TUKULTEʼ táan a chaʼantik u peliculail juntúul koʼolel jach jatsʼuts a wuʼuyik u kʼaay. Lelaʼ ku yeʼesik bix kaʼach tu chichnil, tsʼoʼoleʼ ku yeʼesik bukaʼaj xáanchajik táan u kanik kʼaay. Ku chíikpajal xan bix káajik u kʼaay jejeláas tuʼuxoʼob tak ka jach kʼaj óoltaʼab tuláakal yóokʼol kaab. Tu tsʼookeʼ ku chíikpajal bix chʼíijik yéetel bix kíimik.

Le baʼax ku yeʼesik le peliculaoʼ jach uchaʼan, chéen baʼaleʼ le koʼoleloʼ úuch kíimik. Lelaʼ junpʼéel baʼax suuk u yúuchul tak tiʼ le cientificoʼoboʼ, le máaxoʼob ku báaxal bolaʼoboʼ wa uláakʼ máaxoʼob jach kʼaj óolaʼanoʼoboʼ. Kex wa yaʼab baʼaxoʼob maʼalobtak tu beetoʼobeʼ, maʼ xaaneʼ jeʼel k-tuklikeʼ: ¿Baʼax uláakʼ jeʼel kaʼach u beetik wa maʼ u chʼíijil yéetel u kíimileʼ?

Jeʼex k-ilkoʼ mix máak ku púutsʼul tiʼ le kíimiloʼ (Eclesiastés 9:5). Kex jeʼel baʼaxak ka u beeteʼ, láayliʼ ku chʼíijil yéetel ku kíimileʼ. Tsʼoʼoleʼ junsúutuk u jáan úuchul wa baʼax tiʼ máak wa u kʼojaʼantal. Le Bibliaoʼ ku yaʼalikeʼ u kuxtal máakeʼ bey jeʼex «le sereno ku yilaʼal chéen junsúutukoʼ» (Santiago 4:14).

Yaʼab máakoʼobeʼ maʼ u yojloʼob baʼax oʼolal kuxaʼanoʼoniʼ, le oʼolal ku yaʼalikoʼob: «Koʼoneʼex túun janal yéetel ukʼul, tumen sáamaleʼ yaan k-kíimil» (1 Corintoiloʼob 15:32). ¿Máasaʼ kéen u yaʼaloʼob beyaʼ u yojloʼob deporsi yaan u kíimloʼob? Yaʼab máakeʼ kéen u aktáant wa baʼax ichil u kuxtaleʼ ku kʼáatik: «¿Baʼax oʼolal kuxaʼanoʼon?». ¿Tuʼux jeʼel k-kaxtik u núukil lelaʼ?

Yaʼab máakeʼ uts tu tʼaan u yilkoʼob baʼax ku yaʼalik le cientificoʼob yoʼolal leloʼ. U jaajileʼ le cientificoʼoboʼ tsʼoʼok u beetkoʼob yaʼab baʼaloʼob jeʼex tsʼaakoʼob utiaʼal u yilkoʼob maʼ u séeb kíimil máak. Kex beyoʼ láayliʼ yaʼab máakoʼob maʼ tu naʼatkoʼob le baʼaloʼobaʼ: ¿Baʼaxten k-chʼíijil yéetel k-kíimil? ¿Yaan wa u kʼuchul u kʼiinil u xuʼulul? Lelaʼ letiʼe baʼax ken k-il tuláakʼ xookoʼoboʼ. Tsʼoʼoleʼ yaan xan k-ilik u núukil lelaʼ: ¿Baʼaxten kuxaʼanoʼon?