Yéetel ki’imak óolal bino’ob áantaj Ecuador

JUNTÚUL táankelem j-Jaajkunaj ku taal tu luʼumil Italia, ku kʼaabaʼtik Brunoeʼ tu yuʼubaj bey tiaʼan tiʼ junpʼéel xaʼay bejeʼ. Desde táanil tiʼ u jóokʼol preparatoria yéetel u jóoʼsik le maas maʼalob calificacionoʼ, u láakʼtsiloʼob yéetel u maestroʼobeʼ ku sen aʼalikoʼobtiʼ ka xooknak universidad. Baʼaleʼ wa jaypʼéel jaʼaboʼob táanileʼ tu kʼubaj u kuxtal tiʼ Jéeoba yéetel tu chʼaʼtuklaj u tsʼáaik táanil u meyajtik. ¿Baʼax túun tu beetaj? Letiʼeʼ ku yaʼalik: «Tin waʼalaj tiʼ Jéeoba yaan in beetik le baʼax tin waʼalajtiʼ ka tin kʼubaj in kuxtal tiʼoʼ yéetel in tsʼáaik táanil in meyajtik. Baʼaleʼ tin waʼalaj xan tiʼ in kʼáat in beet jejeláas meyajoʼob ichil u kaajal».

 Maʼ sen úuch tiʼ leloʼ Brunoeʼ bin tu luʼumil Ecuador, Sudamérica. ¿Bix binik tiʼ? Letiʼeʼ ku yaʼalik: «Jéeobaeʼ tu tsʼáajten maas tiʼ le tin kʼáatajtiʼoʼ». U maas maʼalobileʼ ka kʼuch Ecuadoreʼ, tu kʼaj óoltaj yaʼab táankelmoʼob binoʼob xan utiaʼal u maas meyajtikoʼob Jéeobaiʼ.

TÁANKELMOʼOB KU KʼAMKOʼOB U INVITACIÓN JÉEOBA

Jeʼex yaʼab táankelmoʼob tiʼ tuláakal yóokʼol kaabeʼ Brunoeʼ, tu kʼamaj le invitación ku taal tiʼ Jéeobaaʼ: «Beeteʼex utiaʼal ka a wileʼex wa maʼ tin jeʼik u [ventanailoʼob] kaʼan utiaʼal in láalik ta wóokʼoleʼex [maas] yaʼab ayikʼalil» (Mal. 3:10). Tumen u yaabiltmoʼob Jéeobaeʼ, meyajnaj u tiempoʼob, u muukʼoʼob yéetel baʼaxoʼob yaantiʼob utiaʼal u maas kʼaʼaytikoʼob le Reino tiʼ junpʼéel luʼum tuʼux maas kʼaʼabéet j-kʼaʼaytajoʼoboʼ.

Ken kʼuchukoʼob teʼ tuʼux kun kʼaʼaytajoʼoboʼ, ku yilkoʼobeʼ «le joochoʼ jach yaʼab, baʼaleʼ le j-meyajoʼoboʼ jach junpʼíitoʼob» (Mat. 9:37). Bey u yeʼesik le baʼax úuch tiʼ Jaqueline, ku taal tu luʼumil Alemania, letiʼeʼ yéetel kiʼimak óolal tu tsʼíibtaj tiʼ u Betelil Ecuador: «Tsʼoʼok junpʼíit maas tiʼ kaʼapʼéel jaʼab táan in kʼaʼaytaj wayeʼ yéetel kin tsʼáaik trece xookoʼob, kantúul tiʼ letiʼobeʼ ku binoʼob mantatsʼ muchʼtáambal. ¡Jach kiʼimak in wóol!». Chantal, ku taal tu luʼumil Canadaeʼ, ku yaʼalik xan: «Tu jaʼabil 2008, binen tu jáal u kʼáaʼnáabil Ecuador tuʼux yaan chéen junpʼéel múuchʼulil kaʼachi. Bejlaʼeʼ yaan óoxpʼéel múuchʼuliliʼ yéetel maas tiʼ treinta precursoroʼob. ¡Minaʼan  uláakʼ baʼax jach jeʼel u taasik kiʼimak óolaleʼ! Maʼ sen úucheʼ kaʼa binen áantaj, baʼaleʼ binen tiʼ junpʼéel kaaj yaan teʼ witsoʼob ku kʼaabaʼtik Andesoʼ, kex 2,700 metros [9,000 pies] u kaʼanlil. Teʼeloʼ chéen junpʼéel múuchʼulil yaan, kex kajaʼan 75,000 máakoʼobiʼ. Le máakoʼoboʼ jach uts tu tʼaan u yuʼubikoʼob le kʼaʼaytajoʼ, le oʼolal teneʼ jach kiʼimak in wóol in beetik le meyajaʼ».

