen le kʼaakʼas kuxtaliloʼ. Tumen le máax ku ganartaʼaloʼ ku suut palitsilil tiʼ le máax ganartoʼ» (2 Ped. 2:13, 18, 19).

⁹ Juntúul máax ku beetik baʼax ku «tsʼíibol[tik] le ichoʼ» kex ku tuklik jáalkʼab u beet jeʼel baʼax u kʼáateʼ, maʼ jaajiʼ. Baʼaxeʼ palitsiltaʼan tumen le Kʼaasilbaʼal, u tsʼuulil le yóokʼol kaabaʼ (1 Juan 5:19). Yaan junpʼéel baʼax jach yaj jeʼel u yúuchleʼ, letiʼe u palitsiltaʼal máak tumen le ayikʼaliloʼ. Wa ka u palitsiltoʼoneʼ jach istikyaj jeʼel k-púutsʼultiʼeʼ.

10, 11. ¿Maases máaxoʼob ku yilaʼal u tuʼusul tumen Satanás, yéetel baʼaxten jeʼel u taasik talamil u kaʼantal u xook máakeʼ?

¹⁰ Jeʼex tu beetil tu jardinil Edeneʼ, u enemigo Dioseʼ maases ku yilik u tusik le táankelmoʼob yéetel le x-lóoʼbayanoʼoboʼ. Satanaseʼ jach maʼ kiʼimak u yóol ken u yil juntúul máax taak u meyajtik Jéeoba bey palitsileʼ. Bey u yuʼubikuba xan wa yaan uláakʼ máakoʼob taak u beetkoʼob beyoʼ. Satanaseʼ u kʼáat ka xuʼuluk u meyajtaʼal Dios tumen tuláakal le máaxoʼob tsʼoʼok u kʼubik u kuxtaloʼob tiʼ Jéeobaoʼ.

¹¹ Koʼoneʼex kaʼa tʼaan tiʼ le palitsil ku yóotik ka poʼotok u xikinoʼ. Tu káajbaleʼ yaj u yuʼubik, baʼaleʼ ken máanak kʼiineʼ ku xuʼulul. Chéen baʼax ku pʼáatleʼ letiʼe joʼol yaan tu xikin ku yeʼesik palitsiltaʼanoʼ. Juntúul táankelem wa juntúul x-lóoʼbayaneʼ jeʼel xan u talamtal wa u yaatal u yóol u yilik maʼ tu beetik baʼax ku beetik u yéet xookoʼobeʼ. Satanaseʼ u kʼáat ka tuklaʼakeʼ chéen jeʼel u kiʼimaktal u yóol máak wa ku kaʼantal u xookeʼ, baʼaleʼ maʼ unaj u tuʼubultoʼoneʼ yaanal baʼax beetik u yantal kiʼimak óolal tiʼ máak. Jesuseʼ tu yaʼalaj: «Kiʼimak u yóol le máaxoʼob wiʼijoʼob tiʼ tuláakal le baʼaxoʼob ku tsʼáaik Diosoʼ» (Mat. 5:3). Le máaxoʼob tsʼoʼok u kʼubik u kuxtaloʼob tiʼ Jéeobaoʼ kuxaʼanoʼob utiaʼal u beetkoʼob baʼax uts tu tʼaan Dios maʼ utiaʼal u beetkoʼob baʼax uts tu tʼaan Satanasiʼ. U yaabiltmoʼob u ley Jéeoba, tsʼoʼoleʼ bul kʼiin yéetel bul áakʼab táan u tuukuloʼob tu yoʼolal (xok Salmo 1:1-3). Baʼaleʼ máax ku kaʼantal u xookeʼ ku pʼáatal minaʼan tiempo utiaʼal u tuukul tiʼ baʼax ku yaʼalik le Bibliaoʼ bey xan utiaʼal u meyajtik Jéeoba.

12. ¿Baʼax ku kʼaʼabéettal u chʼaʼtuklik yaʼab táankelmoʼob?

