«Ka u tsʼáa u yóol meyaj [máak] yéetel ka u beet utsil meyaj utiaʼal ka yanak baʼax u tsʼáa tiʼ le máax kʼaʼabéet wa baʼax tiʼoʼ» (EFESIOS 4:28).

Dioseʼ ku yaʼaliktoʼoneʼ maʼ unaj k-ilik le meyaj bey junpʼéel kuuchoʼ baʼaxeʼ bey junpʼéel baʼal maʼalobeʼ. ¿Baʼax utsil ku taasik u meyaj máak? Ku beetik u kiʼimaktal u yóol tumen ku béeytal u tsʼáaik baʼax kʼaʼabéet tiʼ u familia, u yáantik máax kʼaʼabéet áantajtiʼ yéetel le patrónoʼoboʼ maas jeʼel u tsʼáaikoʼob meyaj tiʼ máak kéen u yiloʼob saʼakʼóoleʼ. Jach jaaj le baʼax ku yaʼalik le Bibliaaʼ: Le meyajoʼ junpʼéel «baʼax ku síik Dios tiʼ máak» (Eclesiastés 3:13).

«Toʼoneʼ jach k-ojel yaantoʼon junpʼéel maʼalob conciencia yéetel k-kʼáat k-beet tuláakal baʼal tu nuʼuk» (HEBREOS 13:18).

Wa suukaʼan k-beetik baʼax tu nuʼukeʼ yaan u yantaltoʼon junpʼéel maʼalob conciencia, yaan k-uʼuyikba maʼalobil yéetel mix baʼal ken u bis k-wenel. Tsʼoʼoleʼ u maasileʼ yaan u confiaroʼob tiʼ toʼon yéetel yaan u respetarkoʼonoʼob. Chéen baʼaleʼ le máaxoʼob maʼ tu beetkoʼob baʼax tojoʼ maʼ kiʼimak u yóoloʼobiʼ yéetel maʼ tu bintiʼob utsil. Maʼ tranquilo xan u concienciaʼobiʼ yéetel saajkoʼob u chuʼukloʼob.

«Le bix a kuxtaleʼexoʼ ka u yeʼes maʼ a yaabiltmeʼex le taakʼinoʼ, yéetel kiʼimakchajak a wóoleʼex yéetel le baʼaxoʼob yaanteʼexoʼ» (HEBREOS 13:5).

Deporsi kʼaʼabéettoʼon le taakʼin utiaʼal k-manik k-oʼoch wa uláakʼ baʼaloʼob kʼaʼabéettoʼonoʼ, pero wa k-yaabiltikeʼ jeʼel u taasiktoʼon problemaseʼ. Yaan máakoʼobeʼ ku sen chʼíikiloʼob meyaj utiaʼal u yantaltiʼob yaʼab baʼaloʼob. Ikil u beetkoʼob beyoʼ ku káajal u yantal problemas tiʼob yéetel u yatanoʼob, maʼ tu máanskoʼob tiempo yéetel u paalaloʼob yéetel jeʼel tak u kʼojaʼantaloʼobeʼ (1 Timoteo 6:9, 10). Le máax u sen yaabiltmaj le taakʼinoʼ jeʼel u káajal u yookoleʼ wa u beetik uláakʼ baʼaloʼob kʼaastak. Juntúul máax jach yaan u naʼateʼ tu yaʼalaj: «Juntúul máax chúukaʼan u yóoleʼ jach yaan u bendecirtaʼal, pero le máax ku yilik u séeb ayikʼaltaleʼ yaan u lúubul tiʼ baʼax kʼaas» (Proverbios 28:20).

«Kanáant le naʼatoʼ bey xan le maʼalob tuukul yaantechoʼ» (PROVERBIOS 3:21).

Yaʼab máax tuklikeʼ wa kaʼanchajaʼan u xook máak yéetel wa maʼalob u bintiʼeʼ jeʼel u yáantaj utiaʼal u beetkuba responsableeʼ yéetel jeʼel u yáantaj xan utiaʼal u beetkuba juntúul maʼalob taatatsileʼ. Chéen baʼaleʼ kex yaan tiʼ máak tuláakal le baʼaloʼobaʼ maʼ u kʼáat u yaʼal wa mantatsʼ kun antal tuláakal baʼax kʼaʼabéettiʼiʼ bey xan wa mantatsʼ kun kiʼimaktal u yóol. Utiaʼal u bintoʼon maʼalobil yéetel utiaʼal ka yanaktoʼon kiʼimak óolal mantatsʼeʼ kʼaʼabéet k-chaʼik u nuʼuktikoʼon Dios. Le Bibliaoʼ ku yaʼalikeʼ le máaxoʼob uʼuyik u tʼaan Diosoʼ yaan u jóokʼol maʼalobil tiʼob tuláakal baʼax ku beetkoʼob (Salmo 1:1-3).