TU AKTÁANTOʼOB LE TALAMILOʼOBOʼ

U jaajileʼ maʼ chéen chʼaʼabil u bin máak kʼaʼaytaj yaanal luʼumiliʼ. Yaan tak táankelem yéetel x-lóoʼbayanoʼobeʼ tsʼoʼok u aktáantkoʼob talamil táanil tiʼ u lukʼloʼob tuʼux kajaʼanoʼob. Kayla, ku taal tu luʼumil Estados Unidoseʼ, ku yaʼalik: «Le baʼaloʼob ku yaʼalik jujuntúul sukuʼunoʼob tumen ku tuklikoʼob jeʼel u yáantik máakeʼ tu beetaj kaʼach u lúubul in wóol. Maʼ tu naʼatkoʼob kaʼach baʼaxten taak in bin kʼaʼaytaj tuláakʼ luʼumil. Leloʼ yaan kʼiineʼ tu beetaj u kaʼapʼéelchajal in tuukul». Kex beyoʼ Kaylaeʼ bin kʼaʼaytaj tuláakʼ luʼumil. Letiʼeʼ ku yaʼalik baʼax áante: «Sen payalchiʼinajen, tsikbalnajen yéetel kiikoʼob bey xan yéetel sukuʼunoʼob yiijchajaʼan u tuukuloʼob, leloʼ tu beetaj in wilik Jéeobaeʼ ku kiʼikiʼtʼantik le máax ku tsʼáaik u yóol meyajoʼ».

Yaan xaneʼ talam u yilik u kanik uláakʼ tʼaan. Siobhan, juntúul j-Jaajkunaj ku taal tu luʼumil Irlandaeʼ, ku yaʼalik: «Ku lúubul in wóol tumen maʼ tu béeytal in tʼaan jeʼex u maasiloʼ. Tin wilaj kʼaʼabéet u chúukpajal in wóol utiaʼal in kanik le idiomaoʼ yéetel in cheʼejtik le baʼaloʼob maʼ tin waʼalik tu beeloʼ». Anna, ku taal tu luʼumil Estoniaeʼ, ku yaʼalik: «Maas maʼ talam tin wilil le ooxol, le polvo yéetel in wichíintik síis jaʼ tiʼ in kanik españoliʼ. Yaʼab u téenel tin wuʼuyaj maʼ tin tsaʼayal. Baʼaleʼ tin wilaj maas maʼalob ka in wil bukaʼaj baʼal tsʼoʼok in kanik, maʼ letiʼe baʼax maʼ in kanoʼ».

Tsʼoʼoleʼ yaan xaneʼ ku yuʼubikuba chéen tu juunal. Jonathan, ku taal tu luʼumil Estados Unidoseʼ, ku yaʼalik: «Le maʼ úuch kʼuchken tuʼux kin kʼaʼaytajoʼ, lúub in wóol tumen náach yanil in familia yéetel in amigoʼob. Baʼaleʼ jach tu yáanten úuchik in kʼubik in wóol kʼaʼaytaj yéetel xakʼalxook. Le jatsʼuts experienciaʼob anchajten teʼ kʼaʼaytaj yéetel le amigoʼob anchajten teʼ múuchʼuliloʼ jach tu líiʼsoʼob in wóol».