 ¹² Tiʼ u yáax carta tu tsʼíibtaj tiʼ le sukuʼunoʼob kajaʼanoʼob kaʼach Corintooʼ, Pabloeʼ tu kʼáataj: «¿Palitsilech wa ka tʼaʼanech? Maʼ a chaʼik u chiʼichnakkúuntikech». Tsʼoʼoleʼ tu yaʼalaj: «Baʼaleʼ wa jeʼel u páajtal a jáalkʼabtikabaeʼ, kaxt bix jeʼel a beetkeʼ» (1 Cor. 7:21). Teʼ yáax siglooʼ yaan tsʼuuloʼob jach kʼasaʼanoʼob kaʼach tiʼ u palitsiloʼob. Wa beyoʼ juntúul máax meyajtik Dioseʼ maas maʼalob kaʼach ka u beet tuláakal le ku páajtal utiaʼal u chaʼabal. Bejlaʼeʼ tiʼ yaʼab luʼumiloʼobeʼ ku yaʼalaʼal tak tuʼux unaj u náakal u xook máak. Ken tsʼoʼokkeʼ jeʼel u páajtal u chʼaʼtuklik máak baʼax ken u beeteʼ, wa u kʼáateʼ jeʼel u páajtal u chʼaʼtuklik u maas kʼubik u yóol u meyajt Dioseʼ. Baʼaleʼ wa ku yokol máak xook universidadeʼ maʼ kun béeytal u beetik (xok 1 Corintoiloʼob 7:23).

13. ¿Máakalmáak le xook maas ku taasik utsil tiʼ máaxoʼob meyajtik Diosoʼ?

¹³ Pabloeʼ tu yaʼalaj tiʼ le sukuʼunoʼob kajaʼanoʼob kaʼach Colosasoʼ: «Kanáantabaʼex utiaʼal beyoʼ mix máak ka u táabseʼex yéetel u kaʼansaj chéen máakoʼob, wa yéetel le chéen kunel tʼaanoʼob suuk u beetaʼal tumen le úuchben láakʼtsiloʼoboʼ; leloʼobaʼ baʼaloʼob kʼaʼanaʼantak utiaʼal le yóokʼol kaabaʼ, maʼ utiaʼal Cristoiʼ» (Col. 2:8). Bejlaʼeʼ tiʼ yaʼab máax ku meyaj «u kaʼansaj chéen máakoʼob, wa [...] le chéen kunel tʼaanoʼob suuk u beetaʼal tumen le úuchben láakʼtsiloʼob» utiaʼal u kaʼansajoʼoboʼ. U suukileʼ le máaxoʼob ku kaʼantal u xookoʼob tiʼ baʼaloʼob beyaʼ, kex jach ku kaanbaloʼobeʼ, yaʼab baʼaloʼob maʼ u yojel u beetoʼobiʼ le oʼolal maʼ tu béeytal u aktáantkoʼob u talamiloʼob le kuxtalaʼ. Baʼaleʼ le máaxoʼob meyajtik Jéeobaoʼ chéen ku xookoʼob utiaʼal u kankoʼob wa baʼax meyajil. Beyoʼ ku yantal baʼax kʼaʼabéettiʼob yéetel ku béeytal u kʼubikubaʼob u meyajtoʼob Dios. Ku yilik u beetkoʼob le baʼax tu yaʼalaj Pablo tiʼ Timoteoaʼ: «U jaajileʼ wa k-kʼubik k-óol k-meyajt Dioseʼ, yaʼab utsil jeʼel u taasiktoʼoneʼ, baʼaleʼ chéen wa kiʼimak k-óol yéetel le baʼaxoʼob yaantoʼonoʼ. [...] Le oʼolaleʼ wa yaan baʼal k-jaante, yaan k-nookʼ bey xan tuʼux k-antaleʼ, yaan u kiʼimaktal k-óol yéetel le baʼaloʼobaʼ» (1 Tim. 6:6, 8). Máax meyajtik Dioseʼ maʼ tu kaxtik chéen diplomaʼob wa junpʼéel juʼun tuʼux ku yeʼesik tsʼoʼok u kʼamkuba tiʼ baʼax tu xokaj, baʼaxeʼ ku tsʼáaik u yóol kʼaʼaytaj utiaʼal u yáantik u maasil u beetubaʼob disipuloil (xok 2 Corintoiloʼob 3:1-3).

