U jaajileʼ deporsi ku pʼuʼujul máak le kéen beetaʼak wa baʼax tiʼ, chéen baʼaleʼ Dioseʼ maʼ u kʼáat ka u vengartuba máakiʼ. Letiʼeʼ ku yaʼaliktoʼon ka k-pʼat tu kʼab le baʼax ku beetaʼaltoʼonoʼ tumen letiʼ kun xuʼulsik le kʼasaʼan máakoʼoboʼ (Salmo 37:7, 10).

Le kéen u vengartuba máakeʼ chéen ku beetik u maas antal pʼektajil. Le oʼolaleʼ wa juntúul máak ku yaʼaliktech baʼal bey xan ku beetiktech loobeʼ maʼ a sutik u jeel. Controlartaba wa calmartaba. Yaan kʼiineʼ maas maʼalob maʼ k-beetik u cuentail le baʼax ku beetaʼaltoʼonoʼ (Proverbios 19:11). Chéen baʼaleʼ yaan kʼiin xaneʼ yaan baʼax jeʼel u páajtal k-beetkeʼ. Por ejemploeʼ wa ka woklaʼal bey xan wa ku beetaʼaltech uláakʼ wa baʼaxeʼ maʼ xaaneʼ maas maʼalob ka a waʼal tiʼ le policíaʼoboʼ wa tiʼ le autoridadoʼoboʼ.

¿Kux túun wa tsʼoʼok a beetik tuláakal le ku páajtal chéen baʼaleʼ maʼ tu yutstal le problemaoʼ? ¿Kux túun wa ka wuʼuyik yaan baʼax uláakʼ kʼaʼabéet a beetik? Kex beyoʼ maʼ a vengarkaba. Tumen wa maʼeʼ chéen yaan u maas nojochtal le problemaoʼ. Maas maʼalob ka a pʼat tu kʼab Dios. Salmo 37:3 tak 5, ku yaʼalik: «Kʼub a wóol tiʼ letiʼ, letiʼ túuneʼ yaan u yáantkech».