Le baʼax suuk tiʼ máakoʼ ku taasik xan talamil. Beau, juntúul sukuʼun ku taal tu luʼumil Canadaeʼ, ku  yaʼalik: «Yaan kʼiineʼ le tuʼux u taal máakoʼ mantatsʼ yaan jaʼ yéetel corriente tu yotoch. Baʼaleʼ wayeʼ, jeʼel baʼalak horaeʼ ku pʼáatal minaʼan». Tiʼ yaʼab luʼumileʼ le máakoʼoboʼ jach óotsiloʼob, talam u viajaroʼob yéetel maʼ u yojeloʼob xookiʼ. Junpʼéel baʼax tsʼoʼok u yáantik Ines, ku taal tu luʼumil Austria, u aktáant le talamilaʼ letiʼe u chʼíikil u yil le jatsʼuts modos ku yeʼesik le máakoʼoboʼ. Letiʼeʼ ku yaʼalik: «Le máakoʼoboʼ jach táaj utsoʼob, ku síikoʼob baʼax yaantiʼob yéetel jach kabal u yóoloʼob. Tsʼoʼoleʼ jach taak u kaanbaloʼob tiʼ Dios».

«[MAAS] YAʼAB AYIKʼALIL»

Tuláakal le máaxoʼob tsʼoʼok k-aʼalikaʼ maʼ chéen chʼaʼabil úuchik u binoʼob kʼaʼaytaj tu luʼumil Ecuadoriʼ. Baʼaleʼ tsʼoʼok u yilkoʼobeʼ Jéeobaeʼ ku tsʼáaik u «maas yaʼabil tiʼ le baʼax k-kʼáatikoʼ wa k-tuklikoʼ» (Efe. 3:20). Tsʼoʼok u yilkoʼobeʼ Dioseʼ ku tsʼáaik «[maas] yaʼab ayikʼalil» (Mal. 3:10). Koʼoneʼex ilik le baʼax ku yaʼalikoʼob yoʼolal le kʼaʼaytaj ku beetkoʼoboʼ.

Bruno: «Ka kʼuchen tu luʼumil Ecuadoreʼ, táanil binen kʼaʼaytaj teʼ tuʼux ku máan le áalkab jaʼ ku kʼaabaʼtik amazonasoʼ. Tsʼoʼoleʼ áantajnajen utiaʼal u maas nojochkíintaʼal u najil Betel, yéetel bejlaʼeʼ tiʼ kin meyajiʼ. Le tiaʼanen kaʼach Italiaoʼ, tin chʼaʼtuklaj in tsʼáaik táanil in meyajtik Jéeoba, letiʼeʼ tsʼoʼok u tsʼáaikten kiʼimak óolal yéetel jejeláas meyajoʼob ichil u kaajal».

Beau: «Bejlaʼeʼ maas maʼalob in biskinba yéetel Jéeoba, tumen tu luʼumil Ecuadoreʼ maas yaan u páajtalil in meyajtik. Tsʼoʼoleʼ tsʼoʼok in kʼaj óoltik yaʼab lugaroʼob jatsʼutstak, junpʼéel baʼal úuch joʼopʼok in tsʼíiboltik».

Anna: «Maʼ tin tuklaj wa juntúul kiik maʼ tsʼokaʼan u beel jeʼex teneʼ jeʼel u páajtal u meyaj jeʼex juntúul misioneraeʼ. Baʼaleʼ beoraaʼ tsʼoʼok in wilik jeʼel u páajtaleʼ. Kiʼimak in wóol in wáantik uláakʼ máakoʼob u meyajtoʼob Dios, in táakpajal utiaʼal u líiʼsaʼal u Najiloʼob Reino yéetel in kʼaj óoltik uláakʼ máakoʼob, Jéeobaeʼ jach tsʼoʼok u kiʼikiʼtʼantiken».

Elke: «Tu luʼumil Austria, teʼ tuʼux in taaloʼ, tin kʼáataj tiʼ Jéeoba ka u yáanten in kaxt kex junpʼéel xook. Baʼaleʼ wayeʼ kin tsʼáaik quince xookoʼob. Jach ku kiʼimaktal in wóol in wilik bix u tsʼáaik u yóol le máakoʼob u meyajtoʼob Diosoʼ».

