Tu taal u sáastal u kʼiinil 24 tiʼ febrero tiʼ 2022, Rusiaeʼ tu atacartaj u luʼumil Ucrania. Kex yaʼab gobiernoʼob táan u yaʼalikoʼobtiʼ maʼ u atacartikeʼ tu atacartaj le luʼumoʼ. Le guerraaʼ, ¿jeʼel wa u afectartik tuláakal yóokʼol kaabeʼ? António Guterres, u secretarioil general le Naciones Unidasoʼ, tu yaʼalaj: «Jach yaʼab máakoʼob kun sufrir, yaʼab baʼaloʼob kun kʼaskúuntbil yéetel yaan u yantal yaʼab inseguridad Europa bey xan tiʼ tuláakal yóokʼol kaab».

•   Jesúseʼ u yaʼalmiliʼeʼ «junpʼéel kaajeʼ yaan u baʼateʼel tu contra uláakʼ kaaj, junpʼéel reinoeʼ yaan u baʼateʼel tu contra uláakʼ reino» (Mateo 24:7). Utiaʼal a wojéeltik baʼax ku yaʼalik le Biblia yoʼolal le baʼax tu profetizartaj Jesúsoʼ ilawil le xook «¿Baʼax eʼesik kuxaʼanoʼon «tu tsʼook kʼiinoʼob»?».

•   U libroil Apocalipsiseʼ ku representartik le guerraʼob yéetel juntúul máak u natʼmaj «juntúul tsíimin chak bey kʼáakʼeʼ» yéetel ku luʼsik le jeetsʼelil way yóokʼol kaabeʼ (Apocalipsis 6:4). Utiaʼal a wilik bix u béeytal le profecía teʼ kʼiinoʼobaʼ ilawil le xook «¿Máaxoʼob natʼmil le kantúul tsíiminoʼoboʼ?».

•   U libroil Danieleʼ u yaʼalmiliʼeʼ «u reyil xamaneʼ» yaan u baʼateʼel tu contra «u reyil noojol» (Daniel 11:25-45). Utiaʼal a wilik baʼaxten k-aʼalik Rusia yéetel le máaxoʼob apoyartik letiʼob u reyil xamaneʼ chaʼant le video «Bix u béeychajal u profecíail Daniel 11». a

•   U libroil Apocalipsiseʼ ku tʼaan xan tiʼ le «baʼateʼel kun antal tu noj kʼiinil le Dios jach táaj yaan u poderoʼ» (Apocalipsis 16:14, 16). Chéen baʼaleʼ le baʼateʼel jeʼeloʼ maʼ bey jeʼex le guerra táan u yúuchlaʼ. Utiaʼal a wilik bix kun úuchul le baʼateʼel ku yaʼalik le Bibliaoʼ ilawil le xook «¿Baʼax le Armagedónoʼ?».

•   Le Bibliaoʼ ku yaʼalikeʼ Dioseʼ yaan u «beetik u xuʼulul u yantal baʼateʼel tiʼ tuláakal yóokʼol kaab» (Salmo 46:9). Utiaʼal a wilik uláakʼ baʼaxoʼob ku prometertik Dioseʼ ilawil le xook ich español «La esperanza real de un mañana mejor».

•   Jesúseʼ tu kaʼansaj tiʼ u discípuloʼob ka orarnakoʼob utiaʼal u kʼáatkoʼob ka taalak u Reino Dios (Mateo 6:9, 10). U Reino Dioseʼ tiaʼan teʼ kaʼanoʼ yéetel yaan u yilik ka beetaʼak baʼax u kʼáat Dios way Luʼumeʼ. Ichil le baʼaxoʼob ken u beetoʼ táakaʼan le u yilik ka yanak jeetsʼelil tiʼ tuláakal yóokʼol kaaboʼ. Utiaʼal a wilik bix jeʼel a kʼamik le bendiciónoʼob ken u taas u Reino Diosoʼ chaʼant le video «¿Baʼax u Reino Dios?».

 Tu luʼumil Ucraniaeʼ yaan maas tiʼ 129,000 u testigoʼob Jéeobaiʼ. Jeʼex u beetik u maasil Testigoʼob tiʼ tuláakal yóokʼol kaabeʼ letiʼob xaneʼ maʼatech u táakpajloʼob tiʼ política. Tsʼoʼoleʼ maʼ xan tu táakpajloʼob tiʼ guerraʼob jeʼex tu kaʼansil Jesúsoʼ (Juan 18:36). U testigoʼob Jéeoba tiʼ tuláakal yóokʼol kaabeʼ táan u tsikbaltikoʼob «le baʼaloʼob maʼalobtak ken u beet le Reinooʼ». Letiʼobeʼ u yojloʼobeʼ chéen u Reino Dios kun páajtal u xuʼulsik le problemas yaan way yóokʼol kaab jeʼex le guerraʼoboʼ (Mateo 24:14). Wa a kʼáat a wojéelt baʼax uláakʼ promesaʼob yaan teʼ Bibliaoʼ jeʼel u páajtal a kʼáatik áantaj teʼ sitio jw.org.