14. Jeʼex u yaʼalik Filiposiloʼob 3:8, ¿bix u yilik kaʼach Pablo u páajtalil u beetkuba palitsil tiʼ Dios yéetel tiʼ Cristo?

¹⁴ Ilawil baʼax úuch tiʼ Pablo. Letiʼeʼ kaʼansaʼab tumen Gamaliel, juntúul máax kaʼansik u Ley le judíoʼob kaʼachoʼ. Le xook tu beetoʼ bey  jeʼex ka xooknaj máak tiʼ universidad bejlaʼeʼ. Baʼaleʼ anchaj xan u páajtalil u beetkuba palitsil tiʼ Dios yéetel tiʼ Cristo. Ka tu ketaj le kaʼapʼéel baʼaloʼobaʼ, ¿baʼax tu yaʼalaj yoʼolal le xook u beetmoʼ? Letiʼeʼ tu yaʼalaj: «U jaajileʼ kin wilik minaʼan u tojol tuláakal le baʼaloʼob wa ka in ket yéetel le u tojol le yaʼabkach baʼaloʼob tsʼoʼok in kanik tiʼ Cristo Jesús in Yuumtsiloʼ». Tsʼoʼoleʼ tu yaʼalaj: «Tu yoʼolal letiʼeʼ, teneʼ tsʼoʼok in xúumpʼattik tuláakal le baʼaloʼoboʼ yéetel kin wilkoʼob bey junpʼéel nikiʼ sojoleʼ; lelaʼ tin beetaj utiaʼal ka in tiaʼalint Cristo» (Fili. 3:8). Bey unaj u tuukul le táankelmoʼoboʼ bey xan le taatatsiloʼoboʼ. Tumen beyoʼ yaan u béeytal u yilkoʼob tak tuʼux unaj u náakal u xook máak (ilawil le dibujoʼoboʼ).

15, 16. ¿Máakalmáak le jejeláas bix u kaʼanskoʼon Jéeobaoʼ, yéetel baʼax u biilal?

¹⁵ ¿Baʼax jach ku beetaʼal ichil u maas yaʼabil le universidadoʼob yaan way yóokʼol kaabeʼ? U suukileʼ le máaxoʼob ku xookoʼob teʼeloʼ ku tuklikoʼob jeʼel u béeytal u tsʼáaikubaʼob tu contra le gobierno bey xan tu contra uláakʼ autoridadoʼob. Yaʼab xan u núupkʼebantaloʼob yéetel ku suuktal u beetkoʼob jejeláas baʼaloʼob (Efe. 2:2). Baʼaleʼ maʼ bey u yúuchul ichil u kaajal Jéeobaiʼ. Teʼeloʼ jach maʼalob u kaʼansaʼal máak yéetel yaan jeetsʼeliliʼ. Tuláakal semanaʼob jeʼel u páajtal k-kaanbal teʼ Escuela utiaʼal k-Kaʼansik u Tʼaan Diosoʼ. Tsʼoʼoleʼ le táankelmoʼob precursoroʼob maʼ tsʼokaʼan u beeloʼoboʼ ku béeytal u binoʼob teʼ Escuela Bíblica utiaʼal Sukuʼunoʼob maʼ Tsʼokaʼan u Beeloʼoboʼ. Yéetel le máaxoʼob tsʼokaʼan u beeloʼob precursoroʼoboʼ ku béeytal u binoʼob teʼ Escuela Bíblica utiaʼal le Máaxoʼob Tsʼokaʼan u Beeloʼoboʼ. Le kaʼansaj ku taal tiʼ Diosaʼ ku yáantkoʼon utiaʼal k-uʼuyik u tʼaan Jéeoba, k-Tsʼuulil yaan teʼ kaʼanoʼ.

