Daniel 7:1-28
-
Tiʼ Danieleʼ tsʼaʼab u yil kantúul tsʼíitsʼik baʼalcheʼob (1-8)
-
Ku jóokʼol junpʼéel chan baak ku nojbaʼalkúuntkuba (8)
-
-
Le Máax desde jach úuch yanakoʼ ku kutal juzgar (9-14)
-
Ku beetaʼal reyil juntúul máax chíikaʼan tiʼ u paal máak (13, 14)
-
-
Ku yaʼalaʼal tiʼ Daniel baʼax u kʼáat u yaʼal le baʼax tu yiloʼ (15-28)
7 Juntéenjeak le chilikbal Daniel tu camaoʼ wayakʼnaji,*+ yéetel tsʼaʼab u yil jujunpʼéel baʼaloʼob. Lelaʼ úuch teʼ yáax año táan u reinar Belsasar+ u reyil Babiloniaoʼ. Daniel túuneʼ tu tsʼíibtaj le baʼaxoʼob tu wayakʼtoʼ,+ tu tsʼíibtaj tuláakal le baʼaxoʼob tu yiloʼ.
2 Danieleʼ tu yaʼalaj:
«Juntéenjeak de áakʼabeʼ wayakʼnajen, yéetel ¡ilawile!, táan kaʼach u sen woʼoltaʼal u jaʼiloʼob le nojoch kʼáaʼnáab tumen le kanpʼéel iikʼoʼob ku taaloʼob teʼ kaʼanoʼ.+
3 Teʼ kʼáaʼnáab túunoʼ jóokʼ kantúul nukuch tsʼíitsʼik baʼalcheʼob,+ cada juntúuleʼ jelaʼan tiʼ le uláakʼoʼoboʼ.
4 Le yáaxoʼ chíikaʼan tiʼ juntúul león,+ yaan u xiikʼoʼob jeʼex u xiikʼoʼob juntúul águilaeʼ.+ Le táan kaʼach in wilkoʼ tin wilaj u joʼokol u xiikʼoʼob, ka líiʼsaʼab yóokʼol le luʼumaʼ. Le ka tsʼoʼokeʼ beetaʼab u toj waʼatal jeʼex u waʼatal wíinikeʼ, yéetel tsʼaʼab u puksiʼikʼal wíinik tiʼ.
5 Le ka tsʼoʼokeʼ, ¡ilawile!, tin wilaj uláakʼ juntúul tsʼíitsʼik baʼalcheʼ, lelaʼ letiʼe u kaʼatúuloʼ yéetel chíikaʼan tiʼ juntúul oso.+ Le osoaʼ u líiʼsmaj junpʼéel u kʼab, yéetel u náachmaj óoxpʼéel costilla. Tiʼ le baʼalcheʼaʼ aʼalaʼabi: ‹Líiʼkech, jaant yaʼab bakʼ›.+
6 Teneʼ seguernaj in paakat, yéetel ¡ilawile!, tin wilaj uláakʼ juntúul tsʼíitsʼik baʼalcheʼ, lelaʼ chíikaʼan tiʼ juntúul leopardo.+ Chéen baʼaleʼ tu puʼucheʼ yaan kanpʼéel u xiikʼoʼob jeʼex u xiikʼoʼob juntúul chʼíichʼeʼ. Le tsʼíitsʼik baʼalcheʼaʼ yaan kanpʼéel u pool,+ yéetel tiʼ letiʼeʼ tsʼaʼab autoridad utiaʼal u gobernar.
7 Teneʼ seguernaj in paakat, yéetel ichil in wayakʼeʼ tin wilaj uláakʼ juntúul tsʼíitsʼik baʼalcheʼ, le u kantúuloʼ. Le baʼalcheʼaʼ jach táaj kʼaas, jach ku sajakkúuntik máak yéetel jach táaj yaan u muukʼ, tsʼoʼoleʼ u kojoʼobeʼ nuuktakoʼob yéetel de fierro. Le tsʼíitsʼik baʼalcheʼaʼ táan kaʼach u jaantik yéetel u xiixkúuntik tuláakal baʼax yaan tu baʼpach, yéetel le baʼax ku pʼáatloʼ táan kaʼach u yayaʼchaʼatik.+ Le baʼalcheʼaʼ jelaʼan tiʼ tuláakal u maasil tsʼíitsʼik baʼalcheʼob chíikpajoʼob antes tiʼ letiʼoʼ, letiʼeʼ yaan kaʼach diez u pʼéelal u baakoʼob.
