Dioseʼ tsʼoʼok u tsʼáaiktoʼon u páajtalil k-tsikbal tu yéetel utiaʼal k-aʼaliktiʼ bix k-uʼuyikba. Le profeta Davidoʼ (Daud) tu yaʼalaj: «In Dios, teech uʼuyik le oraciónoʼoboʼ, le oʼolal tuláakal máak ken u natsʼuba ta wiknal» (Salmo 65:2). Chéen baʼaleʼ, ¿bix unaj k-orar utiaʼal u yuʼubikoʼon Dios yéetel utiaʼal ka u bendecirtoʼon?

Salmo 62:8, ku yaʼalik: «Jeʼekʼabt a puksiʼikʼaleʼex tiʼ letiʼ». Kéen orarnakoʼon tiʼ Dioseʼ unaj k-aʼaliktiʼ jach bix k-uʼuyikba. Letiʼeʼ ku yuʼubik le máaxoʼob ku oraroʼob yéetel tuláakal u puksiʼikʼaloʼoboʼ.

Kex jejeláas bix u yaʼalaʼal tiʼ Dioseʼ, chéen junpʼéel u kʼaabaʼ yaan. Letiʼeʼ ku yaʼalik: «Teneʼ Jéeobaen, letiʼe in kʼaabaʼoʼ» (Isaías 42:8). Le ka tsʼíibtaʼab u Tʼaan Dioseʼ ku chíikpajal kex siete mil u téenel le kʼaabaʼ Jéeobaoʼ. Yaʼab profetaʼobeʼ tu yaʼaloʼob u kʼaabaʼ Dios ka orarnajoʼob tiʼ letiʼ. Jeʼex Abraháneʼ tu yaʼalaj: «Jéeoba, [...] chaʼa u seguer in tʼaan [ta wéetel]» (Génesis 18:30). Toʼon xaneʼ unaj u meyajtoʼon u kʼaabaʼ Jéeoba Dios kéen orarnakoʼon.

Kex jeʼel baʼalak idioma ka orarnakoʼoneʼ Dioseʼ ku naʼatik bix k-uʼuyikba yéetel baʼax k-tuklik. Hechos 10:34 yéetel 35, ku yaʼalik: «Dioseʼ mix máak jelaʼan u paktik, baʼaxeʼ tiʼ tuláakal kaajeʼ ku kʼamik jeʼel máaxak ku beetik baʼax maʼalobeʼ yéetel jeʼel máaxak u chʼaʼamaj saajkilil tiʼeʼ».

Chéen baʼaleʼ utiaʼal ka bendecirtaʼakoʼon tumen Dioseʼ maʼ chéen unaj k-orariʼ. Teʼ tuláakʼ xookoʼoboʼ yaan u tsoʼolol baʼax uláakʼ unaj k-beetik.