¹⁶ Jeʼel u páajtal xan k-kaxtik kaʼansajoʼob ku keʼetel yéetel ayikʼalil teʼ Índice de las publicaciones Watch Tower yéetel teʼ Watchtower Libraryoʼ. Tuláakal le kaʼansajoʼob ku tsʼaʼabaloʼ ku beetaʼal utiaʼal u maas adorartaʼal Jéeoba. Beyoʼ k-áantik le máakoʼob utiaʼal u kaʼa biskubaʼob yéetel Diosoʼ (2 Cor. 5:20). Beyoʼ letiʼobeʼ yaan u béeytal u kaʼanskoʼob uláakʼ máakoʼob (2 Tim. 2:2).

17. ¿Baʼax utsiloʼob ku kʼamik le máaxoʼob yéeyik le maas maʼalob kaʼansajoʼ?

¹⁷ Tu kettʼaanil le talentosoʼ Jesuseʼ tu yaʼaleʼ le kaʼatúul palitsil chúukaʼan u yóoloʼoboʼ aʼalaʼabtiʼob maʼalob baʼax tu beetoʼob. Le oʼolal le tsʼuuloʼ tu yaʼalajtiʼob ka múul kiʼimakchajak u yóoloʼob tu yéetel, tsʼoʼoleʼ tsʼaʼab nukuch meyaj u beetoʼob (xok Mateo 25:21, 23). Bejlaʼa xaneʼ wa k-yéeyik le maas maʼalob kaʼansaj yanoʼ, yaan u taasiktoʼon yaʼab utsiloʼob yéetel yaʼab kiʼimak óolal. Koʼoneʼex ilik baʼax úuch tiʼ Michael. Tumen jach maʼalob u calificacioneʼ aʼalaʼabtiʼ tumen u profesoroʼob ka xiʼik tiʼ junpʼéel muchʼtáambal utiaʼal u yaʼalaʼaltiʼ jeʼel u páajtal u yokol xook universidadeʼ. Baʼaleʼ jaʼakʼ u yóoloʼob tumen Michaeleʼ tu chʼaʼtuklaj u xook utiaʼal u kanik junpʼéel oficio. Le oʼolal jach maʼ xáanchajeʼ joʼopʼ u meyaj yéetel u beetik u precursor regularil. ¿Tu yuʼubaj wa yaan baʼax tu peʼertaj? Letiʼeʼ ku yaʼalik: «Le kaʼansaj tin kʼamaj bey precursor, bey xan le kin kʼamik beora bey ancianoaʼ, maʼ tu béeytal in ketik yéetel mix baʼal. Le taakʼin jeʼel u yantalten kaʼachoʼ mix baʼal tu táan le kiʼikiʼtʼaanoʼob yéetel le baʼaxoʼob tsʼoʼok u tsʼaʼabalten in beetoʼ. ¡Jach kiʼimak in wóol maʼ binen xook universidadiʼ!».

18. ¿Baʼaxten jeʼel u páajtal k-aʼalikeʼ minaʼan uláakʼ kaʼansaj maas maʼalob tiʼ le ku taal tiʼ Diosoʼ?

¹⁸ Le kaʼansaj ku taal tiʼ Diosoʼ letiʼe maas maʼalob yanoʼ. Ku yáantkoʼon k-meyajt Jéeoba bey palitsileʼ yéetel k-ojéeltik baʼax uts tu tʼaan. Ku tsʼáaik xan u páajtalil k-jáalkʼabtaʼal tiʼ le «kʼeban yéetel le kíimiloʼ» utiaʼal u yantaltoʼon «u kiʼichkelem jáalkʼabtajil u paalal Dios» (Rom. 8:21). Baʼaleʼ maases ku kaʼansiktoʼon bix jeʼel k-eʼesik k-yaabiltmaj Jéeoba, k-Tsʼuulil yaan teʼ kaʼanoʼ (Éxo. 21:5).