8 Le táan kaʼach in paktik le baakoʼoboʼ, ¡ilawile!, tin wilaj u jóokʼol uláakʼ junpʼéel baak, le baak jeʼelaʼ chichan.+ Le ka jóokʼ le chan baakaʼ jóokpaytaʼab óoxpʼéel tiʼ le yáax baakoʼoboʼ. Tsʼoʼoleʼ ¡ilawile!, le chan baakaʼ yaan u yichoʼob jeʼex u yichoʼob juntúul máakeʼ, yaan xan kaʼach junpʼéel u chiʼ yéetel táan u yaʼalik baʼaloʼob utiaʼal u nojbaʼalkúuntkuba.*+
9 Teneʼ seguernaj in paakateʼ ka tin wilaj u tsʼaʼabal tronoʼob, ka kulaj+ le Máax desde jach úuch yanakoʼ.+ Le nookʼ u búukintmoʼ sak bey jeʼex le nieveoʼ,+ yéetel u tsoʼotsel u pooleʼ sak bey jeʼex le sak lanaoʼ. U tronoeʼ táan kaʼach u tóochʼbal u kʼáakʼil, yéetel u ruedailoʼob u tronoeʼ táan xan u tóochʼbal u kʼáakʼiloʼob.+
10 Desde teʼ tuʼux yanoʼ ku jóokʼol yéetel ku yáalkab kʼáakʼiʼ.+ Junpʼéel millón ángeloʼob meyajtik, yéetel tu táaneʼ yaan cien millones ángeloʼobiʼ.+ Le Juez*+ túunoʼ káaj u juzgar yéetel yaan libroʼob jeʼekʼabtaʼabi.
11 Teʼ kʼiin jeʼeloʼ teneʼ seguernaj in paakat tumen táan kaʼach in wuʼuyik le baʼax ku yaʼalik le baak utiaʼal u nojbaʼalkúuntkubaoʼ.*+ Tin wileʼ kíimsaʼab le tsʼíitsʼik baʼalcheʼoʼ, tóokaʼab u wíinklileʼ ka xuʼulsaʼabtiʼ.
12 Chéen baʼaleʼ tiʼ u maasil tsʼíitsʼik baʼalcheʼobeʼ+ luʼsaʼab u páajtalil u gobernaroʼob, yéetel chaʼab u kuxtaloʼob junpʼéel tiempo.
13 Ichil in wayakʼeʼ seguernaj in paakat, yéetel ¡ilawile!, ichil le múuyaloʼoboʼ yaan juntúul máax ku taal, chíikaʼan tiʼ u paal máak,+ letiʼeʼ chaʼab u yokol teʼ tuʼux yaan le Máax desde jach úuch yanakoʼ+ ka bisaʼab aktáan teʼ tuʼux yanoʼ.
14 Tiʼ letiʼeʼ tsʼaʼab páajtalil utiaʼal u gobernar,+ beetaʼab u respetartaʼal+ yéetel tsʼaʼab junpʼéel reino tiʼ, utiaʼal beyoʼ ka meyajtaʼak tumen u kajnáaliloʼob tuláakal kaajoʼob, luʼumoʼob bey xan tumen le máaxoʼob ku tʼankoʼob jejeláas idiomaʼoboʼ.+ U gobiernoeʼ junpʼéel gobierno mix bikʼin kun máan, yéetel u reinoeʼ mix bikʼin kun xuʼulsbiltiʼ.+
15 Teen Danieleʼ, sen sajakchajen yoʼolal le baʼaloʼob táan in wilkoʼ, le oʼolaleʼ jach chiʼichnaken kaʼachi.+
16 Náatsʼen túun tu yiknal juntúul tiʼ le máaxoʼob waʼalakbaloʼob teʼeloʼ ka tin kʼáatajtiʼ jach baʼax u kʼáat u yaʼal le baʼax táan in wilkoʼ. Letiʼ túuneʼ tu yaʼalajten baʼax u kʼáat u yaʼale. Letiʼeʼ tu yaʼalajten:
17 ‹Le kantúul nukuch tsʼíitsʼik baʼalcheʼoboʼ+ ku chíikbesik kantúul reyoʼob kun jóokʼloʼob desde teʼ luʼumoʼ.+
18 Chéen baʼaleʼ tiʼ le máaxoʼob santoʼob ku adorarkoʼob le Maas Nojoch Diosoʼ+ yaan u tsʼaʼabaltiʼob le reinooʼ,+ yaan u tiaʼalintikoʼob utiaʼal mantatsʼ,+ yaan u pʼáataltiʼob utiaʼal mantatsʼ›.