Joel: «Jach jatsʼuts u meyajtaʼal Jéeoba tiʼ junpʼéel tuʼux maʼ u kʼaj óol máak kaʼachiʼ. Ka maas kʼubik a wóol tiʼ Dios yéetel ku kiʼimaktal a wóol ken a wil bix u kiʼikiʼtʼantik baʼax ka beetik. Ka lukʼen tu luʼumil Estados Unidos, ka kʼuchen teʼ tuʼux kin kʼaʼaytajoʼ chéen seis j-kʼaʼaytajoʼob yaan kaʼachiʼ, baʼaleʼ ka máan junpʼéel jaʼabeʼ tu chukaj veintiuno yéetel tu kʼiinil le Kʼaʼajsajiloʼ tu chukaj 110 u túulal máakoʼob».

TECHEʼ ¿BAʼAX KEN A BEETE?

Wa juntúul j-Jaajkunajech yéetel jeʼel u páajtal a bin áantaj teʼ tuʼux maas kʼaʼabéet j-kʼaʼaytajoʼoboʼ, ¿yaan wa a biniʼ? U jaajileʼ kʼaʼabéet a jach tukultik tubeel. Baʼaleʼ maases kʼaʼabéet a yaabiltik Jéeoba yéetel a wéet máakil. Wa yáantech le yaabilaj yéetel le baʼaxoʼob ku kʼáataʼaloʼ, kʼáat u yáantaj Jéeoba ich payalchiʼ. Tsʼoʼoleʼ maʼalob ka a tsikbalt tiʼ a taataʼob yéetel tiʼ le ancianoʼob yaan ta múuchʼuliloʼ. Maʼ xaaneʼ yaan a wilkeʼ jeʼel u páajtal a bin kʼaʼaytaj táanxel luʼumileʼ.

[Uláakʼ baʼax ku tsoʼolol teʼ táan juʼun 3]

«Sen payalchiʼinajen, tsikbalnajen yéetel kiikoʼob bey xan yéetel sukuʼunoʼob yiijchajaʼan u tuukuloʼob, leloʼ tu beetaj in wilik Jéeobaeʼ ku kiʼikiʼtʼantik le máax ku tsʼáaik u yóoloʼ.» (Kayla, ku taal tu luʼumil Estados Unidos)

[Foto yéetel cuadro yaan teʼ táan juʼun 6]

Bix jeʼel a líiʼskaba utiaʼal a bin áantaj táanxel luʼumileʼ

• Unaj u suuktal a xakʼalxook

• Il baʼax ku yaʼalik K-meeyjil tiʼ le Reinooʼ, tiʼ agosto tiʼ 2011, táan juʼun 4 tak 6

• Tsikbalnen yéetel máaxoʼob tsʼoʼok u binoʼob áantaj táanxel luʼumil

• Kan wa baʼax yoʼolal le luʼumiloʼ yéetel bix suuk u kuxtal le máakoʼoboʼ

• Chʼaʼ junpʼéel curso utiaʼal a kanik le tʼaanoʼ

[Foto yéetel cuadro yaan teʼ táan juʼun 6]

Le bix u kaxtik u kuxtal jujuntúuloʼ

• Cada jaʼabeʼ ku meyajoʼob wa jaypʼéel mesoʼob teʼ luʼum tuʼux u taaloʼoboʼ

• Ku rentartik u yotochoʼob wa u negocioʼob

• Ku meyajoʼob tiʼ Internet

[Fotoʼob yaan teʼ táan juʼun 4 yéetel 5]

1 Jaqueline (Alemania)

2 Bruno (Italia)

3 Beau (Canadá)

4 Siobhan (Irlanda)

5 Joel (Estados Unidos)

6 Jonathan (Estados Unidos)

7 Anna (Estonia)

8 Elke (Austria)

9 Chantal (Canadá)

10 Ines (Austria)