Juan 14:1-31
14 «Maʼ u péek u yóol a puksiʼikʼaleʼex.+ Tsʼáa a fejeʼex tiʼ Dios+ yéetel tsʼáa a fejeʼex xan tiʼ teen.
2 Tu yotoch in Taataeʼ yaʼab lugaroʼob yaan utiaʼal u pʼáatal máakiʼ.* Wa minaʼaneʼ jeʼel kaʼach in waʼalikteʼexeʼ, chéen baʼaleʼ tumen yaneʼ táan in bin in preparart junpʼéel lugar utiaʼal a wantaleʼexiʼ.+
3 Le kéen xiʼikeneʼ yaan in preparartikteʼex junpʼéel lugar, tsʼoʼoleʼ yaan in suut. Teen túuneʼ yaan in kʼamkeʼex teʼ najoʼ, beyoʼ le tuʼux kin antaloʼ tiʼ xan kan antaleʼexiʼ.+
4 Le tuʼux kin binoʼ teʼexeʼ a kʼaj óoleʼex u bejil».
5 Tomáseʼ+ tu yaʼalajtiʼ: «Yuumtsil, maʼ k-ojel tuʼux ka biniʼ. ¿Bix túun a waʼalik k-kʼaj óol u bejil?».
6 Jesúseʼ tu yaʼalajtiʼ: «Teen le bejoʼ,+ teen le jaajoʼ+ yéetel teen le kuxtaloʼ.+ Mix máak ku náatsʼal tu yiknal le Taata wa maʼ tin woʼolaloʼ.+
7 Wa ka a kʼaj óolteneʼex kaʼacheʼ bejlaʼa tsʼoʼok xan a kʼaj óoltikeʼex in Taataeʼ. Desde teʼ súutukaʼ a kʼaj óoleʼex yéetel tsʼoʼok a wilkeʼex».+
8 Felipeeʼ tu yaʼalajtiʼ: «Yuumtsil, eʼestoʼon le Taataoʼ, yéetel leloʼ yaan».
9 Jesúseʼ tu yaʼalajtiʼ: «Felipe, tsʼoʼok u xáantal yanaken ta wéeteleʼex, kex beyoʼ, ¿maʼ kʼuchkech a kʼaj óolteniʼ? Le máax tsʼoʼok u yilkeneʼ tsʼoʼok xan u yilik le Taataoʼ,+ ¿baʼaxten túun ka waʼalik: ‹Eʼestoʼon le Taataoʼ›?
10 ¿Maʼ wa ta creertik junmúuchʼ yanilen yéetel le Taataoʼ, yéetel le Taataoʼ junmúuchʼ yanil tin wéetel?+ Le baʼaxoʼob kin waʼalikteʼexoʼ maʼ chéen tu juunal in wóol kin waʼalikiʼ,+ baʼaxeʼ le Taata junmúuchʼ yanil tin wéeteloʼ táan u beetik le baʼaxoʼob u tukultmoʼ.
11 Creerteʼex junmúuchʼ yanilen yéetel le Taataoʼ, yéetel le Taataoʼ junmúuchʼ yanil tin wéetel. Wa maʼ ta creerkeʼex yoʼolal le baʼax kin waʼalikoʼ creerteʼex yoʼolal le baʼaxoʼob kin beetkoʼ.+
12 Jach tu jaajil kin waʼalikteʼex: le máax ku tsʼáaik u fe tiʼ teneʼ yaan xan u beetik le meyajoʼob kin beetkoʼ, yéetel yaan u beetik maas nukuch meyajoʼob ke le jeʼeloʼobaʼ,+ tumen teneʼ táan in bin tu yiknal le Taataoʼ.+
13 Jeʼel baʼaxak xan ka a kʼáateʼex tin kʼaabaʼeʼ teneʼ yaan in beetik, beyoʼ teʼexeʼ yaan a alabarkeʼex le Taata yoʼolal le Paaloʼ.+
14 Wa ka kʼáatkeʼex wa baʼax tin kʼaabaʼeʼ teneʼ yaan in beetik.
15 Wa a yaabiltmeneʼexeʼ yaan a beetkeʼex le baʼaxoʼob kin waʼalikoʼ.+
16 Teneʼ yaan in kʼáatik tiʼ le Taata ka u túuxt tiʼ teʼex uláakʼ áantaj utiaʼal ka pʼáatak mantatsʼ ta wéeteleʼexoʼ, letiʼ túuneʼ yaan u túuxtik.+
17 Le áantajaʼ letiʼe espíritu santooʼ, le baʼax kaʼansik u jaajiloʼ.+ Le yóokʼol kaaboʼ maʼ tu páajtal u kʼamik tumen maʼ tu yilik yéetel mix u kʼaj óoliʼ.+ Teʼexeʼ a kʼaj óoleʼex tumen tiʼ yaan ta wéeteleʼexeʼ yéetel yaan u pʼáatal ta wiknaleʼex.