19 Teen túuneʼ taakchaj in wojéeltik u maasil yoʼolal le u kantúul tsʼíitsʼik baʼalcheʼoʼ, le baʼalcheʼ jelaʼan tiʼ u maasiloʼoboʼ. Le baʼalcheʼaʼ jach táaj kʼaas, u kojoʼobeʼ de fierro, yéetel u yíichʼakoʼobeʼ de cobre. Letiʼeʼ táan kaʼach u jaantik yéetel u xiixkúuntik tuláakal baʼax yaan tu baʼpach, yéetel le baʼax ku pʼáatloʼ táan kaʼach u yayaʼchaʼatik.+
20 Taakchaj xan in wojéeltik u maasil yoʼolal le diez u pʼéelal baakoʼob+ yaan kaʼach tu pooloʼ, bey xan yoʼolal le baak jóokʼ tu lugar le óoxpʼéel baakoʼoboʼ.+ Le baak jeʼelaʼ yaan kaʼach u yichoʼob yéetel u chiʼ, táan kaʼach u yaʼalik baʼaloʼob utiaʼal u nojbaʼalkúuntkuba,* tsʼoʼoleʼ maas nojoch u yilaʼal tiʼ u maasiloʼoboʼ.
21 Teneʼ seguernaj in paakateʼ ka tin wileʼ le baak jeʼeloʼ baʼatelnaj tu contra le máaxoʼob santoʼoboʼ yéetel táan kaʼach u ganarkoʼob.+
22 Chéen baʼaleʼ taal le Máax desde jach úuch yanakoʼ+ ka tu yaʼaleʼ le juiciooʼ tiaʼan tu favor le máaxoʼob santoʼob ku adorarkoʼob le Maas Nojoch Diosoʼ.+ Kʼuch túun le kʼiin yéeyaʼan utiaʼal u tsʼaʼabal le reino tiʼ le máaxoʼob santoʼoboʼ.+
23 Lelaʼ letiʼe baʼax tu yaʼalajtenaʼ: ‹Le u kantúul tsʼíitsʼik baʼalcheʼoʼ, ku chíikbesik le u kanpʼéel reino kun antal way luʼumeʼ. Le reinoaʼ jelaʼan tiʼ u maasil reinoʼoboʼ, le reinoaʼ yaan u lukʼik tuláakal le luʼumoʼ, yaan u yayaʼchaʼatik yéetel yaan u xiixkúuntik tuláakal baʼax yaan tu baʼpach.+
24 Le diez u pʼéelal u baakoʼoboʼ ku chíikbesik diez u túulal reyoʼob kun jóokʼloʼob ichil le reino jeʼeloʼ, le kéen tsʼoʼokok u máan le reyoʼobaʼ yaan u yantal uláakʼ rey, le rey jeʼelaʼ jelaʼan tiʼ u maasiloʼoboʼ yéetel yaan u mixbaʼalkúuntik óoxtúul reyoʼob.+
25 Le reyaʼ yaan u tʼaan tu contra le Maas Nojoch Diosoʼ,+ yéetel maʼ kun xuʼulul u beetik loob tiʼ le máaxoʼob santoʼob ku adorarkoʼob le Maas Nojoch Diosoʼ. Letiʼeʼ yaan u yilik u kʼexik le kʼiinoʼob yéeyaʼan utiaʼal u yúuchul wa baʼaxoʼ bey xan le leyoʼ. Tu kʼab le reyaʼ yaan u kʼuʼubul le máaxoʼob santoʼoboʼ, yaan u kʼuʼubloʼob junpʼéel año, kaʼapʼéel año yéetel táanchumuk año.*+
26 Chéen baʼaleʼ le Juezoʼ* káaj u juzgar, ka túun luʼsaʼab tiʼ le rey u páajtalil u gobernaroʼ utiaʼal ka páajchajak u xuʼulsaʼaltiʼ utiaʼal mantatsʼ.+
27 Tiʼ le máaxoʼob santoʼob ku adorarkoʼob le Maas Nojoch Diosoʼ+ tsʼaʼabtiʼob le reinooʼ, u páajtalil u gobernaroʼob yéetel u kiʼichkelmil tuláakal le reinoʼob yanoʼob way yóokʼol kaabeʼ. U reinoʼobeʼ mix bikʼin kun xuʼulul,+ letiʼobeʼ yaan u meyajtaʼaloʼob yéetel yaan u yuʼubaʼal u tʼaanoʼob tumen tuláakal le gobiernoʼoboʼ›.
28 Bey tsʼoʼokik le baʼax tin wayakʼtoʼ. Teen túuneʼ sakpileʼenchajen* tumen jach chiʼichnaken kaʼachi, chéen baʼaleʼ seguernaj in tuukul tiʼ le jeʼeloʼ».
Notas
^ Tuláakʼ tuʼuxeʼ ku yaʼalaʼal «náay».
^ Wa «u creerkuba».
^ Ich hebreoeʼ ku yaʼalaʼal kaʼach «Le Tribunal».
^ Wa «u creerkubaoʼ».
^ Wa «u creerkuba».
^ Ich hebreoeʼ ku yaʼalaʼal kaʼach «junpʼéel tiempo, tiempos yéetel u táanchumukil junpʼéel tiempo».
^ Ich hebreoeʼ ku yaʼalaʼal kaʼach «le Tribunaloʼ».
^ Wa «jelpaj bix in wilaʼal».