Yaʼab utsiloʼob jeʼel a kʼamik úuchik u kʼubik u kuxtal Jesúseʼ
Cada añoeʼ u testigoʼob Jéeoba yéetel u millonesil máakoʼobeʼ ku muchʼkubaʼob utiaʼal u kʼaʼajsikoʼob úuchik u kíimil Jesús jach jeʼex tu yaʼalil ka beetaʼakoʼ (Lucas 22:19). Lelaʼ ku yáantkoʼon k-maas valorart le baʼax tu beetaj Jesús úuchik u tsʼáaik u kuxtal tu yoʼolal tuláakal le wíinikoʼoboʼ. Ku kʼaʼajsik xan toʼoneʼ teʼ kʼiinoʼobaʼ yaʼab utsiloʼob jeʼel u páajtal k-kʼamik yoʼolal le baʼax tu beetoʼ bey xan tiʼ le kʼiinoʼob ku taaloʼoboʼ (Juan 3:16).
Kex wa páajchaj a bin teʼ Kʼaʼajsajil teʼ añoaʼ bey xan wa maʼeʼ, ¿bix jeʼel a jóoʼsik u yutsil úuchik u kʼubik u kuxtal Jesús t-oʼolaleʼ? Jesúseʼ tu kaʼansaj kaʼapʼéel baʼaloʼob jach kʼaʼabéet k-ilik beetik:
1. Kʼaj óolt Dios bey xan Jesús. Juntéen ka orarnaj Jesús tiʼ Jéeobaeʼ tu yaʼalaj: «Lelaʼ letiʼe baʼax kun tsʼáaik kuxtal minaʼan u xuul tiʼ le máakoʼoboʼ: ka kʼuchuk u kʼaj óoltechoʼob, teech le u juntúuliliʼ jaajil Diosoʼ, bey xan ka u kʼaj óoltoʼob Jesucristo, le máax ta túuxtoʼ» (Juan 17:3).
2. Beet baʼax ka kanik. Jesúseʼ tu yaʼaleʼ jach kʼaʼabéet k-tsʼáaik ichil k-kuxtal le baʼax tu kaʼansoʼ. Juntéenjeak le táan u kaʼansaj teʼ montañaoʼ utiaʼal u tsʼoʼoksik u tsikbaleʼ tu felicitartaj le máaxoʼob ‹uʼuyik yéetel beetik baʼax ku yaʼalikoʼ› (Lucas 6:46-48). Uláakʼ juntéeneʼ Jesúseʼ tu yaʼalaj: «Beora tsʼoʼok a wojéeltikeʼex le baʼaloʼobaʼ yaan u kiʼimaktal a wóoleʼex wa ka beetkeʼex» (Juan 13:17).
¿A kʼáat wa a kan u maasil yoʼolal Dios bey xan yoʼolal Jesús? ¿A kʼáat wa a wojéelt bix jeʼel a tsʼáaik ichil a kuxtal le baʼax ka kanikoʼ? Koʼox ilik jujunpʼéel baʼaloʼob jeʼel u yáantkecheʼ.
U tsʼaʼabal xook yéetel le Bibliaoʼ
Le bix k-tsʼáaik xookoʼ tsʼoʼok u yáantik yaʼab máakoʼob u kʼaj óoltoʼob le Bibliaoʼ yéetel bix jeʼel u tsʼáaikoʼob ichil u kuxtaloʼob le baʼax ku kankoʼoboʼ.
Utiaʼal a wilik bix u tsʼaʼabal le xookoʼ ooken teʼ jaats Kʼáat ka tsʼaʼabaktech xook.
Chaʼant le video ¡Disfrutart u xookil le Bibliaoʼ!
Reuniónoʼob
U testigoʼob Jéeobaeʼ kaʼatéen ku muchʼkubaʼob cada semana teʼ lugaroʼob kʼaj óolaʼanoʼob bey Salón del Reinoeʼ. Teʼ reuniónoʼoboʼ ku xakʼaltaʼal le Bibliaoʼ yéetel ku kaʼansaʼal tiʼ máak bix jeʼel u tsʼáaik ichil u kuxtal le baʼax ku kanikoʼ.
Tuláakal máak jeʼel u páajtal u bin tiʼ le reuniónoʼoboʼ maʼ tsaaj wa Testigo máak utiaʼal ka xiʼikiʼ. Según tuʼux kajaʼan máakeʼ maʼ xaaneʼ jeʼel u páajtal u bin teʼ salónoʼ wa u chaʼantik tiʼ videoconferencia le reuniónoʼ.
Utiaʼal a wojéeltik bix u beetaʼal le reuniónoʼoboʼ chaʼant le video ¿Bix le muchʼtáambaloʼob ku beetaʼal teʼ Najil Reinooʼ?
Utiaʼal a wilik tuʼux ku beetaʼal junpʼéel reunión naatsʼ tiʼ a wotocheʼ ooken teʼ jaats Muchʼaba yéetel u testigoʼob Jéeoba.
Publicaciónoʼob yéetel videoʼob ich Internet
Yaʼab tiʼ le publicaciónoʼob yéetel le videoʼob yaan teʼ sitio ich Internetoʼ jeʼel u yáantkech utiaʼal ka a kan u maasil yoʼolal le baʼaxoʼob tu kaʼansaj Jesúsoʼ yéetel le bix jeʼel u yáantkech le u kuxtal tu kʼuboʼ.
Utiaʼal a wojéeltik bix u salvartaʼal u kuxtal u millonesil máakoʼob tumen chéen juntúul máakeʼ ilawil le xookoʼobaʼ: «¿Bix u salvarkoʼon Jesús?» yéetel «¿Baʼaxten muʼyajnaj yéetel kíim Jesús?» chaʼant xan le video ¿Baʼaxten kíim Jesús?