18 Teneʼ maʼ ken in pʼateʼex ta juunaleʼex. Yaan in suut ta wiknaleʼex.+
19 Ichil junpʼíit kʼiin maaseʼ le yóokʼol kaaboʼ maʼ ken u yilen tu kaʼatéen.+ Chéen baʼaleʼ teʼexeʼ yaan a wilkeneʼex tumen teneʼ kuxaʼanen, yéetel teʼexeʼ yaan a kuxtaleʼex.
20 Kéen kʼuchuk le kʼiin jeʼeloʼ teʼexeʼ yaan a wojéeltikeʼex junmúuchʼ yanilen yéetel in Taata, yéetel teʼexeʼ junmúuchʼ yanileʼex tin wéetel, teen xaneʼ junmúuchʼ yanilen ta wéeteleʼex.+
21 Le máax ku kʼamik yéetel ku beetik le baʼaxoʼob kin waʼalikoʼ letiʼe máax u yaabiltmenoʼ. Le máax u yaabiltmen xanoʼ yaan u yaabiltaʼal tumen in Taata, teen xaneʼ yaan in yaabiltik yéetel yaan in chaʼik u kʼaj óoltiken tubeel».
22 Ka tsʼoʼokeʼ aʼalaʼabtiʼ tumen Judas+ (lelaʼ maʼ Judas Iscarioteiʼ): «Yuumtsil, ¿baʼaxten ka waʼalik yaan a chaʼik k-kʼaj óoltikech tubeel, chéen baʼaleʼ maʼ ken a chaʼa u kʼaj óoltikech le yóokʼol kaaboʼ?».
23 Jesús túuneʼ tu núukajtiʼ: «Wa yaan máax u yaabiltmeneʼ yaan u beetik baʼax kin waʼalik,+ yéetel yaan u yaabiltaʼal tumen in Taata. Toʼon túuneʼ yaan k-taal tu yiknal yéetel yaan k-pʼáatal kajtal tu yiknal.+
24 Le máax maʼ u yaabiltmeneʼ maʼ tu beetik le baʼax kin waʼalikoʼ, tsʼoʼoleʼ le baʼaxoʼob ka wuʼuyikeʼex in waʼalikoʼ maʼ in tiaʼaliʼ, baʼaxeʼ u tiaʼal le Taata túuxtenoʼ.+
25 Beora tiaʼanen ta wéeteleʼexaʼ kin waʼalikteʼex le baʼaloʼobaʼ.
26 Chéen baʼaleʼ le espíritu santo ken u túuxt le Taata tin kʼaabaʼoʼ letiʼ kun kaʼansikteʼex tuláakal baʼal yéetel letiʼ kun beetik u kʼaʼajalteʼex tuláakal le baʼaxoʼob tsʼoʼok in waʼalikteʼexoʼ.+
27 Teneʼ yaan u seguer in tsʼáaikteʼex jeetsʼelil jeʼex le jeetsʼelil yaanteʼex beoraaʼ.+ Le jeetsʼelilaʼ maʼ jeʼex le ku tsʼaʼabal tumen le yóokʼol kaaboʼ. Le oʼolaleʼ maʼ a chaʼikeʼex u péek u yóol a puksiʼikʼaleʼex mix u chʼaʼik saajkil.
28 Ta wuʼuyeʼex in waʼalikteʼex: táan in bin, chéen baʼaleʼ yaan in suut ta wiknaleʼex. Wa a yaabiltmeneʼexeʼ yaan u kiʼimaktal a wóoleʼex tumen táan in bin tu yiknal le Taataoʼ, tumen le Taataoʼ maas nojoch tiʼ teen.+
29 Teneʼ tsʼoʼok in waʼalikteʼex táanil tiʼ u yúuchul, beyoʼ kéen úuchkeʼ yaan a creerkeʼex.+
30 Desde beoraaʼ maʼ yaʼab baʼax ken in waʼalteʼexiʼ, tumen táan u taal u gobernanteil le yóokʼol kaaboʼ.+ Letiʼeʼ maʼ tu páajtal u tsʼáaiken yáanal u páajtalil,+
31 chéen baʼaleʼ utiaʼal ka u yojéelt le yóokʼol kaab in yaabiltmaj le Taataoʼ kin beetik le baʼax tsʼoʼok u yaʼalikten le Taata ka in beetoʼ.+ Líikʼeneʼex, koʼoneʼex yaanal tuʼux.
Notas
^ Wa «lugaroʼob yaan utiaʼal u kajtal máakiʼ».
